কাঠমাণ্ডু, ১০ জুন (হি.স.)। নেপাল-ভাৰত সীমান্ত সমস্যা সন্দৰ্ভত সংসদত শেহতীয়াকৈ প্ৰধানমন্ত্ৰী বালেন্দ্ৰ শ্বাহৰ বক্তব্যৰ বিষয়ে বুধবাৰে স্পষ্ট কৰি দিয়ে নেপালৰ বৈদেশিক মন্ত্ৰী শিশিৰ খানালে। তেওঁ কয় যে নেপাল-ভাৰত সীমান্তৰ বিষয়ত তৃতীয় পক্ষৰ ভূমিকাক লৈ প্ৰায়ে প্ৰশ্ন উত্থাপন হয়, কিন্তু নেপাল নিজৰ কাম-কাজ নিজে চম্ভালিবলৈ সম্পূৰ্ণৰূপে সক্ষম।

প্ৰতিনিধি সদনত ভাষণ দি বৈদেশিক মন্ত্ৰী খানালে উল্লেখ কৰে যে প্ৰধানমন্ত্ৰীৰ এই মন্তব্য মূলতঃ সীমান্ত অঞ্চলৰ কোনো নথকা ভূমিত বেদখল আৰু ভূমি দখলৰ সৈতে জড়িত বিষয়সমূহৰ প্ৰেক্ষাপটত। চুগৌলি সন্ধিৰ ঐতিহাসিক পটভূমিৰ উদ্ধৃতি দি বৈদেশিক মন্ত্ৰীগৰাকীয়ে কয় যে কিছুমান আলোচনাত তৃতীয় দেশ জড়িত যেন লাগিব পাৰে যদিও নেপালে নিজৰ সীমা বিবাদ সমাধানৰ বাবে তৃতীয় পক্ষৰ মধ্যস্থতা বিচৰা নাই।

তেওঁ স্পষ্ট কৰি দিয়ে যে নেপালে ভাৰতৰ সৈতে প্ৰত্যক্ষ আলোচনা আৰু কূটনৈতিক মাধ্যমৰ জৰিয়তে সমস্যা সমাধানৰ পক্ষপাতী। খানালে উল্লেখ কৰে যে প্ৰধানমন্ত্ৰীৰ মন্তব্যই সীমান্ত অঞ্চলত সময়ৰ লগে লগে স্থানীয় ভূমি ব্যৱহাৰ আৰু দখলৰ সৰু সৰু পৰিৱৰ্তনৰ ইংগিত দিয়ে। তেওঁ কয় যে প্ৰধানমন্ত্ৰীয়ে বছৰ বছৰ ধৰি সীমান্ত অঞ্চলত বসবাস কৰা লোকসকলে সীমান্তৰ সিপাৰে ভূমি ব্যৱহাৰ কৰাৰ সন্দৰ্ভত এটা সাধাৰণ পৰ্যবেক্ষণ কৰিছিল।

বৈদেশিক মন্ত্ৰী খানালে বিষয়টো সংবেদনশীলতা আৰু ৰাষ্ট্ৰীয় স্বাৰ্থৰ দৃষ্টিকোণৰ পৰা চোৱাৰ আহ্বান জনায়। তেওঁ সংসদক অৱগত কৰে যে কূটনৈতিক উপায়েৰে সীমান্ত সমস্যা সমাধানৰ বাবে চৰকাৰ দায়বদ্ধ। এনে সমস্যাৰ স্থায়ী সমাধানৰ বাবে নেপাল-ভাৰত সীমান্ত কাৰ্য্যগোষ্ঠী আৰু অন্যান্য দ্বিপাক্ষিক ব্যৱস্থাৰ জৰিয়তে সীমান্ত নিৰ্ধাৰণ আৰু মেপিংৰ কাম চলি আছে বুলিও তেওঁ সংসদক অৱগত কৰে।

প্ৰধানমন্ত্ৰী বালেন্দ্ৰ শ্বাহৰ সীমান্তৰ মন্তব্যক লৈ সংসদত বিৰোধী দলসমূহৰ বাৰে বাৰে প্ৰতিবাদৰ সৃষ্টি হৈছিল আৰু স্পষ্টীকৰণৰ দাবী জনাইছিল। সেই বিতৰ্ক স্পষ্ট কৰাৰ উদ্দেশ্য আছিল বৈদেশিক মন্ত্ৰীৰ বক্তব্য।

হিন্দুস্থান সমাচাৰ / মনোজ কুমাৰ শইকীয়া