বাহৰেইন পালেগৈ ইৰাণ-আমেৰিকাৰ যুদ্ধ, মানামাত থকা আমেৰিকাৰ নৌসেনাৰ কেন্দ্ৰীয় কমাণ্ডৰ মুখ্য কাৰ্যালয়ত ড্ৰ’ন আক্ৰমণ

তেহৰাণ/মানামা/ৱাশ্বিংটন, ১০ জুন (হি.স.)। পাৰস্য উপসাগৰত অৱস্থিত বাহৰেইনৰ ৰাজধানী মানামালৈ সম্প্ৰসাৰিত হৈছে ইৰাণ আৰু আমেৰিকাৰ যুদ্ধ । ইৰাণৰ ইছলামিক ৰিভল্যুচনেৰী গাৰ্ড কৰ্পছে দাবী কৰে যে দক্ষিণ ইৰাণৰ ওপৰত আমেৰিকাৰ আক্ৰমণৰ প্ৰতিক্ৰিয়া স্বৰূপে বুধবাৰে পুৱা বাহৰেইনৰ ৰাজধানী মানামাত থকা আমেৰিকাৰ নৌসেনাৰ চেণ্ট্ৰেল কমাণ্ডৰ মুখ্য কাৰ্যালয়ত ড্ৰ’ন আক্ৰমণ চলাইছিল। সোমবাৰে হৰমুজ জলদ্বীপৰ ওপৰত আমেৰিকাৰ আপাচি আক্ৰমণাত্মক হেলিকপ্টাৰখন ভূপাতিত কৰাৰ প্ৰতিক্ৰিয়া স্বৰূপে মঙলবাৰে দক্ষিণ ইৰাণত আত্মৰক্ষাৰ বাবে এই আক্ৰমণ সংঘটিত কৰা বুলি আমেৰিকাই প্ৰকাশ কৰে।

আল জাজিৰা, চিবিএছ নিউজ, গালফ নিউজ আৰু এবিচি নিউজৰ বাতৰি অনুসৰি তেহৰাণৰ বিষয়াসকলে কয় যে ইৰাণে যিকোনো আক্ৰমণ প্ৰতিহত কৰিবলৈ নিজৰ বায়ু প্ৰতিৰক্ষা ব্যৱস্থা সক্ৰিয় কৰিছে। বিষয়াসকলে জনোৱা মতে, ইৰাণে বুশ্বেহৰৰ ওপৰত এখন হেলিকপ্টাৰ আৰু আমেৰিকাৰ ড্ৰ’ন (এম কিউ-৯) ভূপাতিত কৰে। ইফালে আই আৰ জি চি আৰু খাটাম আল আনবিয়া মুখ্য কাৰ্যালয়ে আমেৰিকাৰ কেইবাটাও ঘাটিত আক্ৰমণ চলোৱাৰ কথা নিশ্চিত কৰিছে। দুয়োজনে মাত্ৰ এটা স্থানৰ কথা উল্লেখ কৰিছিল: বাহৰেইনৰ ৰাজধানী মানামাত থকা আমেৰিকাৰ নৌসেনাৰ কেন্দ্ৰীয় কমাণ্ড মুখ্য কাৰ্যালয়। উল্লেখযোগ্য যে ইৰাণৰ এটা মূল সামৰিক কমাণ্ড খাটাম আল-আনবিয়া। খাটাম আল-আনবিয়া আই আৰ জি চিৰ অধীনত দেশৰ সশস্ত্ৰ বাহিনী, গতানুগতিক সামৰিক, আৰু চোৰাংচোৱা সংস্থাসমূহৰ মাজত সামৰিক অভিযান আৰু কৌশলগত প্ৰতিৰক্ষা আৰু আক্ৰমণাত্মক অভিযানৰ সমন্বয়ৰ সৰ্বোচ্চ কেন্দ্ৰ বুলি কোৱা হয়।

ইৰাণে মানামাত থকা আমেৰিকাৰ নৌসেনাৰ চেণ্ট্ৰেল কমাণ্ডৰ মুখ্য কাৰ্যালয়ক লক্ষ্য কৰি কিমান ড্ৰ’ন ব্যৱহাৰ কৰিছিল সেয়া এতিয়াও স্পষ্ট হোৱা নাই। এই আক্ৰমণত ক্ষেপণাস্ত্ৰ ব্যৱহাৰ কৰা হৈছে নে নাই সেয়াও তৎক্ষণাত স্পষ্ট হোৱা নাই। খাটাম আল-আনবিয়াৰ মুখ্য কাৰ্যালয়ৰ পৰা প্ৰকাশিত বিবৃতিটোত মূলতঃ উল্লেখ কৰা হৈছে যে দেশৰ দক্ষিণ অঞ্চলত আমেৰিকাৰ সামৰিক আগ্ৰাসনৰ প্ৰতি সঁহাৰি জনাই (যিটো তেওঁলোকৰ হেলিকপ্টাৰখন নমাই দিয়াৰ অজুহাত আছিল) দেশখনৰ সেনা আৰু আই আৰ জি চিয়ে যৌথভাৱে অঞ্চলটোৰ কিছুমান আমেৰিকাৰ ঘাটিত ব্যাপক আক্ৰমণ চলাইছিল।

খাটাম আল-আনবিয়াৰ বিবৃতিত উল্লেখ কৰা হৈছে যে যদিহে আমেৰিকাৰ সেনাই ইৰাণৰ বিৰুদ্ধে আগ্ৰাসন পুনৰাবৃত্তি কৰে তেন্তে অঞ্চলটোৰ সকলো আমেৰিকাৰ ঘাটিৰ বিৰুদ্ধে অধিক তীব্ৰ আৰু বৃহৎ পৰিসৰৰ আক্ৰমণ চলোৱা হ’ব। মঙলবাৰে সন্ধিয়া চেণ্টকমে কয় যে সোমবাৰে আপাচি হেলিকপ্টাৰখন ভূপাতিত কৰাৰ প্ৰতিক্ৰিয়া স্বৰূপে ইৰাণৰ ওপৰত আক্ৰমণ আত্মৰক্ষাৰ বাবে সংঘটিত কৰা হৈছে। প্ৰতিশোধ লোৱা হৈছে। ইফালে আপাচি কাণ্ডৰ সন্দৰ্ভত ৰাষ্ট্ৰপতি ট্ৰাম্পে উল্লেখ কৰে যে ইৰাণীয়ে হৰমুজ জলদ্বীপৰ ওচৰত দুৰ্ঘটনাগ্ৰস্ত হোৱা হেলিকপ্টাৰখন ভূপাতিত কৰে।

ভগৱানক ধন্যবাদ, দুয়োজন পাইলটকে নিৰাপদে উদ্ধাৰ কৰা হ’ল।’ তেওঁ কয় যে সঁহাৰি “অতি কঠোৰ” হ’ব।

এই বক্তব্যৰ কেইঘণ্টামান পূৰ্বে ট্ৰাম্পে কৈছিল যে ইৰাণৰ সৈতে চুক্তিত উপনীত হোৱাৰ প্ৰচেষ্টা “চূড়ান্ত পৰ্যায়ত” আছে আৰু “দুই বা তিনিদিনৰ ভিতৰত” চুক্তিত উপনীত হ’ব পাৰে। আপাচি কাণ্ডৰ পিছত আলোচনাৰ স্থিতি অস্পষ্ট হৈয়ে আছে। ইফালে ইৰাণ সমৰ্থিত উগ্ৰপন্থী সংগঠন হিজবুল্লাহৰ বিৰুদ্ধে লেবাননত ইজৰাইলে সামৰিক অভিযান অব্যাহত ৰাখিছে। স্বাস্থ্য বিষয়াসকলে প্ৰকাশ কৰা অনুসৰি মঙলবাৰে দক্ষিণৰ টায়াৰ চহৰত নতুন আক্ৰমণত কমেও ৮ জন লোক নিহত হৈছে। ইৰাণে সোমবাৰে সকীয়াই দিয়ে যে লেবাননত ইজৰাইলৰ যিকোনো নতুন আক্ৰমণৰ প্ৰতি সঁহাৰি জনাব।

তেহৰাণৰ বিষয়াসকলে কয় যে ইৰাণৰ দক্ষিণ উপকূলত হৰমুজ জলদ্বীপৰ সমীপত হোৱা বিস্ফোৰণৰ পিছত পৰিস্থিতি শান্ত হৈ পৰিছে। আমেৰিকাৰ ডিজিটেল নিউজ আউটলেট এক্সিয়াছে প্ৰকাশ কৰা অনুসৰি আমেৰিকান বাহিনীয়ে হৰমুজ জলদ্বীপৰ আশে-পাশে থকা ইৰাণৰ কেইবাটাও বায়ু প্ৰতিৰক্ষা আৰু ৰাডাৰ ব্যৱস্থাত আক্ৰমণ চলাইছে। ইয়াৰ পিছতে ইৰাণৰ বৈদেশিক মন্ত্ৰী আব্বাছ আৰাঘচিয়ে প্ৰতিশোধৰ ভাবুকি দিয়ে। ইফালে, বাহৰেইনৰ স্বৰাজ মন্ত্ৰালয়ে বুধবাৰে সতৰ্কবাণী জাৰি কৰা বুলি জানিবলৈ দিয়ে। আমেৰিকাৰ এটা ঘাটিত আক্ৰমণ কৰিছে আই আৰ জি চিয়ে। মন্ত্ৰালয়ে এক্সত কয় যে, চাইৰেন বজোৱা হৈছে। নাগৰিক আৰু বাসিন্দাসকলক শান্ত হৈ থাকিবলৈ আৰু ওচৰৰ নিৰাপদ স্থানলৈ যাবলৈ আহ্বান জনোৱা হৈছে।

মধ্যপ্ৰাচ্যত আমেৰিকাৰ বাহিনী চোৱাচিতা কৰা আমেৰিকাৰ চেণ্ট্ৰেল কমাণ্ডে (চেন্টকম-CENTCOM) এক্সত কয় যে ইৰাণে আপাচি বিমানখনক ভূপাতিত কৰাৰ প্ৰতিশোধ সম্পন্ন হৈছে। নিখুঁত অস্ত্ৰ ব্যৱহাৰ কৰি আমেৰিকাৰ বায়ুসেনা আৰু নৌসেনাৰ যুদ্ধ বিমানে ইৰাণৰ বায়ু প্ৰতিৰক্ষা ব্যৱস্থা, স্থল নিয়ন্ত্ৰণ ষ্টেচন আৰু হৰমুজ জলদ্বীপৰ ওচৰৰ নিৰীক্ষণ ৰাডাৰ স্থানত আঘাত হানে।

ইৰাণৰ ইছলামিক ৰিভল্যুচনেৰী গাৰ্ড কৰ্পে বুধবাৰে পুৱা বাহৰেইনত থকা আমেৰিকাৰ নৌসেনাৰ পঞ্চম বহৰৰ মুখ্য কাৰ্যালয়ত তেওঁলোকৰ বাহিনীয়ে ড্ৰ’ন আক্ৰমণ চলায় বুলি জানিবলৈ দিয়ে। স্থানীয় সময় অনুসৰি পুৱা প্ৰায় ২:৩০ বজাত (ইউ এ ইৰ সময় অনুসৰি ৩:৩০ বজাত) মানমাত থকা আমেৰিকাৰ ঘাটিটোক লক্ষ্য কৰিছিল শ্বাহেদ-১৩৬ একক বেৰেল আক্ৰমণাত্মক ড্ৰ’নে। ইৰাণৰ বৈদেশিক মন্ত্ৰী আব্বাছ আৰাঘচিয়ে কয় যে আমেৰিকাৰ বাহিনীয়ে এই অঞ্চল এৰি যোৱাটোৱেই উত্তম। তেওঁ কয় যে আমেৰিকাই এতিয়া আমাক পৰীক্ষা কৰা উচিত নহয়। ইৰাণৰ ধৈৰ্য্যৰ বান্ধ ভাঙি গৈছে।

সেইবাবেই আমেৰিকাৰ পঞ্চম বহৰ ইমান গুৰুত্বপূৰ্ণ

আমেৰিকাৰ পঞ্চম বহৰ অতি গুৰুত্বপূৰ্ণ । মধ্যপ্ৰাচ্যৰ বাহৰেইনৰ ৰাজধানী মানামাৰ জুফাইৰত অৱস্থিত । আনুষ্ঠানিকভাৱে এই সামৰিক ঘাটিটোৰ নাম দিয়া হৈছে নেভাল ছাপৰ্ট এক্টিভিটি বাহৰেইন । ই প্ৰায় ২৫ লাখ বৰ্গমাইল সামুদ্ৰিক ভূখণ্ডৰ নিৰীক্ষণৰ দায়িত্ব লয়। ইয়াৰ অধিকাৰক্ষেত্ৰত পাৰ্চী উপসাগৰ, লোহিত সাগৰ, ওমান উপসাগৰ, আৰব সাগৰ আৰু ভাৰত মহাসাগৰৰ কিছু অংশ অন্তৰ্ভুক্ত। ইয়াৰ আটাইতকৈ গুৰুত্বপূৰ্ণ কাম হৈছে তেল যোগান আৰু বিশ্বৰ আটাইতকৈ স্পৰ্শকাতৰ আৰু গুৰুত্বপূৰ্ণ সাগৰীয় পথ যেনে হৰমুজ জলদ্বীপ, ছুৱেজ খাল, বাব-এল-মাণ্ডেবৰ মাজেৰে পাৰ হৈ যোৱা আন্তঃৰাষ্ট্ৰীয় জাহাজসমূহক নিৰাপত্তা প্ৰদান কৰা। এই ঘাটিটো আমেৰিকাৰ নৌসেনাৰ কেন্দ্ৰীয় কমাণ্ডৰ মুখ্য কাৰ্যালয়ো, যিয়ে আমেৰিকাৰ কেন্দ্ৰীয় কমাণ্ডক পোনপটীয়াকৈ প্ৰতিবেদন দিয়ে।

-----------------

হিন্দুস্থান সমাচাৰ / অৰৱিন্দ