নতুন দিল্লী, ২৭ মে’ (হি.স.)। কেন্দ্ৰীয় কয়লা আৰু খনিৰ ৰাজ্যিক মন্ত্ৰী সতীশ চন্দ্ৰ ডুবেয়ে দক্ষিণ-পূব কয়লা ক্ষেত্ৰ লিমিটেড (এছইচিএল)ৰ দিনজোৰা ভ্ৰমণ। এই ভ্ৰমণৰ সময়ত তেওঁ কোম্পানীটোৰ কাৰ্য্যকৰী প্ৰদৰ্শন, আন্তঃগাঁথনিৰ পদক্ষেপ, আৰু ভৱিষ্যতৰ উন্নয়ন পৰিকল্পনাৰ পৰ্যালোচনা কৰে।
বুধবাৰে কয়লা মন্ত্ৰালয়ে প্ৰকাশ কৰা এক বিবৃতিত কয় যে এই ভ্ৰমণৰ সময়ত কয়লা আৰু খনিৰ ৰাজ্যিক মন্ত্ৰী সতীশ চন্দ্ৰ ডুবেয়েও ৰায়পুৰত ছত্তীশগড়ৰ মুখ্যমন্ত্ৰী বিষ্ণু দেৱ ছাইৰ সৈতে সাক্ষাৎ কৰে। বৈঠকত দুয়োজনে কয়লা উৎপাদন, আন্তঃগাঁথনি উন্নয়ন, লজিষ্টিক সংযোগ, শক্তি সুৰক্ষা, আৰু ৰাজ্যৰ উদ্যোগ উন্নয়নৰ সৈতে জড়িত বিষয়সমূহৰ ওপৰত আলোচনা কৰে।
মন্ত্ৰালয়ৰ মতে, এই আলোচনাৰ মূল উদ্দেশ্য আছিল মূল উন্নয়ন প্ৰকল্পসমূহ ত্বৰান্বিত কৰা, কাৰ্য্যকলাপসমূহ সুশৃংখলিত কৰা, আৰু অৰ্থনৈতিক বৃদ্ধিৰ প্ৰসাৰ আৰু কয়লা উৎপাদনকাৰী অঞ্চলসমূহত নতুন নিয়োগৰ সুযোগ সৃষ্টিৰ বাবে কেন্দ্ৰ আৰু ৰাজ্য চৰকাৰৰ মাজত সমন্বয় শক্তিশালী কৰা। এই উপলক্ষে তেওঁ কয়লা খণ্ডৰ উন্নয়নৰ বাবে ছত্তীশগড় চৰকাৰৰ অবিৰত সহায়ৰ শলাগ লৈ সহযোগিতামূলক পন্থাই ৰাষ্ট্ৰৰ শক্তি সুৰক্ষাৰ ক্ষেত্ৰত ৰাজ্যৰ অৱদান আৰু অধিক শক্তিশালী কৰিব বুলি বিশ্বাস প্ৰকাশ কৰে।
কয়লা মন্ত্ৰালয়ৰ তথ্য অনুসৰি এস ই চি এলৰ মুখ্য কাৰ্যালয় ভ্ৰমণৰ সময়ত সতীশ চন্দ্ৰ ডুবেৰ সভাপতিত্বত এখন বিস্তৃত পৰ্যালোচনা বৈঠক অনুষ্ঠিত হয়। বৈঠকত কয়লা উৎপাদন, পৰিবহণ, গুণগত ব্যৱস্থাপনা, সুৰক্ষা, ডিজিটেলাইজেচনৰ পদক্ষেপ, পৰিৱেশ বহনক্ষমতাৰ ব্যৱস্থা, কয়লা গেছীকৰণ প্ৰকল্প, খনি বন্ধ কৰাৰ কাৰ্যকলাপ, চি এছ আৰ পদক্ষেপ, আৰু কোম্পানীটোৰ ভৱিষ্যতৰ কাৰ্য্য পৰিকল্পনাৰ পৰ্যালোচনা কৰা হয়।
মন্ত্ৰালয়ৰ তথ্য অনুসৰি এই উপলক্ষে এছ ই চি এলৰ মুখ্য কাৰ্যবাহী বিষয়া হৰিশ দুহানে উল্লেখ কৰে যে চলিত বিত্তীয় বৰ্ষ ২০২৬-২৭ত কয়লা ভাৰতৰ ১০ কোটি টনৰ সঞ্চিত উৎপাদনৰ লক্ষ্যত উপনীত হোৱাৰ দিশত এছ ই চি এলে সৰ্বাধিক ২ কোটি ৬৮৬ লাখ টন অৱদান আগবঢ়াইছে। কয়লা মন্ত্ৰালয়ৰ নিৰ্দেশনাত দেশৰ ক্ৰমবৰ্ধমান শক্তিৰ প্ৰয়োজনীয়তা পূৰণৰ বাবে এছ ই চি এলৰ প্ৰতিশ্ৰুতি পুনৰবাৰ উল্লেখ কৰে। এই বৈঠকত এছ ই চি এলৰ চি এম ডি হৰিশ দুহান, কাৰ্য্যকৰী সঞ্চালক, মুখ্য ভিজিলেন্স বিষয়া, কয়লা মন্ত্ৰালয়ৰ জ্যেষ্ঠ বিষয়া, এছ ই চি এলৰ বিষয়াসকল উপস্থিত থাকে।
-----------------
হিন্দুস্থান সমাচাৰ / অৰৱিন্দ
