নতুন দিল্লী, ০৮ এপ্ৰিল (হি.স.)। প্ৰধানমন্ত্ৰী মুদ্ৰা যোজনা (পিএমএমৱাই)ই বুধবাৰে সুক্ষ্ম আৰু ক্ষুদ্ৰ উদ্যোগীসকলক সবলীকৰণৰ ১১ বছৰীয়া কাম সম্পূৰ্ণ কৰিলে। পিএমএমৱাইয়ে ৫৭.৭৯ কোটি ঋণৰ জৰিয়তে ৪০.০৭ লাখ কোটি টকাতকৈ অধিক ধন প্ৰদান কৰিছে, যাৰ ফলত লঘূ আৰু ক্ষুদ্ৰ উদ্যোগৰ বাবে ঋণ পৰিৱেশ ব্যৱস্থা শক্তিশালী হৈছে। ২০১৫ চনৰ ৮ এপ্ৰিলত প্ৰধানমন্ত্ৰী নৰেন্দ্ৰ মোদীয়ে আৰম্ভ কৰা এই আঁচনিখনৰ লক্ষ্য হৈছে ₹২০ লাখ পৰ্যন্ত সহজ, উজু আৰু জামিনবিহীন ঋণ প্ৰদান কৰি ক্ষুদ্ৰ ব্যৱসায়ীসকলক অকৰ্পৰেট আৰু অকৃষি আয় সৃষ্টিকাৰী কাৰ্য্যকলাপত সহায় কৰা। বিত্তমন্ত্ৰী নিৰ্মলা সীতাৰমণে উল্লেখ কৰে যে বিগত দশকত ভাৰতে এক পৰিৱৰ্তন সাক্ষী হৈছে, লাখ লাখ সাধাৰণ নাগৰিকে নৱীকৃত আত্মবিশ্বাস আৰু গতিশীলতাৰে উদ্যোগীকৰণৰ ক্ষেত্ৰখনত প্ৰৱেশ কৰিছে। সীতাৰমনে কয় যে দেশৰ ক্ষুদ্ৰ আৰু মজলীয়া উদ্যোগ (এম এছ এম ই) আৰু অগণন ব্যক্তিগত উদ্যোগীৰ ঋণৰ পৰিৱেশ পুনৰ গঢ় দিয়াত এই আঁচনিখনে সহায়ক বুলি প্ৰমাণিত হৈছে।

লাখ লাখ লোকক সবলীকৰণ আৰু সৰ্বাংগীন বৃদ্ধিৰ দৃষ্টিভংগী বাস্তৱায়িত কৰাত পিএমএমৱাইৰ ভূমিকাক আলোকপাত কৰি বিত্তমন্ত্ৰীয়ে কয় যে ৫৭.৭৯ কোটিৰো অধিক ঋণ অনুমোদন কৰা হৈছে, যাৰ পৰিমাণ ₹৪০.০৭ লাখ কোটি। এই ঋণৰ দুই তৃতীয়াংশ মহিলা উদ্যোগীক অনুমোদন দিয়া হৈছে। তেওঁ লগতে কয় যে প্ৰায় এক পঞ্চমাংশ প্ৰথমবাৰৰ বাবে উদ্যোগীসকলক প্ৰদান কৰা হৈছে। তথ্য অনুসৰি নতুন উদ্যোগীক ১২ লাখ কোটি টকাৰ ১২.১৫ কোটি ঋণ প্ৰদান কৰা হৈছে। বিত্তমন্ত্ৰীগৰাকীয়ে কয় যে প্ৰধানমন্ত্ৰী মুদ্ৰা যোজনাই উদ্যোগীসকলক সবলীকৰণ কৰি যাব যাতে তেওঁলোকে ২০৪৭ চনৰ ভিতৰত আমাৰ জাতিৰ উন্নত ভাৰত হোৱাৰ যাত্ৰাত সক্ৰিয় অংশীদাৰ হ’ব পাৰে।

এই উপলক্ষে কেন্দ্ৰীয় বিত্ত ৰাজ্য মন্ত্ৰী পংকজ চৌধুৰীয়ে উল্লেখ কৰে যে প্ৰধানমন্ত্ৰী মুদ্ৰা যোজনা (পিএমএমৱাই) ক্ষুদ্ৰ উদ্যোগীকৰণৰ প্ৰসাৰৰ বাবে আৰম্ভ কৰা অন্যতম গুৰুত্বপূৰ্ণ পদক্ষেপ। পিএমএমৱাইয়ে ক্ষুদ্ৰ উদ্যোগীসকলক বেংক, বেচৰকাৰী বিত্তীয় প্ৰতিষ্ঠান (এনবিএফচি), আৰু ক্ষুদ্ৰ আৰু মজলীয়া বিত্তীয় প্ৰতিষ্ঠান (এমএফআই)ৰ পৰা ঋণ সমৰ্থন লাভ কৰাৰ বাবে এক মঞ্চ প্ৰদান কৰে, যাৰ ফলত ঋণ অন্তৰ্ভুক্তিক প্ৰসাৰিত হয়। চৌধুৰীয়ে উল্লেখ কৰে যে এই আঁচনিখনে সমগ্ৰ দেশতে বিশেষকৈ অনুসূচিত জাতি/অনুসূচিত জনজাতি, অন্যান্য পিছপৰা শ্ৰেণী (ঋণ হিতাধিকাৰীৰ ৫১ শতাংশ), আৰু মহিলা (ঋণ হিতাধিকাৰীৰ ৬৭ শতাংশ)কে ধৰি সমাজৰ বঞ্চিত শ্ৰেণীৰ বাবে আত্মনিয়োগৰ সুযোগ সৃষ্টি কৰিছে।

हिन्दुस्थान समाचार / Manoj Kumar Saikia