ৱাশ্বিংটন/তেহৰাণ, ২৪ মাৰ্চ (হি.স.)। বিগত মাহৰ ২৮ ফেব্ৰুৱাৰীৰ পৰা আৰম্ভ হোৱা অবিৰত যুদ্ধৰ মাজতে তেহৰানে মধ্যস্থতাকাৰীৰ জৰিয়তে ৱাশ্বিংটনৰ পৰা এটা বাৰ্তা লাভ কৰিছে। ইৰাণৰ বৈদেশিক মন্ত্ৰালয়ৰ এগৰাকী জ্যেষ্ঠ বিষয়াই সোমবাৰে কয় যে এই বাৰ্তাই আমেৰিকা আৰু ইৰাণৰ মাজত আলোচনাৰ সম্ভাৱ্য আৰম্ভণি হ’ব পাৰে। ইয়াৰ পূৰ্বে ৰাষ্ট্ৰপতি ড’নাল্ড ট্ৰাম্পে দুয়োখন দেশৰ মাজত চুক্তি সম্ভৱ বুলি ইংগিত দিছিল।
চিবিএছ নিউজৰ এক প্ৰতিবেদন অনুসৰি ইৰাণৰ বিষয়াগৰাকীয়ে কয় যে, আমি মধ্যস্থতাকাৰীৰ জৰিয়তে আমেৰিকাৰ পৰা কিছু অৰ্থপূৰ্ণ বাৰ্তা পাইছো। আমি সেইবোৰ পৰ্যালোচনা কৰি আছো। ইয়াৰ পূৰ্বে ট্ৰাম্পে ছ’চিয়েল মিডিয়াত ঘোষণা কৰিছিল যে “আমেৰিকা আৰু ইৰাণৰ মাজত শত্ৰুতা সম্পূৰ্ণৰূপে বন্ধ হোৱাৰ সন্দৰ্ভত অতি ভাল আৰু অৰ্থপূৰ্ণ আলোচনা হৈছে।”
ইয়াৰ পিছতে তেওঁ সাংবাদিকৰ আগত কয় যে দুয়োপক্ষই প্ৰায় ১৫টা বিষয়ত সহমতত উপনীত হৈছে। ইয়াৰ পিছত ইৰাণৰ বিষয়াসকলে কয় যে “তেওঁলোকে শান্তি বিচাৰে”। ৰাষ্ট্ৰপতি ট্ৰাম্পেও সপ্তাহৰ শেষৰ ফালে ইৰাণৰ প্ৰতি দিয়া ভাবুকি প্ৰত্যাহাৰ কৰে। তেওঁ কৈছিল যে যদি ইৰাণে ৪৮ ঘণ্টাৰ ভিতৰত হৰমুজ জলদ্বীপ মুকলি নকৰে তেন্তে ইয়াৰ বিদ্যুৎ কেন্দ্ৰসমূহ আক্ৰমণ কৰা হ’ব।
ইৰাণৰ বৈদেশিক মন্ত্ৰালয়ে প্ৰথমে দুয়োখন দেশৰ মাজত কোনো ধৰণৰ আলোচনা চলি থকা বুলি অস্বীকাৰ কৰিছিল। এতিয়া ট্ৰাম্পৰ বক্তব্যই আশাৰ সঞ্চাৰ কৰিছে যে সামৰিক সংঘাতৰ অন্ত পৰিব পাৰে। ইৰাণ আৰু আমেৰিকাৰ আনুষ্ঠানিক কূটনৈতিক সম্পৰ্ক নথকাটোও তাৎপৰ্যপূৰ্ণ। ইয়াৰ পিছতো তেওঁলোকে ঐতিহাসিকভাৱে পৰোক্ষভাৱে ইজনে সিজনৰ লগত যোগাযোগ কৰি আহিছে।
ট্ৰাম্পে সাংবাদিকৰ আগত কয় যে আমেৰিকাই ইৰাণৰ এজন শীৰ্ষ ব্যক্তিৰ সৈতে আলোচনাত মিলিত হৈছে, কিন্তু সৰ্বোচ্চ নেতা আয়াতুল্লাহ মোজতাবা খামেনেইৰ সৈতে নহয়। তেওঁ ব্যক্তিজনৰ নাম প্ৰকাশ কৰিবলৈ অস্বীকাৰ কৰে। আনকি ট্ৰাম্পে কয় যে ইৰাণে পাৰমাণৱিক অস্ত্ৰ নিৰ্মাণ নকৰিবলৈ সন্মত হৈছে। ইয়াৰ পূৰ্বে ট্ৰাম্পে ইৰাণে ইউৰেনিয়াম সমৃদ্ধি সম্পূৰ্ণৰূপে পৰিত্যাগ কৰিবলৈ জোৰ দিছিল। ইৰাণে দীৰ্ঘদিন ধৰি এই প্ৰস্তাৱ নাকচ কৰি আহিছে।
অৱশ্যে ইজৰাইল আমেৰিকা-ইৰাণৰ কোনো সম্ভাৱ্য চুক্তিৰ অংশ হ’ব নে নহয় সেয়া বৰ্তমান স্পষ্ট হোৱা নাই। ২৮ ফেব্ৰুৱাৰীত আমেৰিকা আৰু ইজৰাইলে ইৰাণৰ ওপৰত আক্ৰমণ চলাইছিল। ইফালে আমেৰিকাৰ বিষয়াসকলে কয় যে চোৰাংচোৱাৰ মূল্যায়নত হৰমুজ জলদ্বীপত কমেও এক ডজন ইৰাণৰ লেণ্ডমাইনৰ উপস্থিতি প্ৰকাশ পাইছে। সোমবাৰে আমেৰিকাৰ চেণ্ট্ৰেল কমাণ্ডে কয় যে ইৰাণৰ সৈতে যুদ্ধ আৰম্ভ হোৱাৰ পিছৰে পৰা ইৰাণৰ ১৪০খনতকৈও অধিক নৌসেনাৰ জাহাজকে ধৰি ৯ হাজাৰৰো অধিক ইৰাণৰ লক্ষ্যত আক্ৰমণ চলাইছে।
हिन्दुस्थान समाचार / অৰৱিন্দ
