ৱাশ্বিংটন/তেহৰাণ, ০২ মাৰ্চ (হি.স.)। ইৰাণে দেওবাৰে আমেৰিকা আৰু ইজৰাইলৰ ঘাটিত শ শ প্ৰতিশোধমূলক আক্ৰমণ চলোৱাত কুৱেইটত নিয়োজিত তিনিজন আমেৰিকান সেৱাৰ সদস্যৰ মৃত্যু হোৱাৰ লগতে আন পাঁচজন গুৰুতৰভাৱে আহত হয়। এই মৃত্যুৰ প্ৰতিশোধ লোৱাৰ প্ৰতিশ্ৰুতি দিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে।

ৱাশ্বিংটন পোষ্ট আৰু নিউয়ৰ্ক টাইমছত প্ৰকাশিত বাতৰি অনুসৰি নিহত সৈনিকসকল কুৱেইটত থকা আমেৰিকাৰ সামৰিক ঘাটিৰ। আমেৰিকাৰ কেন্দ্ৰীয় কমাণ্ডে (সেন্টকম) এক্স-পোষ্টত উল্লেখ কৰিছে যে আন কেইবাজনো জোৱান সামান্য আঘাতপ্ৰাপ্ত হৈছে। চেণ্টকমে কয় যে বৃহৎ যুদ্ধ অভিযান চলি আছে আৰু আমাৰ সঁহাৰিৰ প্ৰচেষ্টা চলি আছে। পৰিস্থিতি তৰল। পৰিয়ালৰ লোকক অৱগত কৰাৰ ২৪ ঘন্টাৰ পিছত মৃত লোকসকলৰ নাম প্ৰকাশ কৰা হ’ব।

আমেৰিকাৰ ৰাষ্ট্ৰপতি ড’নাল্ড ট্ৰাম্পে এটা ভিডিঅ’যোগে কয় যে, আমাৰ জাতিৰ বাবে চূড়ান্ত ত্যাগ কৰা প্ৰকৃত আমেৰিকান দেশপ্ৰেমিকসকলক হেৰুৱাই আমি শোক প্ৰকাশ কৰিছো। দুখৰ বিষয় যে তাৰ আগতে আৰু অধিক লোকৰ মৃত্যু হ'ব। এইটোৱেই পৰিস্থিতি। আমেৰিকাই তেওঁলোকৰ মৃত্যুৰ প্ৰতিশোধ ল'ব আৰু সভ্যতাৰ বিৰুদ্ধে যুদ্ধ চলোৱাৰ বাবে সন্ত্ৰাসবাদীক কঠোৰতম শাস্তি প্ৰদান কৰিব।

ইৰাণক কেতিয়াও পাৰমাণৱিক অস্ত্ৰ নিৰ্মাণ কৰাত বাধা দিয়াৰ লক্ষ্য প্ৰকাশ কৰে ট্ৰাম্পে। জুন মাহত তেওঁ ইৰাণৰ পাৰমাণৱিক স্থানত আক্ৰমণৰ নিৰ্দেশ দিছিল, যিবোৰ ধ্বংস হৈছিল। তেওঁ এতিয়া ইৰাণত শাসন ব্যৱস্থা সলনিৰ আহ্বান জনাইছে আৰু ইৰাণীসকলক তেওঁলোকৰ চৰকাৰ দখল কৰিবলৈ আহ্বান জনাইছে।

সংবাদ মাধ্যমৰ বাতৰি অনুসৰি, আয়াতুল্লাহ আলী খামেনেইৰ মৃত্যুৰ পিছত ইৰাণে আধা ডজন দেশৰ আমেৰিকাৰ সামৰিক ঘাটিক লক্ষ্য কৰি প্ৰতিশোধমূলক আক্ৰমণ চলোৱাৰ সময়ত এই মৃত্যুৰ ঘটনা সংঘটিত হয়। এই আক্ৰমণসমূহ ইৰাণৰ বিৰুদ্ধে আমেৰিকা-ইজৰাইলৰ যৌথ আক্ৰমণৰ পিছত সংঘটিত হৈছিল, যাক অপাৰেচন এপিক ফিউৰি বুলি অভিহিত কৰা হৈছিল, য'ত আকাশ, স্থল আৰু সাগৰীয় বোমাবৰ্ষণ কৰা হৈছিল।

আমেৰিকাৰ চেণ্ট্ৰেল কমাণ্ডৰ তথ্য অনুসৰি এই পৰ্যন্ত আমেৰিকান বাহিনীয়ে ১০০০ৰো অধিক লক্ষ্য ধ্বংস কৰিছে। ইয়াৰ ভিতৰত নৌসেনাৰ জাহাজ আৰু চাবমেৰিন, মিছাইল ছাইট, যোগাযোগ নেটৱৰ্ক, ইৰাণী ৰিভল্যুচনেৰী গাৰ্ডৰ কমাণ্ড এণ্ড কণ্ট্ৰল চেণ্টাৰ আদি অন্যতম। এজন জ্যেষ্ঠ বিষয়াই ইয়াক ইৰাণৰ ক্ষেপণাস্ত্ৰ আৰু ড্ৰ’নৰ ক্ষমতা দ্ৰুতগতিত নিৰ্মূল কৰাৰ এক “অতি আক্ৰমণাত্মক” কৌশল বুলি অভিহিত কৰে। অৱশ্যে সূত্ৰ অনুসৰি ইৰাণেও নিশাটোৰ ভিতৰতে কেইবা ডজনো মিছাইল আৰু আক্ৰমণাত্মক ড্ৰোন নিক্ষেপ কৰিছিল, যিবোৰক ট্ৰেক কৰা হৈছিল।

ইফালে ইৰাণৰ ইছলামিক ৰিভল্যুচনেৰী গাৰ্ড কৰ্পছে আমেৰিকাৰ বিমানবাহী জাহাজ আব্ৰাহাম লিংকনক আক্ৰমণ কৰাৰ দাবী উত্থাপন হৈছিল। কিন্তু চেণ্টকমে এই প্ৰতিবেদনসমূহ খাৰিজ কৰি কয় যে কেৰিয়াৰখনত কোনো আক্ৰমণ হোৱা নাই আৰু মিছাইলসমূহে ওচৰলৈ অহা নাই।

বিষয়াসকলে জনোৱা মতে, ইৰাণী শাসনৰ পৰা অহা ভাবুকি প্ৰতিহত কৰাৰ বাবে অভিযানক সহায় কৰিবলৈ বিমানবাহী জাহাজ আব্ৰাহাম লিংকনে বিমান উৎক্ষেপণ অব্যাহত ৰাখিছে।

हिन्दुस्थान समाचार / মনোজ কুমাৰ শইকীয়া