কাঠমাণ্ডু, ২৬ ফেব্ৰুৱাৰী (হি.স.)। নেপালত অহা ৫ মাৰ্চত হ’বলগীয়া সংসদীয় নিৰ্বাচনৰ পৰিপ্ৰেক্ষিতত নিৰ্বাচন আয়োগে গৃহ পৰিক্ৰমা মন্ত্ৰালয়ক নিৰ্দেশ দিছে যে ২৭ ফেব্ৰুৱাৰীৰ পৰা চূড়ান্ত ফলাফল ঘোষণা নোহোৱালৈকে অৰ্থাৎ ৭ মাৰ্চলৈকে সুৰাৰ বিক্ৰী, বিতৰণ আৰু সেৱনত সম্পূৰ্ণ নিষেধাজ্ঞা আৰোপ কৰিব লাগে।
ভোটদানৰ সময়ত কোনো ধৰণৰ নিষিদ্ধ কাৰ্যকলাপ ৰোধ কৰিবলৈ আৰু এনে কোনো উলংঘাৰ বিষয়ে তৎকালীনভাৱে আয়োগক অৱগত কৰিবলৈ গৃহ পৰিক্ৰমা মন্ত্ৰালয়ক অনুৰোধ জনোৱা হৈছে। আয়োগে গৃহ পৰিক্ৰমা মন্ত্ৰালয়লৈ পত্ৰ প্ৰেৰণ কৰি ২ মাৰ্চৰ দুপৰীয়া ১২:০০ বজাৰ পৰা আৰম্ভ হ’বলগীয়া নিৰ্বাচনী মৌনতাৰ সময়ছোৱাত নিৰ্বাচনী আচৰণ বিধি কঠোৰভাৱে পালন কৰাটো নিশ্চিত কৰিবলৈ সকলো মুখ্য জিলা বিষয়া (চিডিঅ’) আৰু নিৰাপত্তা সংস্থাক নিৰ্দেশ দিবলৈ আহ্বান জনাইছে।
আয়োগে লগতে উল্লেখ কৰে যে ৪ মাৰ্চৰ মাজনিশা ১২ বজাৰ পৰা ৫ মাৰ্চৰ সন্ধিয়ালৈকে সকলো ৰাজহুৱা আৰু ব্যক্তিগত বাহনৰ চলাচল নিষিদ্ধ কৰা হ’ব। কিন্তু এম্বুলেন্স, অগ্নিনিৰ্বাপক বাহিনীৰ ইঞ্জিন, মৃতদেহৰ গাড়ী, তেজ সঞ্চালন সেৱা, নিৰাপত্তা বাহন, আৰু বিদ্যুৎ, পানী, অনাময়, আৰু দূৰসংযোগ ৰক্ষণাবেক্ষণৰ সৈতে জড়িত অত্যাৱশ্যকীয় সেৱাৰ বাহনৰ অনুমতি দিয়া হ’ব। কূটনৈতিক মিছনৰ অন্তৰ্গত বাহন আৰু চৰকাৰী নিৰ্বাচনী পাছ থকা বাহনকো চলাচলৰ অনুমতি দিয়া হ’ব।
আয়োগে স্পষ্ট কৰি দিয়ে যে ভোটগ্ৰহণৰ দিনটোত ঘৰুৱা আৰু আন্তঃৰাষ্ট্ৰীয় বিমান সেৱা স্বাভাৱিকভাৱে চলিব। বৈধ টিকট থকা যাত্ৰীসকলক বিমান সংস্থা বা ব্যক্তিগত সেৱাই ব্যৱস্থা কৰা বাহনেৰে বিমানবন্দৰলৈ অহা-যোৱা কৰাৰ অনুমতি দিয়া হ’ব। নিৰ্বাচনৰ নিৰাপত্তা (পৰিচালনা) নিৰ্দেশনা, ২০৮২, আৰু প্ৰতিনিধি সদনৰ সদস্যৰ বাবে নিৰ্বাচন (ভোট) নিৰ্দেশনা, ২০৮২ অনুসৰি ভোটাৰসকলে ভোটাৰ আইডি কাৰ্ড বা নাগৰিকত্বৰ প্ৰমাণ পত্ৰ, ৰাষ্ট্ৰীয় পৰিচয় পত্ৰ, পাছপ’ৰ্ট, মাটিৰ মালিকীস্বত্বৰ প্ৰমাণ পত্ৰ, বা ড্ৰাইভিং লাইচেন্স আদি বৈধ চিনাক্তকৰণ নথি-পত্ৰ ভোটদানৰ সময়ত লগত লৈ আনিব লাগিব।
নিৰাপত্তাৰক্ষী আৰু ভোটগ্ৰহণ বিষয়াসকলক নিৰ্দেশ দিয়া হৈছে যে নিৰ্বাচনী তালিকাত নামভৰ্তি কৰা যোগ্য ভোটাৰসকলক ওপৰৰ যিকোনো নথি দাখিল কৰাৰ লগে লগে ভোটদানৰ অনুমতি দিয়া হৈছে। আয়োগৰ সচিবালয়ত বাহন অনুমতি পত্ৰ পদ্ধতি, ২০৮২ অনুসৰি ভোটগ্ৰহণৰ দিনটোৰ বাবে বাহন পাছ প্ৰদানৰ বাবে এটা পাছ বিতৰণ ইউনিট স্থাপন কৰা হ'ব বুলিও উল্লেখ কৰে।এই ইউনিটত নিৰ্বাচন আয়োগৰ দুজন বিষয়া আৰু কাঠমাণ্ডু জিলা প্ৰশাসন কাৰ্যালয়ৰ দুগৰাকী বিষয়াক নিযুক্তি দিয়া হ'ব।
हिन्दुस्थान समाचार / মনোজ কুমাৰ শইকীয়া
