নতুন দিল্লী, ০৮ জানুৱাৰী (হি.স.)। উত্তৰ ভাৰত বৰ্তমান তীব্ৰ শীত আৰু ঘন কুঁৱলীৰ মাজত ধুৱলী কুৱলী হৈ পৰিছে, যাৰ প্ৰত্যক্ষ প্ৰভাৱ ৰে’ল আৰু বিমান পৰিবহণত পৰিছে। ৰাষ্ট্ৰীয় ৰাজধানী দিল্লীত কুঁৱলীৰ ফলত কেইবাখনো বিমান সেৱা পলম হোৱাৰ লগতে বিমান চলাচলতো ব্যাহত হৈছে।
বুধবাৰে পুৱা দিল্লীৰ ইন্দিৰা গান্ধী আন্তঃৰাষ্ট্ৰীয় বিমানবন্দৰত ঘন কুঁৱলীৰ বাবে বিমান পৰিবহণ ব্যাহত হৈ পৰে। দৃশ্যমানতা ৫০ মিটাৰৰ তললৈ নামি অহাৰ ফলত ৭খন বিমান বাতিল হোৱাৰ বিপৰীতে ১০০খনতকৈও অধিক আন্তঃৰাষ্ট্ৰীয় আৰু ঘৰুৱা বিমান ঘণ্টাৰ পিছত ঘণ্টা পলম হয়। দৃশ্যমানতা কম হোৱাৰ বাবে পাইলটসকলে টেক অফ আৰু লেণ্ডিঙৰ ক্ষেত্ৰত অসুবিধাৰ সন্মুখীন হৈছিল।
বিভিন্ন ৰাজ্যৰ পৰা ৰাষ্ট্ৰীয় ৰাজধানীলৈ অহা বহু বৃহৎ ৰে’ল ঘণ্টাৰ পিছত ঘণ্টা দেৰিকৈ চলি থকাৰ ফলত যাত্ৰীসকলৰ অসুবিধাৰ সৃষ্টি হৈছে। ইণ্ডিগ’ৰ দিল্লী-অমৃতসৰ বিমান ৬ই-৫১০৩ বাতিল। স্পাইচজেটৰ দিল্লী-বাৰানসী বিমান এছজি-৮৭১৮ আৰু দিল্লী-শ্ৰীনগৰ বিমান এছজি-৬৬১ বাতিল কৰা হয়। কিছু বিমান পলম হোৱাত এয়াৰ ইণ্ডিয়া এক্সপ্ৰেছৰ দিল্লী-অমৃতসৰ বিমান আইএক্স-১৬৮৩ আৰু এয়াৰ ইণ্ডিয়াৰ দিল্লী-গুৱাহাটী বিমান আইএক্স-১০৩০ বিমানো বাতিল কৰা হয় ।
ইণ্ডিগ’ই এক্সত বিমান যাত্ৰীসকলৰ বাবে ভ্ৰমণ পৰামৰ্শ জাৰি কৰিছে।কোম্পানীটোৱে উল্লেখ কৰিছে যে প্ৰয়াগৰাজত কম দৃশ্যমানতা আৰু কুঁৱলীৰ ফলত বিমানৰ সময়সূচীত প্ৰভাৱ পৰিব পাৰে। আমি বতৰক নিবিড়ভাৱে নিৰীক্ষণ কৰি আছো আৰু আপুনি নিৰাপদে আৰু মসৃণভাৱে গন্তব্যস্থানত উপনীত হোৱাটো নিশ্চিত কৰিবলৈ আমাৰ সকলো চেষ্টা কৰিছো।
বিমান সংস্থাটোৱে লগতে কয়, আমি আপোনালোকক আমাৰ ৱেবছাইট বা এপৰ জৰিয়তে আপোনাৰ বিমানৰ অৱস্থা পৰীক্ষা কৰি থাকিবলৈ অনুৰোধ জনাইছো। অনুগ্ৰহ কৰি নিশ্চিত হওক যে আমাৰ দলসমূহে আপোনাক প্ৰতিটো খোজতে সহায় আৰু সমৰ্থন কৰিবলৈ ইয়াত আছে। আমি আশা কৰোঁ আকাশ পৰিষ্কাৰ হ'ব আৰু আমি অতি সোনকালে আমাৰ নিয়মীয়া সময়সূচীলৈ ঘূৰি আহিম। আপোনাৰ ধৈৰ্য্য আৰু বুজাবুজিৰ বাবে ধন্যবাদ।
हिन्दुस्थान समाचार / মনোজ কুমাৰ শইকীয়া
