বাৰাণসী (উত্তৰ প্ৰদেশ), ০৮ নৱেম্বৰ (হি.স.)। প্ৰধানমন্ত্ৰী নৰেন্দ্ৰ মোদীয়ে আজি ইয়াত চাৰিখন নতুন বন্দে ভাৰত এক্সপ্ৰেছ ৰে’লৰ ফ্লেগ অফ কৰে। নতুন বন্দে ভাৰত ৰে’লে যাত্ৰাৰ সময় হ্ৰাস কৰিব, আঞ্চলিক গতিশীলতা বৃদ্ধি কৰিব, আৰু কেইবাখনো ৰাজ্যৰ পৰ্যটন আৰু বাণিজ্য বৃদ্ধি কৰিব। প্ৰধানমন্ত্ৰী নৰেন্দ্ৰ মোডীৰ আগমনৰ লগে লগে সমগ্ৰ বাৰাণসী ৰেল ষ্টেচনত হৰ হৰ মহাদেৱ ধ্বনিৰে প্ৰতিধ্বনিত হয়।

পুৱা প্ৰায় ৮:৪৮ বজাত প্ৰধানমন্ত্ৰীয়ে দেশবাসীক চাৰিখন বন্দে ভাৰত এক্সপ্ৰেছ ৰে’ল উপহাৰ দিয়ে। বাৰাণসী-খাজুৰাহো, লক্ষ্ণৌ-চাহাৰানপুৰ, ফিৰোজপুৰ-দিল্লী আৰু এৰ্নাকুলাম-বেংগালুৰুৰ মাজত চলিব নতুন বন্দে ভাৰত এক্সপ্ৰেছ ৰে’ল। বাৰাণসী-খাজুৰাহো বন্দে ভাৰত ৰে’লসমূহে বৰ্তমান চলি থকা বিশেষ ৰে’লৰ তুলনাত প্ৰায় দুঘণ্টা ৪০ মিনিট সময় ৰাহি কৰিব। ই দেশৰ কিছুমান শ্ৰদ্ধাৰ ধৰ্মীয় আৰু সাংস্কৃতিক স্থান বাৰাণসী, প্ৰয়াগৰাজ, চিত্ৰকূট, আৰু খাজুৰাহোক সংযোগ কৰিব। খাজুৰাহোক ইউনেস্ক’ৰ বিশ্ব ঐতিহ্য ক্ষেত্ৰ হিচাপে ঘোষণা কৰা হৈছে।

লক্ষ্ণৌ-চাহাৰনপুৰ বন্দে ভাৰতে প্ৰায় সাত ঘণ্টা ৪৫ মিনিটত যাত্ৰা সম্পূৰ্ণ কৰিব, যাৰ ফলত প্ৰায় এঘণ্টাৰ যাত্ৰাৰ সময় ৰাহি হ’ব। ইয়াৰ ফলত লক্ষ্ণৌ, সীতাপুৰ, শ্বাহজাহানপুৰ, বৰেলী, মোৰাদাবাদ, বিজনোৰ, আৰু চাহাৰনপুৰৰ পৰা অহা যাত্ৰীসকলে যথেষ্ট উপকৃত হ’ব, আৰু ৰুৰকী হৈ হৰিদ্বাৰলৈ যোৱাৰ সুবিধাও উন্নত হ’ব। এই সেৱাই মধ্য আৰু পশ্চিম উত্তৰ প্ৰদেশত মসৃণ আৰু দ্ৰুত আন্তঃনগৰ ভ্ৰমণ নিশ্চিত কৰি সংযোগ আৰু আঞ্চলিক উন্নয়ন বৃদ্ধিৰ ক্ষেত্ৰত গুৰুত্বপূৰ্ণ ভূমিকা পালন কৰিব।

ফিৰোজপুৰ-দিল্লী বন্দে ভাৰত এই পথৰ আটাইতকৈ দ্ৰুততম ৰে’ল হ’ব, মাত্ৰ ছয় ঘন্টা ৪০ মিনিটত যাত্ৰা সম্পূৰ্ণ কৰিব। ইয়াৰ জৰিয়তে ৰাষ্ট্ৰীয় ৰাজধানী দিল্লী আৰু পঞ্জাবৰ মূল চহৰ যেনে ফিৰোজপুৰ, বাথিণ্ডা, আৰু পাটিয়ালাৰ মাজত সংযোগ শক্তিশালী হ’ব। এই ৰে’লখনে বাণিজ্য, পৰ্যটন, আৰু কৰ্মসংস্থাপনৰ সুযোগ বৃদ্ধি কৰিব বুলি আশা কৰা হৈছে।

এৰ্নাকুলাম-বেংগালুৰু বন্দে ভাৰত এক্সপ্ৰেছে দক্ষিণ ভাৰতত যাত্ৰাৰ সময় দুঘণ্টাৰো অধিক হ্ৰাস কৰিব। এই যাত্ৰাত আঠ ঘণ্টা ৪০ মিনিট সময় লাগিব। এই বন্দে ভাৰত এক্সপ্ৰেছৰ দ্বাৰা প্ৰধান তথ্য-প্ৰযুক্তি আৰু বাণিজ্যিক কেন্দ্ৰসমূহ সংযোগ কৰা হ’ব। এই পথটোৱে কেৰেলা, তামিলনাডু, আৰু কৰ্ণাটকৰ মাজত অৰ্থনৈতিক কাৰ্যকলাপ আৰু পৰ্যটন বৃদ্ধি কৰিব।

বাৰাণসীৰ পৰা খাজুৰাহোলৈ নতুন বন্দে ভাৰত এক্সপ্ৰেছ বহু দিশত বিশেষ। এয়া আঠ সংখ্যক বন্দে ভাৰত। ইয়াৰ কাৰ্য্যকলাপ আধ্যাত্মিকভাৱেও তাৎপৰ্যপূৰ্ণ। প্ৰধানমন্ত্ৰী মোদীয়ে শিৱযোগৰ সময়ত ভগৱান শিৱ নগৰৰ পৰা (কাশী) শিৱৰ বাসগৃহ (মতাংগেশ্বৰ মহাদেৱ মন্দিৰ), খাজুৰাহোলৈ ৰাওনা কৰে।

বাৰাণসীত থকা ইণ্ডিয়ান ৰেলৱে ব’ৰ্ডৰ তথ্য আৰু প্ৰচাৰৰ কাৰ্যবাহী সঞ্চালক দিলীপ কুমাৰে কয় যে, ইতিমধ্যে সমগ্ৰ দেশতে আমাৰ ১৫৬ খন বন্দে ভাৰত এক্সপ্ৰেছ সেৱা আছে আৰু আঠখন নতুন সেৱা সংযোজন হোৱাৰ লগে লগে এতিয়া মুঠ ১৬৪ টা হৈ পৰিল।

हिन्दुस्थान समाचार / অৰৱিন্দ