উলানবাটাৰ, ১৭ অক্টোবৰ (হি.স.)। চীনৰ চুবুৰীয়া দেশ মংগোলিয়াৰ প্ৰধানমন্ত্ৰী গোম্বোজাভিন জান্দনছাটাৰক শুকুৰবাৰে কাৰ্যভাৰৰ পৰা অপসাৰণ কৰা হয়। প্ৰতিনিধি সদনৰ তিনি চতুৰ্থাংশৰ উপস্থিতিত তেওঁৰ বিৰুদ্ধে একসত্তৰজন সাংসদে তেওঁক বৰ্খাস্ত কৰাৰ সপক্ষে ভোটদান কৰে। ব্যাপক দুৰ্নীতি আৰু দুৰ্বল ঘৰুৱা অৰ্থনীতিক লৈ জনসাধাৰণৰ ক্ষোভৰ মাজতে যোৱা কিছু বছৰত মংগোলীয় ৰাজনীতিত অস্থিৰতাৰ ঢৌৰ সৃষ্টি হৈছে। শুকুৰবাৰে মংগোলীয় সংসদে এটা প্ৰস্তাৱ গৃহীত কৰি সংবাদ মাধ্যমক অৱগত কৰে। আপাততঃ তেওঁৰ উত্তৰাধিকাৰী নিযুক্তি নোহোৱালৈকে জান্দনছাটাৰ ভাৰপ্ৰাপ্ত প্ৰধানমন্ত্ৰী হিচাপে কাৰ্যভাৰ গ্ৰহণ কৰি থাকিব।

শাসকীয় মংগোলীয় পিপলছ পাৰ্টিৰ ভিতৰৰ আভ্যন্তৰীণ বিবাদো প্ৰধানমন্ত্ৰী জান্দনছাটাৰৰ পদত্যাগৰ কাৰক বুলি ধাৰণা কৰা হৈছে। এই ৰাজনৈতিক অস্থিৰতা এনে সময়তে আহিছে যেতিয়া অহা বছৰৰ বাজেট এতিয়াও সংসদে গৃহীত হোৱা নাই। ইফালে, বাজেটত দৰমহা বৃদ্ধিৰ দাবীত এই সপ্তাহত শিক্ষকসকলে ধৰ্মঘট কৰিছিল, লগতে চিকিৎসকসকলেও ধৰ্মঘটৰ ভাবুকি দিছে।

মন কৰিবলগীয়া যে ৫৫ বছৰীয়া গোম্বোজাভিন জান্দনছাটাৰে জুন মাহত তেতিয়াৰ প্ৰধানমন্ত্ৰী লুভছানামছৰেন অয়ুন এৰডেনক নিৰ্বাচনত পৰাস্ত কৰি ক্ষমতালৈ আহিছিল। কিন্তু মাত্ৰ কেইমাহমানৰ ভিতৰতে দুজন প্ৰধানমন্ত্ৰীক চাকৰিৰ পৰা বৰ্খাস্ত কৰিলে দেশত নীতিগত অনিশ্চয়তাৰ সৃষ্টি হ’ব আৰু সম্পদ সমৃদ্ধ এইখন দেশত বিনিয়োগকাৰীৰ আগ্ৰহ হ্ৰাস পাব।

অৱশ্যে জান্দনছাটাৰৰ সলনি কাক বাছনি কৰা হ’ব সেয়া এতিয়াও স্পষ্ট হোৱা নাই। ইফালে মংগোলিয়াৰ ৰাষ্ট্ৰপতি উখনা খুৰেলছুখে পৰৱৰ্তী প্ৰধানমন্ত্ৰীক মনোনীত কৰাৰ সম্ভাৱনা আছে, যাৰ বাবে ৰাজ্য গ্ৰেট খুৰাল বা সংসদৰ অনুমোদনৰ প্ৰয়োজন হ’ব। তেতিয়ালৈকে তেওঁক ভাৰপ্ৰাপ্ত প্ৰধানমন্ত্ৰী হিচাপে থাকিবলৈ নিৰ্দেশ দিয়া হৈছে।

हिन्दुस्थान समाचार / অৰৱিন্দ