মনোৰঞ্জন জগতৰ পৰা আহিছে এক অতি দুখজনক খবৰ। দূৰদৰ্শনৰ ঐতিহাসিক ধাৰাবাহিক মহাভাৰতত কৰ্ণৰ স্মৰণীয় চিত্ৰণেৰে দৰ্শকৰ হৃদয়ত এক বিশেষ স্থান খোদিত কৰা জনপ্ৰিয় টিভি অভিনেতা পংকজ ধীৰ আৰু নাই। বুধবাৰে পুৱা প্ৰায় ১১:৩০ বজাত শেষ নিশ্বাস ত্যাগ কৰে ৬৮ বছৰীয়া অভিনেতাজনে। তেওঁৰ মৃত্যুৰ খবৰে সমগ্ৰ উদ্যোগ আৰু তেওঁৰ অনুৰাগীক শোকত ডুবাই পেলাইছে।
খবৰ অনুসৰি কিছুদিনৰ পৰা পংকজ ধীৰ গুৰুতৰভাৱে অসুস্থ হৈ আছিল। চলিত বৰ্ষৰ মাৰ্চ মাহত তেওঁৰ স্বাস্থ্যৰ অৱনতি ঘটাত চিকিৎসালয়ত ভৰ্তি হৈছিল। অৱশ্যে সেই সময়ত তেওঁৰ স্বাস্থ্য সন্দৰ্ভত কোনো আনুষ্ঠানিক বক্তব্য প্ৰদান কৰা নাছিল তেওঁৰ পৰিয়ালে।
পংকজ ধীৰৰ মৃত্যুৰ কথা নিশ্চিত কৰিছে তেওঁৰ ঘনিষ্ঠ বন্ধু মহাভাৰতত অৰ্জুনৰ চৰিত্ৰত অভিনয় কৰা ফিৰোজ খানে । সংবাদ মাধ্যমৰ সৈতে হোৱা এক সাক্ষাৎকাৰত তেওঁ কয় যে, এয়া সঁচা যে পংকজ আৰু নাই। মই এজন অতি ভাল বন্ধুক হেৰুৱাইছো। তেওঁ কেৱল এজন মেধাৱী অভিনেতা নাছিল, তাতোকৈয়ো বেছি আছিল এজন আচৰিত মানুহ। মই গভীৰভাৱে স্তম্ভিত আৰু বাকৰুদ্ধ হৈ পৰিছো। তেওঁ সঁচাকৈয়ে আছিল এজন আচৰিত ব্যক্তি।
পংকজ ধীৰে তেওঁৰ দীৰ্ঘদিনীয়া জীৱনত টেলিভিছন আৰু চলচ্চিত্ৰ উভয়তে শক্তিশালী ভূমিকা পালন কৰিছিল। মহাভাৰতত কৰ্ণক তেওঁৰ আৱেগিক আৰু তীব্ৰ চিত্ৰণে তেওঁক ঘৰুৱা নাম কৰি তুলিছিল। বৰ্ডাৰ, বাহুবলী: দ্য বিগিনিং (হিন্দী ডাব সংস্কৰণত কণ্ঠ), চন অৱ চৰ্দাৰ, আৰু কৰ্মযোগ আদি ছবিতো তেওঁ উল্লেখযোগ্য ভূমিকা পালন কৰিছিল।
টেলিভিছন জগতলৈ তেওঁৰ অৱদানও অমলিন হৈ আহিছে। তেওঁ চন্দ্ৰকান্তা, বেতাল পাচিছি, বানু মেইন তেৰি দুলহান, কায়ামত, দেৱন কে দেৱ মহাদেৱ আদি জনপ্ৰিয় অনুষ্ঠানত কাম কৰিছিল। তেওঁৰ গভীৰ কণ্ঠ আৰু আকৰ্ষণীয় পৰ্দাৰ উপস্থিতিয়ে তেওঁক এক সুকীয়া পৰিচয় দিছিল। পংকজ ধীৰে ইহসংসাৰত পত্নী আৰু অভিনেতা পুত্ৰ নিখিল ধীৰক এৰি থৈ যায়, যিয়ে বলীউডৰ “ৰেডি”, “শ্বুটআউট এট ৱাডালা”, “শ্বেৰশ্বাহ” আদি ছবিত অভিনয় কৰিছে।
তেওঁৰ মৃত্যুৰ খবৰ শুনি বহু উদ্যোগৰ তাৰকাই ছ’চিয়েল মিডিয়াত শোক প্ৰকাশ কৰিছে। প্ৰত্যেকেই নিজৰ নিজৰ ধৰণেৰে এই কিংবদন্তি শিল্পীগৰাকীক শ্ৰদ্ধাঞ্জলি জনাইছে। পংকজ ধীৰ হয়তো আৰু এই পৃথিৱীত নাথাকিব, কিন্তু তেওঁৰ স্মৃতি আৰু অৱদান ভাৰতীয় মনোৰঞ্জনৰ ইতিহাসত চিৰদিনৰ বাবে অমৰ হৈ থাকিব।
हिन्दुस्थान समाचार / মনোজ কুমাৰ শইকীয়া
