গুৱাহাটী, ১৮ ছেপ্টেম্বৰ (হি.স.)। মহাপুৰুষ শ্ৰীমন্ত শংকৰদেৱৰ বৈকুণ্ঠ প্ৰয়াণৰ সৈতে ঐতিহাসিকভাৱে জড়িত কোচবিহাৰৰ পৱিত্ৰ শ্ৰী শ্ৰী মধুপুৰ ধাম সত্ৰত আজি কিছু সময় অতিবাহিত কৰে অসমৰ সামাজিক ন্যায় আৰু সবলীকৰণ, ভূমি সংৰক্ষণ আদি বিভাগৰ মন্ত্ৰী অশ্বিনী ৰায় সৰকাৰে। মধুপুৰ ধামত উপস্থিত হৈ মন্ত্ৰীগৰাকীয়ে গুৰুজনাৰ প্ৰতি গভীৰ শ্ৰদ্ধা নিবেদন কৰে।
সত্ৰখনৰ পৱিত্ৰ আৰু আধ্যাত্মিক পৰিৱেশত কিছু সময় অতিবাহিত কৰি তেওঁ মহাপুৰুষ শ্ৰীমন্ত শংকৰদেৱৰ মহান জীৱন-দৰ্শন, একশৰণ নামধৰ্মৰ বাণী তথা মানৱতা, ভাতৃত্ববোধ আৰু সামাজিক সমন্বয়ৰ আদৰ্শ স্মৰণ কৰে। এই উপলক্ষে মন্ত্ৰীগৰাকীয়ে কয়, “মহাপুৰুষ শ্ৰীমন্ত শংকৰদেৱৰ স্মৃতিবিজড়িত এই পৱিত্ৰ ভূমিত উপস্থিত হোৱাটো মোৰ বাবে কেৱল এক যাত্ৰা নহয়, এয়া এক গভীৰ আধ্যাত্মিক অনুভৱ। গুৰুজনাৰ পদধূলিৰে পৱিত্ৰ হোৱা এই ভূমিৰ স্পৰ্শই মন-প্ৰাণক এক অনন্য শান্তি আৰু আত্মিক উপলব্ধিৰে সমৃদ্ধ কৰিলে।” তেওঁ লগতে কয়, “গুৰুজনাৰ আদৰ্শ কোনো এটা সময়, অঞ্চল বা সমাজৰ মাজতে সীমাবদ্ধ নহয়।
একতা, ভাতৃত্ববোধ, মানৱতা আৰু আধ্যাত্মিকতাৰ যি মহান বাণী তেওঁ আমাক দি গৈছে, সেয়া আজিও সমানেই প্ৰাসংগিক। মধুপুৰ ধাম সত্ৰ সেই চিৰন্তন আদৰ্শৰ এক জীৱন্ত স্মৃতিচিহ্ন।” মন্ত্ৰীগৰাকীৰ এই যাত্ৰাত পশ্চিমবংগৰ সন্মানীয় বিধায়ক সুকুমাৰ ৰয় ডাঙৰীয়াই সংগ দিয়ে। দুয়োগৰাকীয়ে মধুপুৰ ধাম সত্ৰৰ ঐতিহাসিক আৰু সাংস্কৃতিক গুৰুত্বৰ বিষয়ে মত-বিনিময় কৰে। “গুৰুজনাৰ আদৰ্শক হৃদয়ত ধাৰণ কৰি এখন অধিক মানৱীয়, ঐক্যবদ্ধ আৰু সমন্বিত সমাজ গঢ়ি তোলাই হ’ব তেওঁৰ প্ৰতি আমাৰ প্ৰকৃত শ্ৰদ্ধাঞ্জলি,” –মন্ত্ৰীগৰাকীয়ে কয়।
হিন্দুস্থান সমাচাৰ / আলোক চক্ৰৱৰ্তী
