নতুন দিল্লী, ০৮ এপ্ৰিল (হি.স.)। কেন্দ্ৰীয় চৰকাৰে অৰুণাচল প্ৰদেশৰ দুটা জলবিদ্যুৎ প্ৰকল্পত বিনিয়োগৰ অনুমোদন জনাইছে। ইয়াৰ ভিতৰত আঞ্জাৱ জিলাৰ ১২০০ মেগাৱাট কলাই-দ্বিতীয় জলবিদ্যুৎ প্ৰকল্প আৰু অৰুণাচল প্ৰদেশৰ কমলে, ক্ৰা দাদি আৰু কুৰুং কুমেয় জিলাত ১৭২০ মেগাৱাট কমলা জলবিদ্যুৎ প্ৰকল্প।

প্ৰধানমন্ত্ৰী নৰেন্দ্ৰ মোডীৰ অধ্যক্ষতাত অর্থনৈতিক পৰিক্ৰমা কেবিনেট কমিটীয়ে এই বিনিয়োগত অনুমোদন জনায়৷ কেন্দ্ৰীয় মন্ত্ৰী অশ্বিনী বৈষ্ণৱে ৰাষ্ট্ৰীয় সংবাদ মাধ্যম কেন্দ্ৰত অনুষ্ঠিত এক সংবাদমেলত এই সিদ্ধান্তৰ কথা ঘোষণা কৰে।

প্ৰথমটো প্ৰকল্পৰ বাবে ১৪,১০৫.৮৩ কোটি টকা ব্যয় হ’ব বুলি অনুমান কৰা হৈছে আৰু ৭৮ মাহত সম্পূৰ্ণ হোৱাৰ কথা। দ্বিতীয়টো প্ৰকল্পৰ বাবে ২৬,০৬৯.৫০ কোটি টকা ব্যয় হ’ব বুলি অনুমান কৰা হৈছে আৰু ৯৬ মাহত সম্পূৰ্ণ হ’ব।

কলাই-দ্বিতীয় জলবিদ্যুৎ প্ৰকল্পৰ পৰা বছৰি ৪৮৫২.৯৫ মেইউ (মিলিয়ন ইউনিট) শক্তি উৎপাদন হোৱাৰ সম্ভাৱনা আছে। লোহিত অৱবাহিকাৰ প্ৰথমটো জলবিদ্যুৎ প্ৰকল্প হিচাপে ই ৰাজ্যৰ বিদ্যুৎ যোগান শক্তিশালী কৰিব, শীৰ্ষ চাহিদা ব্যৱস্থাপনাত সহায় কৰিব, আৰু ৰাষ্ট্ৰীয় গ্ৰীডৰ ভাৰসাম্য ৰক্ষাত অৰিহণা যোগাব।

কেন্দ্ৰীয় চৰকাৰে সহায়ক আন্তঃগাঁথনিৰ অধীনত পথ, দলং, আৰু সংশ্লিষ্ট সংবহন লাইন নিৰ্মাণৰ বাবে বাজেট সহায় হিচাপে ৫৯৯.৮৮ কোটি টকা আগবঢ়াব, ইয়াৰ উপৰিও ৰাজ্যৰ ইকুইটি অংশীদাৰিত্বৰ বাবে ৭৫০ কোটি ₹ৰ কেন্দ্ৰীয় আৰ্থিক সাহায্য প্ৰদান কৰিব।

কমলা জলবিদ্যুৎ প্ৰকল্পৰ জৰিয়তে ৬৮৭০ এম ইউ শক্তি উৎপাদন হোৱাৰ সম্ভাৱনা আছে। এই প্ৰকল্পৰ পৰা উৎপাদিত শক্তিয়ে অৰুণাচল প্ৰদেশ ৰাজ্যৰ বিদ্যুৎ যোগানৰ পৰিস্থিতি শক্তিশালী কৰিব, শীৰ্ষ চাহিদা ব্যৱস্থাপনাত সহায় কৰিব, ৰাষ্ট্ৰীয় গ্ৰীড ভাৰসাম্য ৰক্ষাত অৰিহণা যোগাব, আৰু ব্ৰহ্মপুত্ৰ উপত্যকাত বান নিয়ন্ত্ৰণত লাভৱান হ’ব।

এন এইচ পি চি লিমিটেড আৰু অৰুণাচল প্ৰদেশ চৰকাৰৰ যৌথ উদ্যোগ কোম্পানীৰ জৰিয়তে ৰূপায়ণ কৰিব কমলা প্ৰকল্প। ভাৰত চৰকাৰে বান নিয়ন্ত্ৰণ উপাদানৰ বাবে ৪৭৪৩.৯৮ কোটি টকা আৰু সহায়ক আন্তঃগাঁথনিৰ বাবে ১৩৪০ কোটি টকা আগবঢ়াব ।

हिन्दुस्थान समाचार / মনোজ কুমাৰ শইকীয়া