গুৱাহাটী, ০৮ এপ্ৰিল (হি.স.)। বিধানসভা নিৰ্বাচনৰ ভোটগ্ৰহণ প্ৰক্ৰিয়া সম্পন্ন কৰাৰ অৰ্থে কামৰূপ (মেট্ৰ’) জিলাৰ গুৱাহাটীকে ধৰি পাঁচটা বিধানসভা সমষ্টিৰ ১২১৮টা ভোটকেন্দ্ৰৰ বাবে ইভিএম, ভিভিপিএট মেচিন, আৰু অন্যান্য সা-সামগ্ৰী লৈ বুধবাৰে পুৱা ১০ হাজাৰৰো অধিক নিৰ্বাচনী কৰ্মী ৰাওনা হয়।
গুৱাহাটীত কামৰূপ (মেট্ৰ’)ৰ জিলা উপায়ুক্ত তথা জিলা নিৰ্বাচনী বিষয়া স্বপ্নীল পালে কয় যে জিলাখনত মুঠ ১২১৮টা ভোটকেন্দ্ৰ আছে। ইয়াৰ ভিতৰত দিছপুৰত ২৭২টা, ডিম’ৰিয়াত ২৬২টা, নিউ গুৱাহাটীত ২১৯টা, গুৱাহাটী চেণ্ট্ৰেলত ২১৮টা, জালুকবাৰীত ২৪৭টা ভোটকেন্দ্ৰ আছে । জিলা নিৰ্বাচন বিষয়াগৰাকীয়ে উল্লেখ কৰে যে প্ৰতিটো ভোটগ্ৰহণ কেন্দ্ৰত এটা আদৰ্শ ভোটগ্ৰহণ কেন্দ্ৰ স্থাপন কৰা হৈছে। ইফালে ভোটগ্ৰহণৰ বাবে মণিৰাম দেৱান বাণিজ্য কেন্দ্ৰত ভোটদান সামগ্ৰী সহজ বিতৰণৰ বাবে কেন্দ্ৰীয় বিতৰণ আৰু অভ্যৰ্থনা কেন্দ্ৰ স্থাপন কৰা হৈছে।
তেওঁ উল্লেখ কৰে যে কামৰূপ (মেট্ৰ’) জিলাত মুঠ ১,০৫৫,২৮৮ জন ভোটাৰ আছে। ইয়াৰে ৫০৭,৮৫৭ জন পুৰুষ, ৫৪৭,৪০০ মহিলা, আৰু ৩১ জন তৃতীয় লিংগৰ ভোটাৰ।
জিলাখনৰ মুঠ ১২০টা ভোটকেন্দ্ৰ মহিলাৰ দ্বাৰা পৰিচালিত হ’ব । ইয়াৰে ২১ টা দিছপুৰত, ৯ টা ডিমৰীয়াত, ৩০ টা নতুন গুৱাহাটীত, ৩৯ টা গুৱাহাটী চেণ্ট্ৰেলত, ২১ টা জালুকবাৰী সমষ্টিত আছে । এইবাৰ এই পাঁচটা সমষ্টিত মুঠ ২৫ গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াইছে।
জিলা নিৰ্বাচনী বিষয়াগৰাকীয়ে কয় যে সমগ্ৰ নিৰ্বাচনী কাৰ্যসূচীৰ বাবে ১০ হাজাৰৰো অধিক ভোটগ্ৰহণ কৰ্মী নিয়োগ কৰা হৈছে। তেওঁলোকে প্ৰতিটো স্তৰতে ফলপ্ৰসূ সমন্বয় আৰু পৰিচালনা নিশ্চিত কৰিব। নিৰাপত্তাও বৃদ্ধি কৰা হৈছে। আইন-শৃংখলা বজাই ৰাখিবলৈ প্ৰতিটো ভোটকেন্দ্ৰত আৰক্ষী জোৱান মোতায়েন কৰা হৈছে। জিলা দণ্ডাধীশ স্বপ্নীল পালে আশা প্ৰকাশ কৰে যে এই সকলোবোৰ ব্যৱস্থাই জিলাখনত স্বচ্ছ, নিকা, মুক্ত, আৰু স্বচ্ছ ভোটদান নিশ্চিত কৰিব।
হিন্দুস্থান সমাচাৰ / অৰৱিন্দ
