গুৱাহাটী, ০৯ মাৰ্চ (হি.স.)। চাইবাৰ অপৰাধ ৰোধৰ ক্ষেত্ৰত এক বৃহৎ অগ্ৰগতি হিচাপে অসম আৰক্ষীৰ চি আই ডি বিভাগৰ চাইবাৰ আৰক্ষী থানাই গ্ৰেপ্তাৰ কৰিছে ৫ জন যুৱকক। চি আই ডি অসমে আজি প্ৰকাশ কৰা অনুসৰি যোৱা দেওবাৰে কামৰূপ জিলাৰ একাধিক স্থানত সমন্বিত অভিযান চলাই এই পাঁচজন যুৱকক গ্ৰেপ্তাৰ কৰা হৈছিল। চাইবাৰ জালিয়াতি, চিম কাৰ্ড অবৈধ ক্ৰয় আৰু বিতৰণ, ব্যক্তিগত নথি-পত্ৰৰ অপব্যৱহাৰ কৰি আৰ্থিক জালিয়াতিৰ বাবে একাউণ্ট সৃষ্টিৰ সৈতে জড়িত নেটৱৰ্কক লক্ষ্য কৰি এই অভিযান চলাইছিল ।
চোৰাংচোৱাৰ উৎসৰ ওপৰত ভিত্তি কৰি ভাৰতীয় দণ্ডবিধিৰ (আই পি চি) প্ৰাসংগিক ধাৰা: ৩১৮(৩), ৩১৯(২), ৩৩৬(৩), ৩৩৭ আৰু ৬১(২)ৰ অধীনত এটা চোমোতো গোচৰ (নং ০১/২০২৬) পঞ্জীয়ন কৰা হৈছিল । তদন্তত প্ৰকাশ পাইছে যে সন্দেহযুক্ত যুৱককেইজনে টেলিকম নিয়ম উলংঘা কৰি প্ৰায় ২০০ খন চিম কাৰ্ড অবৈধভাৱে ব্যৱহাৰ কৰিছিল আৰু এটা বৃহৎ আন্তঃৰাজ্যিক ছিণ্ডিকেটৰ অংশ আছিল।
অভিযানৰ সময়ত উদ্ধাৰ হোৱা উল্লেখযোগ্য সামগ্ৰীসমূহৰ ভিতৰত আছে হাজাৰৰো অধিক ব্যক্তিৰ কে ৱাই চিৰ নথি, যিটো ব্যাপক পৰিচয় চুৰি আৰু অপব্যৱহাৰৰ গুৰুতৰ ইংগিত। ইয়াৰ ভিতৰত আছিল বিভিন্ন ব্যক্তিৰ নামত ৫৪খন বেংকৰ পাছবুক, দহখন খালী চেকবুক, পাঁচখন অব্যৱহৃত ডেবিট কাৰ্ড, ১০০০খন জাৰি নকৰা চিম কাৰ্ড, আৰু প্ৰায় ৫০০খন ইছ্যু কৰা চিম কাৰ্ডৰ কভাৰ।
প্ৰাথমিক তদন্তত প্ৰকাশ পাইছে যে জব্দ কৰা বহু চিম কাৰ্ডৰ সৈতে আন ৰাজ্যত পঞ্জীয়নভুক্ত চাইবাৰ জালিয়াতিৰ গোচৰৰ সম্পৰ্ক আছে। ব্যৱহৃত চিম কাৰ্ড পৰীক্ষা কৰিলে দেখা গ’ল যে এইবোৰ চিম বক্সৰ কামত জড়িত আছিল। এইটো এটা কৌশল যিটো স্থানীয় নেটৱৰ্কৰ জৰিয়তে প্ৰৱঞ্চনামূলক আন্তঃৰাষ্ট্ৰীয় কলসমূহ ৰুট কৰিবলৈ ব্যৱহাৰ কৰা হয়, যাৰ ফলত কেলেংকাৰী জড়িত থকাসকলক ধৰা পেলোৱা আৰু অনুসৰণৰ পৰা হাত সাৰিব পাৰে। আটাইতকৈ চিন্তনীয় কথাটো হ’ল অভিযুক্তই ছদ্মবেশত হস্ততাঁত প্ৰশিক্ষণ কেন্দ্ৰ চলাইছিল বুলি অভিযোগ উঠিছে। তেওঁলোকে মহিলা প্ৰাৰ্থীৰ পৰা আবেদন বিচাৰিছিল, মনোনয়নৰ নামত তেওঁলোকৰ ব্যক্তিগত পৰিচয় পত্ৰ লাভ কৰিছিল আৰু তাৰ পিছত এই নথি-পত্ৰসমূহ প্ৰৱঞ্চনাৰে ব্যৱহাৰ কৰি সেই মিউল চিম কাৰ্ড সক্ৰিয় কৰি মিউল বেংক একাউণ্ট খুলিছিল। এইবোৰ হৈছে সাধাৰণতে চাইবাৰ অপৰাধৰ পৰা পোৱা ধন লুণ্ঠন কৰিবলৈ ব্যৱহাৰ কৰা সঁজুলি।
ধৃত অভিযুক্ত কেইজন হৈছে ক্ৰমে মইনুল হক (হাজো), মুন কলিতা (কায়ন), কংকান কলিতা (কায়ন), হীৰক জ্যোতি কলিতা (কায়ন), আৰু মুস্তাকিম আহমেদ (কায়ন)।
সমগ্ৰ নেটৱৰ্কটো উন্মোচন, মিউল একাউণ্টৰ হিতাধিকাৰী চিনাক্ত কৰা, নথি-পত্ৰৰ অপব্যৱহাৰ কৰা ভুক্তভোগীক চিনাক্ত কৰা, ৰাজ্যখনৰ নিৰ্দিষ্ট জালিয়াতিৰ কাণ্ডৰ সৈতে সম্পৰ্ক স্থাপনৰ বাবে তদন্ত চলি আছে।
সকলো ধৰণৰ চাইবাৰ জালিয়াতিৰ সৈতে মোকাবিলা কৰিবলৈ অসম আৰক্ষী সম্পূৰ্ণৰূপে সাজু। আৰক্ষীয়ে জনসাধাৰণক আহ্বান জনাইছে যে ব্যক্তিগত নথি-পত্ৰ (আধাৰ, পেন, বেংকৰ সবিশেষ, ফটো) কেতিয়াও অচিনাকি ব্যক্তিৰ সৈতে বা অনভেৰিফাইড ট্ৰেইনিং/চাকৰি আঁচনিৰ সৈতে শ্বেয়াৰ নকৰিবলৈ। সন্দেহজনক কল, বাৰ্তা বা অনলাইন কাৰ্য্যকলাপৰ বিষয়ে তৎক্ষণাত ১৯৩০ (ৰাষ্ট্ৰীয় চাইবাৰ অপৰাধ হেল্পলাইন) বা cybercrime.gov.in লৈ ৰিপৰ্ট কৰক। নথিপত্ৰ জমা দিয়াৰ আগতে কোনো সংস্থা বা প্ৰশিক্ষণ কাৰ্যসূচী চৰকাৰী উৎসৰ সৈতে পৰীক্ষা কৰক।
হিন্দুস্থান সমাচাৰ / আলোক চক্ৰৱৰ্তী
