কাঠমাণ্ডু, ১৮ মাৰ্চ (হি.স.)। নেপালৰ সংসদীয় নিৰ্বাচনত সৰ্ববৃহৎ দল হিচাপে আত্মপ্ৰকাশ কৰা ৰাষ্ট্ৰীয় স্বতন্ত্ৰ পাৰ্টিয়ে (আৰএছপি) নিজৰ নৱনিৰ্বাচিত সাংসদসকলক প্ৰশিক্ষণ দি চৰকাৰ গঠনৰ প্ৰস্তুতিত ব্যস্ত হৈ পৰিছে ।
দলৰ সভাপতি ৰবি লামিচানে নৱনিৰ্বাচিত সাংসদসকলৰ বাবে প্ৰশিক্ষণ কাৰ্যসূচী চলাই থকাৰ সময়তে বলেন্দ্ৰ শ্বাহে নতুন চৰকাৰ গঠনৰ বাবে নিজৰ দল গঠনত ব্যস্ত। ৫ মাৰ্চৰ নিৰ্বাচনত প্ৰতিনিধি সদনত দলটোৱে সৰ্ববৃহৎ দল হিচাপে আত্মপ্ৰকাশ কৰাৰ পিছত মঙলবাৰৰ পৰা ইয়াৰ নৱনিৰ্বাচিত সাংসদসকলৰ বাবে দুদিনীয়া বিশেষ প্ৰশিক্ষণ কাৰ্যসূচী আৰম্ভ হয় আৰু এয়া বুধবাৰে সন্ধিয়ালৈকে চলিব। মঙলবাৰে ১২ ঘণ্টীয়া অধিৱেশনত অংশগ্ৰহণ কৰা সাংসদসকলে বুধবাৰে অতিৰিক্ত সাত ঘণ্টীয়া প্ৰশিক্ষণত অংশগ্ৰহণ কৰিছে।
শ্বাহৰ নেতৃত্বত নতুন চৰকাৰ গঠনৰ ভেটি প্ৰস্তুত কৰিবলৈ আৰম্ভ কৰিছে দলটোৱে। সংসদীয় দলৰ নেতা বাছনি আৰু দলৰ সংবিধান সংশোধন কৰি শ্বাহৰ নেতৃত্বৰ পথ প্ৰশস্ত কৰা আদি প্ৰয়োজনীয় পদ্ধতিৰ ওপৰতো দলটোৱে কাম কৰি আছে। দলৰ সভাপতি ৰবি লামিচানে, জ্যেষ্ঠ নেতা বলেন্দ্ৰ শ্বাহ, উপ-সভাপতি স্বৰ্ণিম ৱাগলে, আৰু দ্বিতীয় উপ-সভাপতি ডল প্ৰসাদ আৰিয়ালে চৰকাৰ গঠন সন্দৰ্ভত কেইবাটাও ৰাউণ্ড বৈঠকত মিলিত হৈছে। এই বৈঠকসমূহত সম্ভাৱ্য মন্ত্ৰী বাছনি আৰু গঠনৰ পিছত চৰকাৰৰ তাৎক্ষণিক অগ্ৰাধিকাৰ বিষয়সমূহৰ ওপৰত গুৰুত্ব আৰোপ কৰা হৈছে। বলেন্দ্ৰ শ্বাহে দলৰ ১৮২ জন সাংসদৰ বিশেষজ্ঞতাৰ ভিত্তিত নিজৰ দলটো গঢ়ি তোলাৰ কাম কৰি আছে।
বেলেন্দ্ৰৰ উপদেষ্টা ভিক্টৰ পৌডেলে কয় যে অহা এসপ্তাহৰ ভিতৰত নতুন চৰকাৰ গঠন হ’ব পাৰে। তেওঁ লগতে কয় যে নিৰ্বাচন আয়োগে আনুপাতিক সাংসদসকলক প্ৰমাণ পত্ৰ প্ৰদান কৰাৰ পিছত সংসদীয় দলৰ নেতাগৰাকীক নিৰ্বাচিত কৰা হ’ব।
আৰ এছ পিৰ মুখপাত্ৰ প্ৰতিভা ৰাৱালে কয় যে বলেন্দ্ৰ শ্বাহৰ দলটোৱে কেৱল নতুন মন্ত্ৰী বাছনিৰ বিষয়ে আলোচনা কৰাই নহয়, বিশেষজ্ঞৰ এটা দলে চৰকাৰৰ ১০০ দিনীয়া কাৰ্যসূচীও প্ৰস্তুত কৰি আছে।
हिन्दुस्थान समाचार / মনোজ কুমাৰ শইকীয়া
