গুৱাহাটী, ১৫ মাৰ্চ (হি.স.)। অসমৰ মুখ্যমন্ত্ৰী ড০ হিমন্ত বিশ্ব শৰ্মাই দেওবাৰে কয় যে ৰাজ্যখনত এতিয়া চৰকাৰী কৰ্কট চিকিৎসালয়ৰ বৃহৎ নেটৱৰ্ক আছে, যিটো ভাৰতৰ আন কোনো ৰাজ্যৰ তুলনাত অতুলনীয় বুলি অভিহিত কৰিছে।
গুৱাহাটীৰ বিৰুবাৰীত প্ৰাগজ্যোতিষ চিকিৎসা মহাবিদ্যালয় আৰু চিকিৎসালয়ৰ উদ্বোধনী অনুষ্ঠানত ভাষণ দি তেওঁ কয় যে আজি দুটা নতুন কৰ্কট চিকিৎসা কেন্দ্ৰ উদ্বোধন কৰা হৈছে। ৰাজ্য চৰকাৰ আৰু টাটা ট্ৰাষ্টৰ যৌথ পদক্ষেপ আছাম কেন্সাৰ কেয়াৰ ফাউণ্ডেশ্যন (এচিচিএফ)ৰ অধীনত ১৭খন কৰ্কট চিকিৎসালয়ৰ নেটৱৰ্ক গঢ়ি তোলাৰ পৰিকল্পনা কৰিছিল ৰাজ্যখনে। ইয়াৰে ১২খন চিকিৎসালয় ইতিমধ্যে কাৰ্যক্ষম হৈ উঠিছে।
গুৱাহাটীৰ পৰা কেন্দ্ৰীয় গৃহমন্ত্ৰী অমিত শ্বাহে ভাৰ্চুৱেলি উদ্বোধন কৰে গোলাঘাট আৰু তিনিচুকীয়াত অৱস্থিত আৰু দুটা কেন্সাৰ চিকিৎসা কেন্দ্ৰ। এচিচিএফ প্ৰকল্পৰ অধীনত ১৩৫ কোটি টকা ব্যয় কৰি প্ৰতিটো কেন্দ্ৰ নিৰ্মাণ কৰা হৈছিল।
এই পদক্ষেপৰ উৎপত্তিৰ কথা সোঁৱৰাই মুখ্যমন্ত্ৰীয়ে কয় যে এই প্ৰকল্পৰ ধাৰণাটো ক’ভিড-১৯ মহামাৰীৰ পূৰ্বেই কল্পনা কৰা হৈছিল, অমিত শ্বাহ আৰু উদ্যোগপতি ৰতন টাটা উপস্থিত থকা এখন বৈঠকৰ সময়ত। সেই বৈঠকত গৃহমন্ত্ৰীয়ে ৰতন টাটাক কয় যে উত্তৰ-পূৰ্বাঞ্চলৰ প্ৰতিখন ৰাজ্যতে কেন্সাৰ চিকিৎসালয় নিৰ্মাণ কৰিব লাগে। অসমে তেতিয়া এটা ডাঙৰ সপোন দেখিছিল।
মুখ্যমন্ত্রীৰ মতে, অসম চৰকাৰ আৰু টাটা ট্ৰাষ্টে যৌথভাৱে ৰাজ্যজুৰি ১৭খন কৰ্কট চিকিৎসালয় নিৰ্মাণৰ চুক্তিত স্বাক্ষৰ কৰে, য’ত দুয়োটা পক্ষই খৰচৰ ৫০ শতাংশ বৰঙণি আগবঢ়ায়।
মুখ্যমন্ত্ৰী ডাঃ হিমন্ত বিশ্ব শৰ্মাই কয় যে আজি আমাৰ হাতত কেমোৰ পৰা আৰম্ভ কৰি ৰেডিঅ’থেৰাপি আৰু অস্ত্ৰোপচাৰলৈকে ১২খন কৰ্কট চিকিৎসালয় আছে। গোলাঘাট আৰু তিনিচুকীয়াত আৰু দুখন চিকিৎসালয় উদ্বোধন কৰিলে গৃহমন্ত্ৰী অমিত শ্বাহে, আৰু তিনিখন চিকিৎসালয়ৰ সৈতে সেই সপোন বাস্তৱায়িত হ’ব। তেওঁ কয় যে চৰকাৰী খণ্ডৰ আন কোনো ৰাজ্যত আজি অসমৰ দৰে কৰ্কট চিকিৎসালয়ৰ নেটৱৰ্ক নাই।
हिन्दुस्थान समाचार / আলোক চক্ৰৱৰ্তী