নতুন দিল্লী, ০৯ ফেব্ৰুৱাৰী (হি.স.)। আন্তঃৰাষ্ট্ৰীয় অলিম্পিক একাডেমীৰ এটা প্ৰতিনিধি দলে ভাৰতীয় অলিম্পিক সন্থাৰ সভাপতি ড০ পি.টি. উষাক তেওঁৰ নতুন দিল্লীৰ মুখ্য কাৰ্যালয়ত সাক্ষাত কৰে। দুয়োটা প্ৰতিষ্ঠানে ভাৰতত অলিম্পিক শিক্ষাক শক্তিশালী কৰাৰ লগতে ভাৰতীয় ৰাষ্ট্ৰীয় অলিম্পিক একাডেমীক বিশ্ব অলিম্পিক শিক্ষাৰ কাঠামোত অধিক একত্ৰিত কৰাৰ বাবে তেওঁলোকৰ ভাগ-বতৰা দায়বদ্ধতা পুনৰবাৰ প্ৰকাশ কৰে।
আন্তঃৰাষ্ট্ৰীয় অলিম্পিক একাডেমীৰ সঞ্চালক ড০ মাকিছ আছিমাকোপ’লছ আৰু এন অ’ এ/এন অ চি সম্পৰ্কৰ মুৰব্বী আলেকজেণ্ড্ৰা কাৰাইস্কুয়ে এই প্ৰতিনিধি দলটোৰ নেতৃত্ব দিয়ে।
বৈঠকত আন্তঃৰাষ্ট্ৰীয় অলিম্পিক একাডেমীয়ে ভাৰতৰ ৰাষ্ট্ৰীয় অলিম্পিক একাডেমী পুনৰ সক্ৰিয় কৰাৰ বাবে ভাৰতীয় অলিম্পিক সন্থাক অভিনন্দন জ্ঞাপন কৰে।
৯ জানুৱাৰীত আনুষ্ঠানিকভাৱে পুনৰ আৰম্ভ হোৱা ৰাষ্ট্ৰীয় অলিম্পিক একাডেমীক শিক্ষা, মূল্যবোধভিত্তিক নেতৃত্ব, আৰু দীৰ্ঘম্যাদী সামৰ্থ্য বিকাশৰ জৰিয়তে ভাৰতত অলিম্পিক আন্দোলনক শক্তিশালী কৰাৰ দিশত এক গুৰুত্বপূৰ্ণ প্ৰতিষ্ঠানিক পদক্ষেপ হিচাপে অভিহিত কৰা হয়।
লগতে অলিম্পিয়ান ড° উষাক সভাপতি আৰু গগন নৰঙক ৰাষ্ট্ৰীয় অলিম্পিক একাডেমীৰ সঞ্চালক হিচাপে নিযুক্তি দিয়াক আদৰণি জনায়।
এই উপলক্ষে ক্ৰীড়া শিক্ষাক বিশ্বাসযোগ্য, সৰ্বাংগীন, আৰু খেলুৱৈকেন্দ্ৰিক কৰি তোলাৰ ক্ষেত্ৰত খেলুৱৈ নেতৃত্বৰ ভূমিকাক আলোকপাত কৰা হয়।
ভাৰতীয় অলিম্পিক সন্থাৰ মুখ্য কাৰ্যবাহী বিষয়া ৰঘুৰাম আয়াৰৰ উপস্থিতিত অনুষ্ঠিত বৈঠকত ভাৰতত অলিম্পিক শিক্ষাক শক্তিশালী কৰাৰ লগতে ভাৰতীয় ৰাষ্ট্ৰীয় অলিম্পিক একাডেমীক বিশ্ব অলিম্পিক শিক্ষাৰ কাঠামোত অধিক একত্ৰিত কৰাৰ বাবে দুয়োটা প্ৰতিষ্ঠানৰ ভাগ-বতৰা দায়বদ্ধতাক পুনৰবাৰ উল্লেখ কৰে।
বৈঠকত স্পষ্ট ফলাফলৰ সৈতে গাঁথনিগত অলিম্পিক শিক্ষা কাৰ্যসূচীৰ বিকাশ, অধ্যাপক সামৰ্থ্য বিকাশ, যুৱক-যুৱতীসকলৰ অংশগ্ৰহণ, আৰু আন্তঃৰাষ্ট্ৰীয় জ্ঞান বিনিময়ৰ বিষয়ে আলোচনা কৰা হয়। ৰাষ্ট্ৰীয় অলিম্পিক একাডেমীক ভাৰতৰ অলিম্পিকৰ কেন্দ্ৰীয় বৌদ্ধিক আৰু শিক্ষানুষ্ঠান হিচাপে গঢ়ি তোলা, সুশাসন, নৈতিক নেতৃত্ব, আৰু বহনক্ষম ক্ৰীড়া বিকাশৰ প্ৰসাৰত বিশেষ গুৰুত্ব দিয়া হৈছিল।
ইণ্ডিয়ান অলিম্পিক এছ’চিয়েশ্যনৰ সভাপতি ড০ পি.টি. উষাই ক্ৰীড়াত সততা, অন্তৰ্ভুক্তি, আৰু বহনক্ষমতাক প্ৰসাৰিত কৰাত শিক্ষাৰ ভূমিকাক আলোকপাত কৰে।
তেওঁলোকে ভাৰতীয় অলিম্পিক সন্থাই আন্তঃৰাষ্ট্ৰীয় অলিম্পিক একাডেমীৰ সহযোগত ৰাষ্ট্ৰীয় অলিম্পিক একাডেমীৰ জৰিয়তে সুশাসন শক্তিশালী কৰা, খেলুৱৈৰ কল্যাণ ৰক্ষা কৰা, ভাৰতীয় ক্ৰীড়াৰ ভৱিষ্যত নেতা গঢ়ি তোলাৰ প্ৰতিশ্ৰুতি পুনৰবাৰ উল্লেখ কৰে।
দুয়োটা প্ৰতিষ্ঠানে অলিম্পিকৰ মূল্যবোধ—নৈতিকতা, ন্যায্য খেলা, সন্মান, অন্তৰ্ভুক্তি আৰু সততা—যিবোৰ ক্ৰীড়াৰ বিশ্বাসযোগ্যতা আৰু আস্থাৰ বাবে অপৰিহাৰ্য, সুৰক্ষিত কৰাৰ বাবে তেওঁলোকৰ ভাগ-বতৰা দায়িত্বৰ ওপৰত গুৰুত্ব আৰোপ কৰিছিল।
মানসিক স্বাস্থ্য, সুৰক্ষা, এণ্টি-ডপিং ব্যৱস্থা, প্ৰতিযোগিতাৰ পিছৰ কেৰিয়াৰ পৰিৱৰ্তনকে ধৰি খেলুৱৈ কল্যাণমূলক শিক্ষাক অগ্ৰাধিকাৰ ক্ষেত্ৰ হিচাপে চিনাক্ত কৰা হৈছিল।
তদুপৰি ভাৰতত অলিম্পিক আন্দোলনৰ দীৰ্ঘম্যাদী প্ৰাসংগিকতা আৰু বহনক্ষমতাৰ বাবে যুৱ অংশগ্ৰহণ আৰু নেতৃত্ব বিকাশক মূল স্তম্ভ হিচাপে চিনাক্ত কৰা হৈছিল। বৈঠকত ভাৰতৰ অলিম্পিক ইতিহাস আৰু ক্ৰীড়া ঐতিহ্য সংৰক্ষণ আৰু নথিভুক্ত কৰাৰ গুৰুত্বৰ লগতে বিভিন্ন অঞ্চল, লিংগ, আৰু ক্ৰীড়া শাখাৰ মাজত বৈচিত্ৰ্য আৰু প্ৰতিনিধিত্ব নিশ্চিত কৰাৰ প্ৰয়োজনীয়তাৰ ওপৰতো আলোকপাত কৰা হয়।
আন্তঃৰাষ্ট্ৰীয় অলিম্পিক একাডেমীয়ে প্ৰতিষ্ঠানিক বিনিময়, যৌথ কাৰ্যসূচী, আৰু আন্তঃৰাষ্ট্ৰীয় অধিবেশনত অংশগ্ৰহণৰ জৰিয়তে ভাৰতীয় ৰাষ্ট্ৰীয় অলিম্পিক একাডেমীক সহায় কৰিবলৈ সাজু হোৱাৰ কথা পুনৰবাৰ উল্লেখ কৰে। দুয়োটা সংস্থাই ৰাষ্ট্ৰীয় অলিম্পিক একাডেমীৰ বহনক্ষম বৃদ্ধি আৰু প্ৰভাৱ নিশ্চিত কৰিবলৈ দীৰ্ঘম্যাদী কৌশলগত কাঠামো, বহনক্ষম পুঁজিৰ আৰ্হি, স্বচ্ছ শাসন, আৰু জুখিব পৰা ফলাফলৰ প্ৰয়োজনীয়তাৰ ওপৰত একমত প্ৰকাশ কৰে।
हिन्दुस्थान समाचार / অৰৱিন্দ
