নতুন দিল্লী, ১৬ ফেব্ৰুৱাৰী (হি.স.)। প্ৰধানমন্ত্ৰী নৰেন্দ্ৰ মোদীয়ে আজি সোমবাৰে সন্ধিয়া ৫ বজাত নতুন দিল্লীৰ ভাৰত মণ্ডপমত ভাৰত এ আই ইমপেক্ট এক্সপ’ ২০২৬ (AI Impact Expo 2026) উদ্বোধন কৰিব। এই সমাৱেশ ২০ ফেব্ৰুৱাৰীত ভাৰত মণ্ডপমত ভাৰত এ আই ইমপেক্ট ছামিটৰ জৰিয়তে সামৰণি পৰিব। এই এক্সপ’ এআইৰ ব্যৱহাৰিক প্ৰদৰ্শনৰ বাবে এক ৰাষ্ট্ৰীয় মঞ্চ হ’ব। নীতিয়ে অনুশীলনক লগ পাব, উদ্ভাৱন ব্যাপকভাৱে কাৰ্যকৰী হ’ব, আৰু প্ৰযুক্তিয়ে সাধাৰণ নাগৰিকৰ ওচৰলৈ যাব। এই তথ্য এক্সপ’ৰ প্ৰাকক্ষণত এক আনুষ্ঠানিক বিবৃতিত প্ৰদান কৰা হৈছে। প্ৰধানমন্ত্ৰী নৰেন্দ্ৰ মোডীৰ কাৰ্যসূচীৰ সবিশেষ ভাৰতীয় জনতা পাৰ্টিয়েও এক্সত শ্বেয়াৰ কৰে।
আনুষ্ঠানিক বিবৃতি অনুসৰি, ৭০ হাজাৰ বৰ্গমিটাৰতকৈও অধিক বিস্তৃত ১০টা এৰিনাত অনুষ্ঠিত এই এক্সপ’ত বিশ্বব্যাপী প্ৰযুক্তি কোম্পানী, ষ্টাৰ্টআপ, শিক্ষাবিদ আৰু গৱেষণা প্ৰতিষ্ঠান, কেন্দ্ৰীয় মন্ত্ৰালয়, ৰাজ্য চৰকাৰ, আৰু আন্তঃৰাষ্ট্ৰীয় অংশীদাৰসকলক একত্ৰিত কৰা হ’ব। এই এক্সপ’ত ১৩খন দেশৰ পেভিলিয়নেও এআই ব্যৱস্থাত আন্তঃৰাষ্ট্ৰীয় সহযোগিতা প্ৰদৰ্শন কৰিব। ইয়াৰ ভিতৰত অষ্ট্ৰেলিয়া, জাপান, ৰাছিয়া, যুক্তৰাজ্য, ফ্ৰান্স, জাৰ্মানী, ইটালী, নেদাৰলেণ্ড, ছুইজাৰলেণ্ড, ছাৰ্বিয়া, ইষ্ট’নিয়া, তাজিকিস্তান, আফ্ৰিকাৰ পেভিলিয়ন আদি অন্যতম।
এক্সপ’ত ৩০০ৰো অধিক বৈশিষ্ট্যপূৰ্ণ প্ৰদৰ্শনী পেভিলিয়ন আৰু লাইভ প্ৰদৰ্শনী অনুষ্ঠিত হ’ব, যিবোৰ তিনিটা মূল বিষয়বস্তু: মানুহ, গ্ৰহ, আৰু বৃদ্ধিৰ ওপৰত গঠন কৰা হ’ব। ইয়াৰ উপৰিও এই এক্সপ’ত ৬০০ৰো অধিক উচ্চ সম্ভাৱনাপূৰ্ণ ষ্টাৰ্টআপৰ বৈশিষ্ট্য থাকিব, যাৰ বহুতেই বিশ্বব্যাপী প্ৰাসংগিক আৰু ব্যাপক গণ যোগাযোগ সমাধান বিকশিত কৰি আছে। এই ষ্টাৰ্টআপসমূহে ইতিমধ্যে বাস্তৱ জগতৰ ব্যৱহাৰত থকা প্ৰাসংগিক সমাধানসমূহ প্ৰদৰ্শন কৰিব।
ইণ্ডিয়া এ আই ইমপেক্ট এক্সপ’ত আন্তঃৰাষ্ট্ৰীয় প্ৰতিনিধিকে ধৰি ২.৫ লাখৰো অধিক দৰ্শনাৰ্থীয়ে অংশগ্ৰহণ কৰাৰ সম্ভাৱনা আছে। এই অনুষ্ঠানৰ লক্ষ্য হৈছে বিশ্বৰ এআই পৰিৱেশ তন্ত্ৰৰ ভিতৰত নতুন অংশীদাৰিত্ব গঢ়ি তোলা আৰু ব্যৱসায়িক সুযোগ সৃষ্টি কৰা। ৫০০ৰো অধিক অধিবেশনত ৩,২৫০ জনতকৈ অধিক দূৰদৰ্শী বক্তা আৰু পেনেলিষ্ট উপস্থিত থাকিব। এই অধিবেশনসমূহৰ মূল উদ্দেশ্য হ’ব বিভিন্ন খণ্ডত এআইৰ পৰিৱৰ্তনশীল প্ৰভাৱক স্বীকৃতি দিয়া আৰু এআইয়ে যাতে প্ৰতিজন বিশ্ব নাগৰিকক উপকৃত কৰে তাৰ বাবে ভৱিষ্যতৰ পদক্ষেপসমূহৰ ওপৰত আলোচনা কৰা।
हिन्दुस्थान समाचार / অৰৱিন্দ
