নতুন দিল্লী, ১৫ ফেব্ৰুৱাৰী (হি.স.)। কেন্দ্ৰীয় গৃহমন্ত্ৰী অমিত শ্বাহে গুজৰাটৰ ৰাজধানী গান্ধীনগৰত চেন্ট্ৰেল বেংকৰ ডিজিটেল মুদ্ৰা (চিবিডিচি) ভিত্তিক ৰাজহুৱা বিতৰণ ব্যৱস্থা (পিডিএছ) মুকলি কৰে। ৰেচন বিতৰণ কৰা অন্নপূৰ্ণা মেচিনো উদ্বোধন কৰে। এই উপলক্ষে গুজৰাটৰ মুখ্যমন্ত্ৰী ভূপেন্দ্ৰ পেটেল আৰু কেন্দ্ৰীয় মন্ত্ৰী প্ৰলহাদ যোশীও উপস্থিত থাকে।

অমিত শ্বাহে কয় যে প্ৰধানমন্ত্ৰী নৰেন্দ্ৰ মোদীৰ পৰা অনুপ্ৰাণিত হৈ ডিজিটেল ইণ্ডিয়াই এতিয়া ৰেচন বিতৰণৰ দিশত সম্প্ৰসাৰণ ঘটাইছে। এই ব্যৱস্থাই দৰিদ্ৰ লোকসকলক সুলভ মূল্যৰ খাদ্য শস্য প্ৰদানৰ ব্যৱস্থাটোক আধুনিকীকৰণ, সৰলীকৰণ আৰু স্বচ্ছ কৰি তুলিব। ইয়াৰ দ্বাৰা দৰিদ্ৰ লোকক বিতৰণ কৰা ৰেচনত স্বচ্ছতা আহিব আৰু দুৰ্নীতি দূৰ হ’ব।

তেওঁ কয় যে এই ব্যৱস্থাৰ জৰিয়তে দৰিদ্ৰ লোকসকলে ডিজিটেল মাধ্যমেৰে পোনপটীয়াকৈ ৰেচন লাভ কৰাটো নিশ্চিত কৰিব। ইয়াৰ ফলত মধ্যভোগীৰ ভূমিকা নাইকিয়া হ’ব। ডাইৰেক্ট বেনিফিট ট্ৰেন্সফাৰে যেনেকৈ দুৰ্নীতি হ্ৰাস কৰিলে, এই ব্যৱস্থাই ৰেচন বিতৰণৰ ক্ষেত্ৰত স্বচ্ছতা আনিব।

গৃহমন্ত্ৰীয়ে ৩৫ ছেকেণ্ডত ২৫ কেজি খাদ্য শস্য বিতৰণ কৰিব পৰা অন্নপূৰ্ণা মেচিনটোও উদ্বোধন কৰে। ইয়াৰ দ্বাৰা সঠিক পৰিমাণ আৰু গুণগত মান নিশ্চিত হ’ব বুলিও তেওঁ ব্যক্ত কৰে।

অমিত শ্বাহে কয় যে আগন্তুক তিনি-চাৰি বছৰত সমগ্ৰ দেশতে এই ব্যৱস্থা ৰূপায়ণ কৰা হ’ব। ইয়াৰ দ্বাৰা প্ৰতিজন যোগ্য ব্যক্তিয়ে নিজৰ প্ৰাপ্য ৰেচন স্বচ্ছভাৱে লাভ কৰাটো নিশ্চিত হ’ব।

তেওঁ কয় যে দেশৰ ৮০ কোটি লোকক প্ৰতিমাহে প্ৰতিজন ব্যক্তিৰ বাবে ৫ কেজি বিনামূলীয়া শস্যৰ যোগান ধৰিছে। নতুন ব্যৱস্থাই খাদ্য সুৰক্ষা ব্যৱস্থাক আৰু অধিক শক্তিশালী কৰিব। চৰকাৰৰ নীতিয়ে লাখ লাখ মানুহৰ জীৱন ধাৰণৰ মান উন্নত কৰিছে।

हिन्दुस्थान समाचार / অৰৱিন্দ