
নতুন দিল্লী, ১৬ নৱেম্বৰ (হি.স.)। দেশজুৰি যোৱা ১৩ নৱেম্বৰৰ পৰা নহায়-খায়ৰ সৈতে আৰম্ভ হোৱা চাৰিদিনীয়া ছট উৎসৱৰ আজি উদীয়মান সূৰ্য্যক প্ৰসাদৰে সামৰণি পৰে। এই উপলক্ষে থেকুৱা প্ৰসাদ বিতৰণ কৰা হয়। একেদৰে ৩৬ ঘণ্টীয়া নিৰ্জলা ব্ৰত পালন কৰাসকলে উদীয়মান সূৰ্য্যক অৰ্ঘ্য প্ৰদান কৰি নিজৰ অনুষ্ঠান সম্পূৰ্ণ কৰে। ইয়াৰ বাবে যমুনা নদীকে ধৰি ৰাষ্ট্ৰীয় ৰাজধানীৰ সকলো জলভাগতে প্ৰয়োজনীয় ব্যৱস্থা কৰা হৈছিল। মুখ্যমন্ত্ৰী ৰেখা গুপ্তাইও এই ভৱ্য মহোৎসৱত অংশগ্ৰহণ কৰে ।
ঘাটসমূহত প্ৰসাদ বিতৰণৰ জৰিয়তে জনবিশ্বাস আৰু বিশেষভাৱে বিহাৰ আৰু ঝাৰখণ্ডৰ সংস্কৃতিৰ সৈতে জড়িত সূৰ্য্য পূজাৰ চাৰিটা বিশেষ অনুষ্ঠানৰ ভৱ্য উৎসৱ ছটৰ সামৰণি পৰিল । এই মহান উৎসৱৰ সামৰণিৰ প্ৰাকক্ষণত (তৃতীয় দিন) অস্তগামী সূৰ্য্য অৰ্থাৎ অস্ত যোৱা সূৰ্য্যক ভক্ত আৰু ছট ভক্তসকলে অৰ্ঘ্য আগবঢ়ায়।
দিল্লীৰ সকলো যমুনা ছট ঘাটৰ কাষে কাষে স্পৰ্শকাতৰ স্থানত ডুবাৰু মোতায়েন কৰা হৈছিল । উদীয়মান সূৰ্য্যক প্ৰাৰ্থনা কৰা ভক্তসকলৰ সুবিধাৰ্থে আজি পুৱা ৪:৩০ বজাৰ পৰা মেট্ৰ’ চলিবলৈ আৰম্ভ কৰে । সাধাৰণতে পুৱা ৬ বজাৰ পৰা মেট্ৰ’ৰ চলাচল আৰম্ভ হয় । আজি ৰাজধানীত সূৰ্য্য উদয় হয় পুৱা ৬:৪৩ বজাত ।
দিল্লী আৰক্ষীৰ জোৱানৰ উপৰিও গৃহৰক্ষী, অসামৰিক প্ৰতিৰক্ষা আৰু ৰাষ্ট্ৰীয় দুৰ্যোগ সঁহাৰি বাহিনী (এনডিআৰএফ)ৰ দলকো নিৰাপত্তাৰ ব্যৱস্থাত অন্তৰ্ভুক্ত কৰা হৈছে । চিচিটিভি কেমেৰাৰ জৰিয়তে নিৰীক্ষণ কৰা হৈছে ঘাটসমূহ । ইয়াৰ বাবে এটা কন্ট্ৰল ৰুমও স্থাপন কৰা হৈছে। ঘাটসমূহৰ প্ৰৱেশ আৰু প্ৰস্থান গেটত বিশেষ সতৰ্কতা অৱলম্বন কৰা হৈছে । কালি সন্ধিয়াৰ দৰে ১১ কিলোমিটাৰ দৈৰ্ঘ্যৰ মুনক নলা ছট ঘাটৰ লগতে যমুনা নদীৰ দুয়োপাৰত নিৰ্মিত ছট ঘাটত উদীয়মান সূৰ্য্য দেৱতাক প্ৰাৰ্থনা কৰিবলৈ ভক্তসকলে পুৱতি নিশাৰ পৰাই উপস্থিত হোৱা আৰম্ভ কৰে ।
-----------------
হিন্দুস্থান সমাচাৰ / অৰৱিন্দ