কাছাৰ , ৬ অক্টোবৰ (হি.স.)। শিলচৰ পৌৰ নিগমৰ নিৰ্বাচনৰ ভোটগণনাত জিলিকি উঠিছে শাসকীয় বিজেপি দল। শিলচৰ পৌৰ সভা নিৰ্বাচনৰ ফলাফলত বিজেপিয়ে বিজয় ধ্বজা উৰুৱাবলৈ সক্ষম হৈছে। প্ৰকাশিত ফলাফল অনুসৰি শিলচৰ পৌৰ নিগমৰ ৪২টা ৱাৰ্ডৰ ভিতৰত ৩৪টা ৱাৰ্ডত বিজেপি প্ৰাৰ্থীয়ে জয়লাভ কৰিছে। ইয়াৰ ফলত শিলচৰ পৌৰ নিগমত বিজেপিয়ে শক্তিশালী স্থান লাভ কৰিছে। ইতিমধ্যেই ৰাজ্যৰ শাসকীয় দল বিজেপিয়ে বিনা প্ৰতিদ্বন্দ্বিতাৰে দুটা ৱাৰ্ড ক্ৰমে ৯ আৰু ২০ নং ৱাৰ্ডত জয়লাভ কৰিছিল।

ইফালে বিজেপিৰ মিত্ৰ দল অসম গণ পৰিষদ (অগপ) দলেও দুটা ৱাৰ্ডত জয়লাভ কৰে। বিজেপিৰ সৈতে মিত্ৰতা কৰি থকা অগপ প্ৰাৰ্থীৰ এই বিজয়ে পৌৰসভা নিৰ্বাচনৰ ফলাফলতো উল্লেখযোগ্য স্থান দখল কৰিছে।

ইফালে কংগ্ৰেছ পাৰ্টিয়ে মাত্ৰ এটা ৱাৰ্ডত জয়লাভ কৰে। এই কংগ্ৰেছৰ ফলত শিলচৰৰ দৰে এক গুৰুত্বপূৰ্ণ নগৰীয়া অঞ্চল দলৰ বাবে কিছু হতাশাজনক বুলি বিবেচিত হৈছে। দলটোৱে কেইবাটাও ৱাৰ্ডত তীব্ৰ যুঁজ দিয়াৰ আশা কৰা হৈছিল যদিও ফলাফলত ইয়াৰ প্ৰতিফলিত নহল।

তদুপৰি পাঁচটা ৱাৰ্ডত নিৰ্দলীয় প্ৰাৰ্থীয়ে জয়লাভ কৰে। দলীয় প্ৰাৰ্থীৰ বিৰুদ্ধে স্বতন্ত্ৰভাৱে প্ৰতিদ্বন্দ্বিতা কৰা এই প্ৰাৰ্থীসকলৰ ফলাফলে শিলচৰ পৌৰ নিগমৰ নিৰ্বাচনত যথেষ্ট চৰ্চা লাভ কৰিছে।

মন কৰিবলগীয়া যে ৩০ নং ৱাৰ্ডত কংগ্ৰেছে জয়লাভ কৰাৰ বিপৰীতে বিজেপিৰ মিত্ৰ দল অগপই ১৬ আৰু ২৬ নং ৱাৰ্ডত জয়লাভ কৰে।একেদৰে ১, ১৯, ২৪, ২৫, আৰু ৪২ নং ৱাৰ্ডত নিৰ্দলীয় প্ৰাৰ্থীয়ে জয়লাভ কৰে।

উল্লেখযোগ্য যে শিলচৰ চহৰ পূৰ্বতে এখন পৌৰসভা আছিল। পৌৰ নিগম গঠনৰ পিছত শিলচৰত অনুষ্ঠিত হোৱা এইটোৱেই প্ৰথম নিৰ্বাচন আছিল ।

হিন্দুস্থান সমাচাৰ / আলোক চক্ৰৱৰ্তী