নতুন দিল্লী, ০৩ অক্টোবৰ (হি.স.)। ভাৰতীয় মহিলা ৰিকার্ভ দলে ২০২৬ চনৰ এছিয়ান গেমছত ইতিহাস সৃষ্টি কৰি শুকুৰবাৰে দক্ষিণ কোৰিয়াক ৫-৩ ব্য়ৱধানত পৰাস্ত কৰি সোণৰ পদক অৰ্জন কৰে। এই জয়েৰে কীৰ্তি শৰ্মা, অংকিতা ভকত, আৰু কুমকুম মহোদৰ ত্ৰিপুৰা দলে এছিয়ান গেমছত দক্ষিণ কোৰিয়াৰ ৪৪ বছৰীয়া আধিপত্যৰ অন্ত পেলায়। ইয়াৰ পূৰ্বে ভাৰতে ছেমি ফাইনেলত শক্তিশালী চীনক ৫-১ ব্য়ৱধানত পৰাস্ত কৰি ফাইনেলত প্ৰৱেশ কৰিছিল।

দক্ষিণ কোৰিয়া আৰু চীনৰ ধনুৰ্বিদসকলে হেঁচাত পৰি শান্ত আৰু নিখুঁত প্ৰদৰ্শনৰ বাবে পৰিচিত যদিও ভাৰতীয় দলটোৱেও এই মেচত একেধৰণৰ প্ৰতিক্ৰিয়া প্ৰকাশ কৰে। ফাইনেলৰ উত্তেজনাপূৰ্ণ মুহূৰ্তবোৰ স্মৰণ কৰি কীৰ্তি শৰ্মাই কয় যে তেওঁলোকৰ সফলতাত মানসিক শক্তিৰ মূল ভূমিকা আছিল।

ভাৰতীয় ক্ৰীড়া কৰ্তৃপক্ষৰ সংবাদ মাধ্যমৰ সৈতে হোৱা এক সাক্ষাৎকাৰত কীৰ্তিয়ে কয় যে, আমি আমাৰ প্ৰতিদ্বন্দ্বীসকলৰ কথা ভবা নাছিলো। আমাৰ সমগ্ৰ মনোযোগ আছিল আমাৰ প্ৰদৰ্শন আৰু প্ৰশিক্ষণৰ সময়ত আমি অনুসৰণ কৰা প্ৰক্ৰিয়াৰ ওপৰত। আমি তিনিওজনে নিজৰ আৱেগ নিয়ন্ত্ৰণ কৰিব লাগিছিল আৰু ইজনে সিজনক বিশ্বাস কৰিব লাগিছিল। আমি ফলাফলৰ বিষয়ে নাভাবিছিলো আৰু আমাৰ ১০০ শতাংশ দিয়াৰ ওপৰত গুৰুত্ব দিছিলো।

হাৰিয়ানাৰ পৰা অহা কীৰ্তিয়ে কয় যে খিতাপৰ মেচখনত তেওঁ নিজৰ হাৰিয়ানৱী যুঁজাৰু মনোভাৱ সম্পূৰ্ণৰূপে ব্যৱহাৰ কৰিবলগীয়া হৈছিল। তাই কয়, আমি জানিছিলোঁ যে সামান্য ভুলেও মেচখন আমাৰ পক্ষত ঘূৰাই আনিব পাৰে। কিন্তু আমি দৃঢ়তাৰে থিয় দি প্ৰথম কাঁড়ৰ পৰা শেষলৈকে আমাৰ তীব্ৰতা বজাই ৰাখিলোঁ।

ভাৰতীয় ক্ৰীড়া কৰ্তৃপক্ষৰ হাজৰিবাগৰ প্ৰশিক্ষণ কেন্দ্ৰত প্ৰশিক্ষক উধম সিঙৰ অধীনত প্ৰশিক্ষণ লোৱা কীৰ্তিয়ে কয় যে ভাৰতৰ কম্পাউণ্ড আৰ্চাৰসকলৰ আকৰ্ষণীয় সফলতাই চীন আৰু দক্ষিণ কোৰিয়াৰ বিৰুদ্ধে কঠিন খেলৰ পূৰ্বে ৰিকাৰ্ভ দলটোক বহুখিনি প্ৰেৰণা যোগাইছিল।

তেওঁ কয়, কম্পাউণ্ড ইভেণ্টৰ পিছত আমাৰ আত্মবিশ্বাস যথেষ্ট বৃদ্ধি পাইছিল। আমি একেৰাহে তিনিটা স্বৰ্ণ পদক লাভ কৰা দিনটো ভাৰতৰ বাবে ভাগ্যৰ দিন আছিল। ই আমাক বহুত অনুপ্ৰাণিত কৰিছিল। আমি তেওঁলোকৰ কৃতিত্ব অনুকৰণ কৰিব বিচাৰিছিলো।

কীৰ্তিয়ে কয় যে আমি প্ৰতিযোগিতাখনৰ বাবে সম্পূৰ্ণৰূপে সাজু আছিলো আৰু আমাৰ প্ৰতিযোগিতা আৰম্ভ হোৱাৰ বাবে আগ্ৰহেৰে অপেক্ষা কৰি আছিলো।

ইয়াৰ পূৰ্বে ভাৰতৰ কম্পাউণ্ড আৰ্চাৰসকলে এছিয়ান গেমছত পুৰুষৰ দল, মহিলা দল, মিক্সড টিম ইভেণ্টত স্বৰ্ণ পদক লাভ কৰিছিল। ইয়াৰ পিছতে মহিলাৰ ৰিকাৰ্ভ দলটোৱেও সোণৰ পদক লাভ কৰে, যিটো ভাৰতৰ বাবে ধনুৰ্বিদ্যাত আন এক ঐতিহাসিক কৃতিত্ব হিচাপে পৰিগণিত হয়।

-----------------

হিন্দুস্থান সমাচাৰ / অৰৱিন্দ