অমিত শ্বাহৰ এনচিডিচিক ২৫ বছৰীয়া ৰোডমেপ প্ৰস্তুত কৰিবলৈ নিৰ্দেশ, উত্তৰ-পূবত ৮ লাখ চাকৰিৰ সৃষ্টিৰ লক্ষ্য

নতুন দিল্লী, ২৯ অক্টোবৰ (হি.স.)। কেন্দ্ৰীয় গৃহ আৰু সমবায় মন্ত্ৰী অমিত শ্বাহে ৰাষ্ট্ৰীয় সমবায় উন্নয়ন নিগমক আগন্তুক ২৫ বছৰৰ বাবে এক বিস্তৃত ৰোডমেপ প্ৰস্তুত কৰিবলৈ নিৰ্দেশ দি বৃহস্পতিবাৰে কয় যে সমবায় খণ্ডৰ প্ৰশাসন পেছাদাৰী হ’ব লাগে, আনহাতে ইয়াৰ দৃষ্টিভংগী সহযোগিতাৰ মৌলিক নীতিৰ ওপৰত ভিত্তি কৰি থাকিব লাগে।

ইয়াত এনচিডিচিৰ ৯৩ সংখ্যক সাধাৰণ পৰিষদৰ বৈঠকৰ অধ্যক্ষতা কৰি শ্বাহে সমবায় খণ্ডৰ অভিজ্ঞ প্ৰতিনিধি আৰু পেছাদাৰী বিশেষজ্ঞৰ এটা গোট গঠন কৰি প্ৰতিষ্ঠানটোৰ গাঁথনি, বিত্তীয় সম্পদ সংগ্ৰহ, কাৰ্য্যকৰী উন্নতি, আৰু ভৱিষ্যতৰ ব্যৱসায়িক সম্ভাৱনাৰ পৰ্যালোচনা কৰাৰ পৰামৰ্শ দিয়ে। তেওঁ কয় যে প্ৰধানমন্ত্ৰী নৰেন্দ্ৰ মোদীৰ চাহাৰা ছে সমৃদ্ধিৰ দৃষ্টিভংগীৰ লগত সংগতি ৰাখি সহযোগিতাই উন্নয়নৰ এক শক্তিশালী মাধ্যম হিচাপে গঢ়ি তুলিব লাগে, যাৰ সুফল সমাজৰ প্ৰতিটো শ্ৰেণীলৈ যায়।

সমবায় মন্ত্ৰালয়ৰ আৰম্ভণিৰ পৰাই ২৫ অক্টোবৰলৈকে এনচিডিচিয়ে সমগ্ৰ দেশৰ সমবায় প্ৰতিষ্ঠানসমূহক মুঠ ৪.১৪ লাখ কোটি ₹তকৈ অধিক আৰ্থিক সাহায্য প্ৰদান কৰিছে। ২০২৫-২৬ বিত্তীয় বৰ্ষত নিগমে ১,২৭,৫৯৬ কোটি টকাৰ সাহায্য প্ৰদান কৰিছিল, য’ত নিকা লাভৰ পৰিমাণ আছিল ১,৪৭৫ কোটি। নিগমটোৰ ঋণ আদায়ৰ হাৰ আছিল ৯৯.৮৪ শতাংশ, আৰু ইয়াৰ নিকা নন-পাৰফৰ্মিং এচেট (এনপিএ) স্তৰ আছিল শূন্য।

শ্বাহে বিগত পাঁচ বছৰত এনচিডিচিৰ অগ্ৰগতিৰ প্ৰশংসা কৰি এই সময়ছোৱাক নিগমটোৰ বাবে “সোণালী যুগ” বুলি অভিহিত কৰে। তেওঁ কয় যে নিগমে সকলো ৰাজ্য আৰু কেন্দ্ৰীয় শাসিত অঞ্চলত নিজৰ উপস্থিতি প্ৰতিষ্ঠা কৰিছে। লাডাখৰ দৰে দুৰ্গম অঞ্চলৰ লগতে উত্তৰ-পূৰ্বাঞ্চলৰ সৰু সৰু ৰাজ্যসমূহৰ কাৰ্যালয় সম্প্ৰসাৰণ সমবায় আন্দোলনক দেশৰ সুদূৰ চুকলৈ লৈ যোৱাৰ দিশত এক গুৰুত্বপূৰ্ণ পদক্ষেপ।

তেওঁ কয় যে এনচিডিচিয়ে নিজকে নিজৰ কৃতিত্বৰ মাজতে সীমাবদ্ধ নাথাকিব লাগে বৰঞ্চ পৰিৱৰ্তিত প্ৰয়োজনীয়তাৰ সৈতে খাপ খুৱাবলৈ প্ৰতিষ্ঠানিক সংস্কাৰ, বিত্তীয় সম্পদ সংগ্ৰহ, আৰু সমবায় প্ৰতিষ্ঠানৰ সৈতে অংশীদাৰিত্বৰ নতুন আৰ্হি প্ৰস্তুত কৰিব লাগে। তেওঁ ২০২৭ চনৰ ৩১ মাৰ্চৰ পিছত এই বিষয়ত বিশেষ বৈঠক অনুষ্ঠিত কৰি বিষয়টো বিতংভাৱে আলোচনা কৰি ২০২৭ চনৰ ডিচেম্বৰৰ ভিতৰত প্ৰয়োজনীয় সিদ্ধান্তৰ দিশত আগবাঢ়ি যোৱাৰ পৰামৰ্শ দিয়ে।

গৃহমন্ত্ৰীয়ে কয় যে সমবায়ৰ জৰিয়তে ক্ষুদ্ৰ কৃষক, পশুপালক, মাছমৰীয়া, গ্ৰাম্য মহিলা, আৰু অৰ্থনৈতিকভাৱে দুৰ্বল শ্ৰেণীৰ সামূহিক শক্তিক ৰাষ্ট্ৰীয় উন্নয়নৰ সৈতে সংযোগ কৰিব পৰা যায়। তেওঁ কয় যে এন চি ডি চিৰ দায়িত্ব কেৱল বৃহৎ সমবায় প্ৰতিষ্ঠানক আৰ্থিক সাহায্য প্ৰদান কৰাই নহয়, ক্ষুদ্ৰ কৃষক, পশুপালক, আৰু মাছমৰীয়াৰ জীৱিকাৰ প্ৰত্যক্ষ উন্নতি কৰা।

শ্বাহে ২০৩০ চনৰ ভিতৰত উত্তৰ-পূব অঞ্চলটোক পশুপালন, দুগ্ধ, আৰু মীন পালনৰ ক্ষেত্ৰত স্বাৱলম্বী কৰি তোলাৰ বাবে বিশেষ সমবায় প্ৰকল্পৰ বিকাশৰ নিৰ্দেশ দিয়ে। তেওঁ অঞ্চলটোৰ এন চি ডি চিৰ কাৰ্যালয়সমূহক ৰাজ্য চৰকাৰৰ সহযোগত কাৰ্য্যকৰী প্ৰকল্প গঢ়ি তুলিবলৈ আৰু তেওঁলোকৰ বাবে বিত্তীয় সাহায্য নিশ্চিত কৰিবলৈ নিৰ্দেশ দিয়ে।

তেওঁ এনচিডিচিয়ে নেচনেল বেংক ফৰ এগ্ৰিকালচাৰ এণ্ড ৰুৰেল ডেভেলপমেণ্ট (নাবাৰ্ড), ৰাজ্যিক সমবায় বেংক, আৰু বাণিজ্যিক বেংকৰ সহযোগত শ্বেয়াৰড লেণ্ডিং মডেল প্ৰস্তুত কৰিবলৈও পৰামৰ্শ দিয়ে। শ্বাহে কয় যে দুগ্ধ সমবায় খণ্ডৰ আৰ্থিক প্ৰয়োজনীয়তা পূৰণৰ বাবে নতুন বিত্তীয় আৰ্হি প্ৰস্তুত কৰাটো অতি প্ৰয়োজনীয়।

শ্বাহে কয় যে আৰ্থিক সাহায্য প্ৰদান ত্বৰান্বিত কৰিবলৈ এনচিডিচিয়ে ২০২৬-২৭ চনত ১.৭০ লাখ কোটি, ২০২৭-২৮ চনত ২.১০ লাখ কোটি, আৰু ২০২৮-২৯ চনত ২.৫০ লাখ কোটি টকাৰ লক্ষ্যৰ দিশত কাম কৰিব লাগে। পৰৱৰ্তী বছৰবোৰৰ বাবেও অভিলাষী লক্ষ্য নিৰ্ধাৰণৰ পৰামৰ্শ আগবঢ়ায়। তেওঁ ২০২৯-৩০ আৰু ২০৩০-৩১ চনত প্ৰায় ৩.৫০ লাখ কোটি টকাৰ বাৰ্ষিক আৰ্থিক সাহায্য প্ৰদানৰ প্ৰচেষ্টাত গুৰুত্ব আৰোপ কৰে।

বৈঠকত এনচিডিচিৰ বিত্তীয় প্ৰদৰ্শন, বাৰ্ষিক হিচাপ, আৰু ২০২৫-২৬ বিত্তীয় বৰ্ষৰ প্ৰতিবেদন পৰ্যালোচনা কৰা হয়। এই সময়ছোৱাত নিগমে ১,৫৫,৪০৮ কোটি টকাৰ প্ৰকল্পত অনুমোদন জনায়। এই প্ৰকল্পসমূহৰ ব্যৱস্থা কৰা হৈছিল ১৪,৮৮১খন সমবায় সমিতিৰ উপকাৰিতাৰ বাবে। ২০২০-২১ বিত্তীয় বৰ্ষত নিগমৰ বাৰ্ষিক বিত্তীয় ব্যয় আছিল ২৪,৭৩৩ কোটি ₹, যিটো ২০২৫-২৬ চনত ১,২৭,৫৯৬ কোটি ₹লৈ বৃদ্ধি পাইছে।

ৰাষ্ট্ৰীয় সমবায় ৰপ্তানি লিমিটেড, ভাৰতীয় বীজ সমবায় লিমিটেড, ৰাষ্ট্ৰীয় সমবায় জৈৱিক লিমিটেড, ভাৰত টেক্সি, সহকৰ সাৰথি, আৰু নগৰীয়া সমবায় বেংকৰ শীৰ্ষ সংস্থা এন ইউ চি এফ ডি চিকে ধৰি ৰাষ্ট্ৰীয় পৰ্যায়ৰ বহুৰাজ্যিক সমবায় প্ৰতিষ্ঠান গঠন আৰু উন্নয়নৰ ক্ষেত্ৰতো শ্বাহে এন চি ডি চিৰ ভূমিকাক প্ৰশংসা কৰে। সমবায় চেনি কলৰ বাবে বৃত্তাকাৰ অৰ্থনীতিৰ ওপৰত ভিত্তি কৰি নতুন ব্যৱসায়িক আৰ্হিৰ বিকাশ আৰু সহকৰ মিত্ৰ কাৰ্যসূচীৰ অধীনত প্ৰশিক্ষণ আৰু ইন্টাৰশ্বিপ সম্পূৰ্ণ কৰা যুৱক-যুৱতীসকলক নতুন বহুৰাজ্যিক সমবায় প্ৰতিষ্ঠানৰ সৈতে একত্ৰিত কৰাত গুৰুত্ব আৰোপ কৰে।

বৈঠকত এনচিডিচি সংশোধনী আইন, ২০২৬, আৰু সহবায় উদ্ভাৱন আঁচনি সন্দৰ্ভত আলোচনা কৰা হয়। এই আঁচনিৰ জৰিয়তে যোগ্য সমবায় সমিতিসমূহক ২৫ লাখ ₹ পৰ্যন্ত ১০০ শতাংশ অনুদান সাহায্য প্ৰদান কৰা হয়। এতিয়ালৈকে পাঁচখন সমবায় সমিতিক মুঠ ₹৮৫ লাখ অনুদান সাহায্য অনুমোদিত কৰা হৈছে। প্ৰাথমিক কৃষি ঋণ সমিতিৰ জৰিয়তে গঠন হোৱা ১,১১৭টাকে ধৰি সমবায় খণ্ডত ১৮৬৩টা কৃষক উৎপাদক সংস্থা (এফ পি অ’) পঞ্জীয়ন কৰিছে নিগমে।

বিত্তীয় প্ৰদৰ্শন আৰু প্ৰতিষ্ঠানিক সম্প্ৰসাৰণৰ বাবে এনচিডিচিৰ বিষয়া, সাধাৰণ পৰিষদৰ সদস্য আৰু কৰ্মচাৰীসকলক অভিনন্দন জনাই শ্বাহে আস্থা প্ৰকাশ কৰে যে নিগমে ইয়াৰ বিত্তীয় ক্ষমতা আৰু পেছাদাৰী কাৰ্যকলাপ শক্তিশালী কৰি গ্ৰাম্য সমৃদ্ধি, নিযুক্তি সৃষ্টি আৰু অৰ্থনৈতিক আত্মনিৰ্ভৰশীলতাৰ জৰিয়তে 'সহকার চে সমৃদ্ধি' ৰ লক্ষ্যত উপনীত হ'বলৈ এক গুৰুত্বপূৰ্ণ ভূমিকা পালন কৰিব।

--------

হিন্দুস্থান সমাচাৰ / মনোজ কুমাৰ শইকীয়া