ৰিয়াদ/ৱাশ্বিংটন, ২২ অক্টোবৰ (হি.স.)। য়েমেনৰ হুতি বিদ্ৰোহীৰ অব্যাহত থকা মাৰাত্মক আক্ৰমণৰ মাজতে আমেৰিকাই ছৌদি আৰৱত থকা দূতাবাসৰ অপ্ৰয়োজনীয় কৰ্মচাৰী আৰু তেওঁলোকৰ পৰিয়ালক দেশ এৰি যাবলৈ নিৰ্দেশ দিছে । তদুপৰি সংযুক্ত আৰব আমিৰশ্বাহী (ইউ এ ই), জৰ্ডান, কাটাৰ, বাহৰেইনত নিয়োজিত আমেৰিকাৰ কূটনৈতিক কৰ্মচাৰীৰ পৰিয়ালক খালী কৰাৰ প্ৰক্ৰিয়াও চলি থকা বুলি জানিব পৰা গৈছে। পশ্চিম এছিয়াত বৃদ্ধি পোৱা সামৰিক উত্তেজনাৰ মাজতে আমেৰিকাৰ এই পদক্ষেপক অঞ্চলটোৰ গুৰুতৰ নিৰাপত্তাজনিত উদ্বেগৰ সৈতে জড়িত কৰা হৈছে।

আন্তঃৰাষ্ট্ৰীয় সংবাদ মাধ্যম জিঅ’ নিউজৰ মতে, বুধবাৰে আমেৰিকাৰ বিদেশ মন্ত্ৰালয়ে নিশ্চিত কৰিছে যে ছৌদি আৰৱত নিয়োজিত আমেৰিকা চৰকাৰৰ কৰ্মচাৰী আৰু তেওঁলোকৰ পৰিয়ালক যদি তেওঁলোকৰ উপস্থিতিৰ তাৎক্ষণিক প্ৰয়োজন নহয় তেন্তে দেশ এৰি যাবলৈ নিৰ্দেশ দিছে । বিভাগৰ মুখপাত্ৰ টমী পিগটে ছ’চিয়েল মিডিয়া প্লেটফৰ্ম এক্সত কয় যে কৰ্মচাৰী আৰু তেওঁলোকৰ পৰিয়ালৰ সুৰক্ষা আমেৰিকাৰ শীৰ্ষ অগ্ৰাধিকাৰ।

তেওঁ এই সিদ্ধান্তক ছৌদি আৰৱৰ বিমানবন্দৰকে ধৰি বিভিন্ন লক্ষ্যত হুতিয়ে কৰা আক্ৰমণৰ সৈতে জড়িত কৰিছিল। অৱশ্যে এটা কূটনৈতিক সূত্ৰই জনোৱা মতে, ছৌদি আৰৱত থকা আমেৰিকাৰ দূতাবাসত থকা সকলো আমেৰিকান কৰ্মচাৰী আৰু তেওঁলোকৰ পৰিয়ালক যাবলৈ নিৰ্দেশ দিয়া হৈছে। বিদেশ বিভাগৰ চৰকাৰী বিবৃতিত অৱশ্যে কেৱল অপ্ৰয়োজনীয় কৰ্মচাৰী আৰু তেওঁলোকৰ পৰিয়ালৰ কথাহে উল্লেখ কৰা হৈছে।

চলিত মাহত ইৰাণ সমৰ্থিত হাউথী বিদ্ৰোহীয়ে প্ৰায় দৈনিক ছৌদি আৰৱত আক্ৰমণ চলাই আহিছে। বাতৰি অনুসৰি ইয়াৰ ভিতৰত ৰিয়াদ আন্তঃৰাষ্ট্ৰীয় বিমানবন্দৰত হোৱা আক্ৰমণো আছিল, যিটোক শেহতীয়া বছৰবোৰত হোৱা অন্যতম মাৰাত্মক আক্ৰমণ বুলি অভিহিত কৰা হৈছে।

বুধবাৰে ছৌদি আৰৱৰ শক্তি মন্ত্ৰালয়ে তেল কেন্দ্ৰক লক্ষ্য কৰি ড্ৰ’ন নিক্ষেপ কৰা বুলি প্ৰকাশ কৰে। অৱশ্যে ড্ৰ’নখনৰ ধ্বংসাৱশেষৰ ফলত দুজন লোকৰ মৃত্যু হোৱাৰ লগতে দুজন লোক আহত হয়। নিহতসকলৰ ভিতৰত এজন ফিলিপাইনছ আৰু এজন নেপালী নাগৰিক আছে। ইউ এ ইৰ সীমান্তৰ সমীপৰ শ্বায়বাহ তৈলখাদক লক্ষ্য কৰি ড্ৰ’নখন কোনে পঠিয়াইছিল সেই কথা স্পষ্ট কৰা নাই বিষয়াসকলে।

ইয়াৰ পূৰ্বে বুধবাৰে য়েমেনত চৌদি আৰৱ নেতৃত্বাধীন মিত্ৰজোঁটে ছখন ড্ৰ’ন গুলীয়াই পেলোৱাৰ বাতৰি প্ৰকাশ কৰিছিল । এই সঘনাই আক্ৰমণে অঞ্চলটোৰ শক্তি স্থাপন আৰু সাধাৰণ নাগৰিকৰ সুৰক্ষাৰ প্ৰতি উদ্বেগ প্ৰকাশ কৰিছে। য়েমেনত দীৰ্ঘদিন ধৰি চলি থকা সংঘাতই ইতিমধ্যে আঞ্চলিক নিৰাপত্তা পৰিস্থিতি আৰু অধিক ভয়াৱহ কৰি তুলিছে। ২০১৫ চনৰ পৰা ছৌদি আৰৱৰ নেতৃত্বত গঠিত মিত্ৰজোঁটে আন্তঃৰাষ্ট্ৰীয় স্বীকৃতিপ্ৰাপ্ত য়েমেন চৰকাৰক সমৰ্থন আগবঢ়াই আহিছে, আনহাতে হুতি বিদ্ৰোহীয়ে দেশখনৰ বৃহৎ অংশ নিয়ন্ত্ৰণ কৰে।

খবৰ অনুসৰি যুদ্ধবিৰতি ভংগ হোৱাৰ পিছৰে পৰা পুনৰ হিংসাত্মক পৰিস্থিতিৰ সৃষ্টি হৈছে, যাৰ ফলত ছৌদি আৰৱ আৰু চুবুৰীয়া দেশসমূহত আক্ৰমণৰ আশংকা বৃদ্ধি পাইছে ।

--------------

হিন্দুস্থান সমাচাৰ / অৰৱিন্দ