- উদ্ধোধনী দিনত ভাৰতৰ তৃতীয় পদক

নাগোয়া, ১৯ অক্টোবৰ (হি.স.)। এছিয়ান পেৰা গেমছত সোমবাৰে ব্ৰঞ্জৰ পদক লাভ কৰি ভাৰতীয় পেৰা জুডো খেলুৱৈ কপিল পাৰমাৰে দেশলৈ গৌৰৱ কঢ়িয়াই আনে। মধ্যপ্ৰদেশৰ চেহোৰৰ বাসিন্দা কপিলে আইচি প্ৰিফেকচাৰেল মাৰ্শ্বেল আৰ্টছ হলত পুৰুষৰ জে১-৭০ কেজি ব্ৰঞ্জৰ পদক প্ৰতিযোগিতাত মাত্ৰ এক মিনিট ৯ ছেকেণ্ডত ইপ’নৰ জৰিয়তে ইণ্ডোনেছিয়াৰ ৰাফ্লি আহনাফ শ্বিডকিক পৰাস্ত কৰে। প্ৰতিযোগিতাৰ উদ্বোধনী দিনটোত ভাৰতৰ এইটোৱেই আছিল তৃতীয়টো পদক।

পেৰিছ পেৰালিম্পিকৰ ব্ৰঞ্জৰ পদক বিজয়ী কপিলে ছেমিফাইনেলত পৰাজয়ৰ পৰা উল্লেখযোগ্য প্ৰত্যাৱৰ্তন কৰি পদক লাভ কৰে। বিশ্বৰ অষ্টম স্থানত থকা কপিলে ১৭ নং স্থানৰ ইণ্ডোনেছিয়ান খেলুৱৈ শ্বিডকিক পৰাস্ত কৰি প’ডিয়ামত স্থান লাভ কৰে।

ব্ৰঞ্জৰ পদক মেচখনত প্ৰৱেশ কৰিবলৈ কপিলে কোৱাৰ্টাৰ ফাইনেলত মংগোলিয়াৰ বাটাৰছুৰেন বেট-এৰ্ডেনৰ বিৰুদ্ধে কঠিন প্ৰত্যাহ্বানৰ সন্মুখীন হ’বলগীয়া হয়। দুয়োৰে মাজত ড্ৰ’ হোৱাৰ পিছত চাৰি মিনিট ৫৩ ছেকেণ্ডৰ সোণালী স্ক’ৰৰ মেচখনৰ অন্তত কপিলে ইপ’নেৰে জয়লাভ কৰি ছেমিফাইনেলত প্ৰৱেশ কৰে।

অৱশ্যে সোণৰ পদক মেচখনত প্ৰৱেশৰ আশাক ভেঙুচালি কৰিলে ইণ্ডোনেছিয়াৰ জুনাইডিয়ে ছেমিফাইনেলত। জুনাইদীয়ে কপিলক ইপ্পনেৰে পৰাস্ত কৰে। এই পৰাজয়ৰ মাজতো ভাৰতীয় খেলুৱৈগৰাকীয়ে নিৰুৎসাহিত হৈ মাত্ৰ ৬৯ ছেকেণ্ডত ব্ৰঞ্জৰ পদক মেচখন লাভ কৰে।

২০১৭ চনৰ পৰা আন্তঃৰাষ্ট্ৰীয় পৰ্যায়ত সক্ৰিয় হৈ আছে কপিল

দৃষ্টিহীন খেলুৱৈৰ বাবে জে ১ শাখাত প্ৰতিদ্বন্দ্বিতা কৰা কপিলে ২০১৭ চনৰ পৰা পেৰা জুডোত সক্ৰিয় হৈ আছে । প্ৰশিক্ষক মুনাৱাৰ আঞ্জাৰ আলী ছিদ্দিকীৰ নিৰ্দেশনাত তেওঁ আন্তঃৰাষ্ট্ৰীয় পৰ্যায়ত নিজৰ নাম উজলাই তুলিছে। ২০২৪ চনৰ পেৰিছ পেৰালিম্পিকত ব্ৰঞ্জৰ পদক, হাংঝোত অনুষ্ঠিত হোৱা শেষৰ এছিয়ান পেৰা গেমছত ৰূপৰ পদক আৰু ২০১৯ চনৰ কমনৱেলথ জুডো চেম্পিয়নশ্বিপত স্বৰ্ণ পদক লাভ কৰিছে। আই বি এছ এ গ্ৰেণ্ড প্ৰিক্সতো অসংখ্য খিতাপ জয় কৰাৰ লগতে সাতবাৰৰ ৰাষ্ট্ৰীয় চেম্পিয়ন।

ক্ৰীড়াৰ প্ৰতি আগবঢ়োৱা অনবদ্য অৱদানৰ বাবে কপিলক ২০২৪-২৫ বৰ্ষৰ বাবে অৰ্জুন বঁটাৰে সন্মানিত কৰা হৈছে। টাৰ্গেট অলিম্পিক প’ডিয়াম আঁচনিৰ অধীনতো তেওঁক অন্তৰ্ভুক্ত কৰা হৈছে। এছিয়ান পেৰা গেমছত তেওঁৰ ব্ৰঞ্জৰ পদক ভাৰতীয় পেৰা জুডোৰ বাবে আন এক উল্লেখযোগ্য কৃতিত্ব।

-----------------

হিন্দুস্থান সমাচাৰ / অৰৱিন্দ