ছিউল, ১৫ অক্টোবৰ (হি.স.)। উত্তৰ কোৰিয়াই বুধবাৰে পূব সাগৰত দুবিধ চাবমেৰিনৰ পৰা নিক্ষেপ কৰা কৌশলগত ক্ৰুজ মিছাইল পৰীক্ষা কৰে বুলি বৃহস্পতিবাৰে কোৰিয়াৰ চৰকাৰী কেন্দ্ৰীয় সংবাদ সংস্থাই প্ৰকাশ কৰিছে।

দক্ষিণ কোৰিয়াৰ চৰকাৰী সংবাদ সংস্থা য়নহাপে কেচিএনএৰ উদ্ধৃতি দি কয় যে এই পৰীক্ষাৰ লক্ষ্য হৈছে পানীৰ তলৰ অস্ত্ৰ ব্যৱস্থাৰ বৰ্তমানৰ প্ৰস্তুতি মূল্যায়ন কৰা । নৌসেনাৰ কৌশলগত অভিযান চলোৱাৰ ক্ষমতা পৰীক্ষা কৰাৰ লগতে দেশৰ নিবাৰণকাৰী অস্ত্ৰৰ নিৰ্ভৰযোগ্যতা আৰু ফলপ্ৰসূতা প্ৰদৰ্শন কৰা বুলি সংস্থাটোৱে কয় ।

খবৰ অনুসৰি এই ক্ষেপণাস্ত্ৰ পৰীক্ষাৰ তদাৰক কৰিছিল কোৰিয়াৰ শাসকীয় শ্ৰমিক দলৰ কেন্দ্ৰীয় সামৰিক আয়োগৰ সদস্য কিম জং-চিক, মিছাইল প্ৰশাসনৰ সঞ্চালক প্ৰধান জাং চাং-হা আৰু নৌসেনাৰ চাবমেৰিন ভিত্তিক অস্ত্ৰ ব্যৱস্থাৰ সৈতে জড়িত অভিযন্তাসকলে।

সোমবাৰে উত্তৰ কোৰিয়াই পিয়ংইয়াং অঞ্চলৰ পৰা পূব সাগৰৰ ফালে কৌশলগত বেলিষ্টিক ক্ষেপণাস্ত্ৰ পৰীক্ষা কৰাৰ মাত্ৰ কেইদিনমানৰ পিছতে এই বিকাশ ঘটিছে। উত্তৰ কোৰিয়াই মঙলবাৰে কয় যে এই পৰীক্ষাৰ লক্ষ্য হৈছে এটা মূল উপাদান প্ৰযুক্তিগতভাৱে উন্নীতকৰণৰ গৱেষণাৰ সফলতা নিশ্চিত কৰা ।

শেহতীয়াকৈ ক্ৰুজ মিছাইল পৰীক্ষাৰ জৰিয়তে উত্তৰ কোৰিয়াই নিজৰ ছাবমেৰিন ভিত্তিক অস্ত্ৰ ব্যৱস্থাৰ প্ৰস্তুতি পৰীক্ষা কৰাত গুৰুত্ব আৰোপ কৰিছে। কিন্তু কেচিএনএৰ প্ৰতিবেদনত ক্ষেপণাস্ত্ৰৰ পৰিসৰ, পৰীক্ষাৰ বিশদ কাৰিকৰী ফলাফল, বা ব্যৱহৃত ছাবমেৰিনৰ বিষয়ে কোনো তথ্য দিয়া হোৱা নাই।

-----------------

হিন্দুস্থান সমাচাৰ / অৰৱিন্দ