–ইংলেণ্ডৰ বিৰুদ্ধে দিন নিশাৰ টেষ্টৰ বাবে অষ্ট্ৰেলিয়াই পৰিধান কৰিব বিশেষ সেউজীয়া আৰু সোণালী জাৰ্চি
নতুন দিল্লী, ১২ অক্টোবৰ (হি.স.)। অহা বছৰৰ মাৰ্চত ইংলেণ্ডৰ বিৰুদ্ধে অনুষ্ঠিত হ’বলগীয়া ১৫০ বছৰীয়া ঐতিহাসিক টেষ্টৰ বাবে অষ্ট্ৰেলিয়াৰ পুৰুষ ক্ৰিকেট দলটোৱে বিশেষ সেউজীয়া আৰু সোণালী জাৰ্চি পৰিধান কৰিব। ক্ৰিকেট অষ্ট্ৰেলিয়াই সোমবাৰে উন্মোচন কৰে ক্ৰীড়া সঁজুলি নিৰ্মাতা কোম্পানী এছিকছৰ সহযোগত নিৰ্মাণ কৰা এই বিশেষ কিটটো। ১১ মাৰ্চৰ পৰা মেলবৰ্ণ ক্ৰিকেট খেলপথাৰত অনুষ্ঠিত হ’ব এই খেলখন।
টেষ্ট মেচৰ ১৫০ বছৰীয়া জয়ন্তী উপলক্ষে মুকলি কৰা হৈছিল এই বিশেষ জাৰ্চি। ইয়াত অষ্ট্ৰেলিয়াৰ পৰম্পৰাগত টেষ্ট সাজ-পোছাকৰ কিছু পৰিৱৰ্তন কৰা হৈছে। জাৰ্চিখনত পূৰ্বে সোণালী বক ফুলৰ পৰা অনুপ্ৰাণিত সজ্জা আছিল, যিবোৰৰ ঠাইত এতিয়া সোণালী ৰেখাৰে ৰূপ দিয়া হৈছে। চাৰ্টটোত সেউজীয়া ৰেখাও সংযোজন কৰা হৈছে।
জাৰ্চিটোৰ কলাৰ, চাৰ্ট, পেণ্টত সোণালী ৰঙৰ ৰেখা থাকিব আৰু বুটামবোৰো সোণালী ৰঙৰ হ’ব। ইয়াৰ উপৰিও হাতৰ আঁচলত বাৰ্ষিকী টেষ্টৰ বাবে বিশেষ ল’গ’ আৰু কিট নিৰ্মাতা এচিক্সৰ ল’গ’ও থাকিব।
ক্ৰিকেট অষ্ট্ৰেলিয়াই এক বিবৃতিত কয় যে সোণালী ৰঙে টেষ্ট ক্ৰিকেটৰ ঐতিহ্য, কৃতিত্ব, আৰু অবিৰত উৎকৰ্ষতাৰ প্ৰতীক। সংস্থাটোৰ মতে, ডিজাইনাৰসকলৰ লক্ষ্য আছিল এই ঐতিহাসিক অনুষ্ঠানৰ প্ৰতিপত্তি আৰু তাৎপৰ্য্য প্ৰতিফলিত কৰাৰ লগতে অষ্ট্ৰেলিয়াৰ আইকনিক টেষ্ট ইউনিফৰ্মৰ পৰম্পৰাগত পৰিচয় বজাই ৰখা।
ক্ৰিকেট অষ্ট্ৰেলিয়াৰ মুখ্য বাণিজ্যিক বিষয়া এড চেণ্ডাৰছে কয় যে, আমি আমাৰ দলসমূহৰ বাবে বিশেষ ইউনিফৰ্ম কেৱল অতি উল্লেখযোগ্য অনুষ্ঠানৰ বাবেহে তৈয়াৰ কৰো। আমি এছিকছক ধন্যবাদ জনাইছো যে তেওঁ ১৫০ বছৰীয়া টেষ্ট ক্ৰিকেটৰ সন্মানৰ বাবে সোণালী ৰং অন্তৰ্ভুক্ত কৰি এনে এটা সাজ-পোছাক সৃষ্টি কৰিছে।
কান্ধত থাকিব আদিবাসী শিল্পীৰ শিল্পকৰ্ম
বিশেষ কিটটোত অষ্ট্ৰেলিয়ান দলৰ বৰ্তমানৰ টেষ্ট ইউনিফৰ্মৰ বাকী অংশৰ কোনো পৰিৱৰ্তন কৰা হোৱা নাই। কান্ধত প্ৰখ্যাত আদিবাসী শিল্পী আন্টি ফিয়না ক্লাৰ্কৰ শিল্পকৰ্মও প্ৰদৰ্শিত হ’ব। লেণ্ড এণ্ড ছি শীৰ্ষক এই শিল্পকৰ্মটোত ৱাকবাউট উইকেটৰ মটিফ আছে। ১৮৬৮ চনত ইংলেণ্ড ভ্ৰমণ কৰা অষ্ট্ৰেলিয়াৰ প্ৰথমটো বহিঃৰাজ্য ভ্ৰমণকাৰী ক্ৰিকেট দল এবৰিজিনেল একাদশৰ প্ৰতি এই শ্ৰদ্ধাঞ্জলিৰ সম্প্ৰসাৰণ।
প্ৰথম তিনিদিনৰ সকলো টিকট বিক্ৰী
১৫০ বছৰীয়া এই টেষ্টটো হ’ব দিন-ৰাতিৰ খেলখনত গোলাপী বলৰ সৈতে খেলা হ’ব। ক্ৰিকেট অষ্ট্ৰেলিয়াৰ তথ্য অনুসৰি খেলখনৰ প্ৰথম তিনিদিনৰ সকলো ৰাজহুৱা টিকট বিক্ৰী হৈ গৈছে।
মাৰ্চ মাহত অষ্ট্ৰেলিয়াত ঘৰুৱা টেষ্ট ক্ৰিকেটৰ প্ৰত্যাৱৰ্তনও এই মেচখনৰ এক উল্লেখযোগ্য দিশ হ’ব। ইয়াৰ পূৰ্বে ১৯৭৯ চনৰ মাৰ্চ মাহত পাকিস্তানৰ বিৰুদ্ধে অষ্ট্ৰেলিয়াই দুখন টেষ্ট মেচ আয়োজন কৰিছিল।
অষ্ট্ৰেলিয়াৰ মুখামুখি হৈছে ব্যস্ত টেষ্ট সূচী
এই মেচখন হ’ব অষ্ট্ৰেলিয়াৰ ঘৰুৱা ক্ৰিকেট ছিজনৰ এক আকৰ্ষণ। পেট কামিন্সৰ নেতৃত্বত গঠিত দলটোৰ সন্মুখত ব্যস্ততা। আগষ্টৰ পৰা আৰম্ভ হ’বলগীয়া ১২ মাহৰ চক্ৰত অষ্ট্ৰেলিয়াই ২১খন টেষ্ট মেচলৈকে খেলিব পাৰে।
বৰ্তমান দলটোৱে দক্ষিণ আফ্ৰিকাৰ বিৰুদ্ধে তিনিখন টেষ্ট শৃংখলাৰ প্ৰথমখন মেচ খেলি আছে। ইয়াৰ পিছতে ঘৰুৱা ক্ষেত্ৰত নিউজিলেণ্ডৰ বিৰুদ্ধে চাৰিখন টেষ্ট মেচ অনুষ্ঠিত হ’ব। ইয়াৰ পিছতে অষ্ট্ৰেলিয়াই ভাৰত ভ্ৰমণ কৰি পাঁচখন টেষ্ট বৰ্ডাৰ-গাভাস্কাৰ ট্ৰফী শৃংখলা খেলিব আৰু তাৰ পিছত মেলবৰ্ণত বাৰ্ষিকী টেষ্টৰ বাবে উভতি আহিব।
ইয়াৰ পিছত অষ্ট্ৰেলিয়াই ইংলেণ্ডত অনুষ্ঠিত হ’বলগীয়া সম্ভাৱ্য বিশ্ব টেষ্ট চেম্পিয়নশ্বিপৰ ফাইনেল আৰু তাৰ পিছত পাঁচখন টেষ্ট এছেছ ছিৰিজৰ মুখামুখি হ’ব।
-----------------
হিন্দুস্থান সমাচাৰ / অৰৱিন্দ
