ৱাশ্বিংটন/কাৰাকাছ/নতুন দিল্লী, ০৪ জানুৱাৰী (হি.স.)। ভেনিজুৱেলাৰ পৰিস্থিতিয়ে এক জটিল আৰু অসাধাৰণ টাৰ্নিং পইণ্টত উপনীত হৈছে। আমেৰিকাৰ ৰাষ্ট্ৰপতি ড’নাল্ড ট্ৰাম্পে দাবী কৰিছে যে আমেৰিকাই বৃহৎ সামৰিক অভিযানৰ জৰিয়তে ভেনিজুৱেলাৰ ৰাষ্ট্ৰপতি নিকোলাছ মাদুৰোক গ্ৰেপ্তাৰ কৰিছে আৰু বৰ্তমান আমেৰিকাৰ নিয়ন্ত্ৰণত আছে ভেনিজুৱেলা। ট্ৰাম্পৰ মতে, ভেনিজুৱেলাৰ ৰাজনৈতিক আৰু নিৰাপত্তা পৰিস্থিতি স্বাভাৱিক নোহোৱালৈকে আমেৰিকাই ভেনিজুৱেলাৰ দায়িত্ব গ্ৰহণ কৰিব।
ভেনিজুৱেলাৰ অভিযানৰ পিছত সংবাদমেলত ট্ৰাম্পে কয় যে এই অভিযান পুংখানুপুংখভাৱে পৰিকল্পিত আৰু ই আমেৰিকাৰ সামৰিক শক্তিৰ অভূতপূৰ্ব প্ৰদৰ্শনক প্ৰতিনিধিত্ব কৰে। তেওঁ কয় যে দ্বিতীয় বিশ্বযুদ্ধৰ পিছত এই পৰিসৰৰ সামৰিক অভিযান প্ৰায় কোনো দেশেই কৰা নাই। ট্ৰাম্পে আমেৰিকাৰ সৈন্যক প্ৰশংসা কৰি কয় যে বিশ্বৰ আন কোনো দেশেই ইমান সাহস, গতি আৰু নিখুঁততা প্ৰদৰ্শন কৰিব নোৱাৰে।
আমেৰিকাৰ জইন্ট চীফ অৱ ষ্টাফৰ অধ্যক্ষ জেনেৰেল ডেন কেইনে কয় যে মাদুৰোক ধৰি লোৱাৰ অভিযানত ১৫০খনতকৈও অধিক বিমান জড়িত হৈ আছে। বায়ু, স্থল আৰু সাগৰৰ তিনিওটা ফ্ৰণ্টৰ পৰাই এই অভিযান চলোৱা হৈছিল। ট্ৰাম্পৰ মতে এই অভিযান ইমানেই সফল হৈছিল যে প্ৰথম আক্ৰমণৰ পিছত আৰু কোনো বৃহৎ আক্ৰমণৰ প্ৰয়োজন নাছিল। অৱশ্যে ভৱিষ্যতে পৰিস্থিতি অধিক অৱনতি হ’লে আমেৰিকাই পুনৰ ব্যৱস্থা ল’বলৈ সাজু বুলিও তেওঁ স্পষ্ট কৰি দিয়ে।
চাৰিখন চহৰ আক্ৰমণ, গ্ৰেপ্তাৰ মাদুৰো
ইয়াৰ পূৰ্বে যোৱা নিশা প্ৰায় ২ বজাত (শনিবাৰে ভাৰতীয় সময় অনুসৰি ১১:৩০ বজাত) ভেনিজুৱেলাৰ চাৰিখন চহৰত একেলগে সামৰিক আক্ৰমণ চলাইছিল আমেৰিকাই। খবৰ ওলাইছিল যে সেই সময়ত ৰাষ্ট্ৰপতি নিকোলাছ মাদুৰো এটা সামৰিক ঘাটিত শুই আছিল। আমেৰিকাৰ আক্ৰমণৰ পিছত মাদুৰোৱে এক বিবৃতি প্ৰকাশ কৰি প্ৰতিশোধৰ সতৰ্কবাণী আৰু দেশজুৰি জৰুৰীকালীন অৱস্থা ঘোষণা কৰে। অৱশ্যে তেওঁৰ বক্তব্যৰ প্ৰায় এঘণ্টাৰ পিছত ট্ৰাম্পে মাদুৰোক বন্দী কৰাৰ কথা ঘোষণা কৰে।
ট্ৰাম্পে কয় যে বৰ্তমান ভেনিজুৱেলাৰ পৰৱৰ্তী নেতা কোন হ’ব সেয়া স্পষ্ট নহয়। তেওঁ স্পষ্টকৈ কয় যে আমেৰিকাই নিবিচাৰে যে মাদুৰো চৰকাৰে নতুন মুখৰ জৰিয়তে ক্ষমতালৈ ঘূৰি আহি পুৰণি ব্যৱস্থাটো অব্যাহত ৰাখক। ক্ষমতাৰ ন্যায্য আৰু সুস্থিৰ হস্তান্তৰ নোহোৱালৈকে ভেনিজুৱেলাৰ বাবে আমেৰিকাই দায়বদ্ধ হৈ থাকিব।
তেল আৰু শক্তি মূল বিষয়
সংবাদমেলত ট্ৰাম্পক সোধা হৈছিল যে দক্ষিণ আমেৰিকাৰ এখন দেশত সামৰিক হস্তক্ষেপ তেওঁৰ “আমেৰিকা প্ৰথম” শ্লোগানৰ সৈতে কেনেদৰে মিল আছে। ইয়াৰ উত্তৰত ট্ৰাম্পে কয় যে এইটো তেওঁৰ আমেৰিকা ফাৰ্ষ্ট নীতিৰ সৈতে সম্পূৰ্ণৰূপে সামঞ্জস্যপূৰ্ণ, কিয়নো আমেৰিকাই ইয়াৰ চাৰিওফালে এটা সুস্থিৰ আৰু নিৰাপদ চুবুৰী বিচাৰে। তেওঁ কয় যে ভেনিজুৱেলাৰ তেল আৰু শক্তিৰ বিশাল সম্পদ আছে, যিবোৰ আমেৰিকা আৰু সমগ্ৰ বিশ্বৰ বাবে অতি প্ৰয়োজনীয়। আমেৰিকাই বিচাৰে যে এই সম্পদসমূহ সুৰক্ষিত আৰু সঠিকভাৱে ব্যৱহাৰ কৰা হওক।
আমেৰিকাৰ প্ৰতিৰক্ষা মন্ত্ৰীৰ বক্তব্য
আমেৰিকাৰ প্ৰতিৰক্ষা সচিব পিট হেগছেথেও এই কাৰ্য্যৰ পক্ষ লয় আৰু কয় যে মাদুৰো চৰকাৰক আগতীয়াকৈ সকীয়াই দিয়া হৈছে। তেওঁৰ মতে, গাফিলতি আৰু সতৰ্কবাণীক আওকাণ কৰাৰ মূল্য মাদুৰো চৰকাৰে দিছিল।
ভাৰতৰ তৰফৰপৰা পৰামৰ্শ
ভেনিজুৱেলাৰ দ্ৰুতগতিত বিকশিত হোৱা পৰিস্থিতিৰ প্ৰতি লক্ষ্য ৰাখি ভাৰত চৰকাৰেও সাৱধানতা অৱলম্বন কৰিছে। বৈদেশিক পৰিক্ৰমা মন্ত্ৰালয়ে ভাৰতীয় নাগৰিকসকলক ভেনিজুৱেলালৈ অপ্ৰয়োজনীয় যাত্ৰা পৰিহাৰ কৰিবলৈ পৰামৰ্শ দিছে। তদুপৰি যিকোনো কাৰণত ভেনিজুৱেলাত উপস্থিত থকা ভাৰতীয় নাগৰিকসকলক অত্যন্ত সাৱধানতা অৱলম্বন কৰিবলৈ, নিজৰ চলাচল সীমিত কৰিবলৈ আৰু কাৰাকাছত থকা ভাৰতীয় দূতাবাসৰ সৈতে যোগাযোগ ৰাখিবলৈ পৰামৰ্শ দিয়া হৈছে।
ভেনিজুৱেলা বৰ্তমান গভীৰ ৰাজনৈতিক, সামৰিক আৰু মানৱীয় সংকটৰ সন্মুখীন হৈছে। আমেৰিকাৰ এই কাৰ্য্যই কেৱল লেটিন আমেৰিকাতে নহয়, বিশ্বৰ ৰাজনীতিতো আলোড়নৰ সৃষ্টি কৰিছে। অনাগত দিনত ভেনিজুৱেলাৰ ক্ষমতাৰ দিশ আৰু আন্তঃৰাষ্ট্ৰীয় পৰ্যায়ত এই সংকটৰ প্ৰভাৱ দেখাটো অতি গুৰুত্বপূৰ্ণ হ’ব।
हिन्दुस्थान समाचार / মনোজ কুমাৰ শইকীয়া
