নতুন দিল্লী, ০৩ জানুৱাৰী (হি.স.)। পশ্চিম বংগৰ হাওৰা আৰু অসমৰ গুৱাহাটীৰ মাজত চলিত বৰ্ষৰ আৰম্ভণিতে চলাচল আৰম্ভ হ'ব লগা দেশৰ প্ৰথমখন অত্যাধুনিক বন্দে ভাৰত স্লিপাৰ ট্ৰেইন শনিবাৰে নতুন দিল্লী ৰেলৱে ষ্টেচনত উপস্থিত হয়।
ৰে’ল মন্ত্ৰী অশ্বিনী বৈষ্ণৱে নতুন ৰে’লখন পৰিদৰ্শন কৰি ইয়াৰ আধুনিক বৈশিষ্ট্যৰ বিষয়ে সংবাদ মাধ্যমক অৱগত কৰে। চলিত মাহত প্ৰধানমন্ত্ৰী নৰেন্দ্ৰ মোদীয়ে উদ্বোধন কৰিব এই ৰে'ল।
ৰে’ল মন্ত্ৰীগৰাকীয়ে উল্লেখ কৰে যে ১৬টা দবাযুক্ত বন্দে ভাৰত স্লিপাৰ ট্ৰেইনখনৰ যাত্ৰী ক্ষমতা ৮২৩ আৰু ডিজাইন গতিবেগ প্ৰতি ঘণ্টাত ১৮০ কিলোমিটাৰ। ৰে’ল সুৰক্ষা আয়ুক্ত (চি আৰ এছ)ৰ দ্বাৰা পৰিদৰ্শন আৰু প্ৰমাণপত্ৰ প্ৰদান কৰা হৈছে। গুৱাহাটী আৰু কলকাতাৰ বাবে দুটা ৰেক ডেলিভাৰী কৰা হৈছে আৰু অনাগত দিনত উদ্বোধন কৰা হ’ব।
অশ্বিনী বৈষ্ণৱে উল্লেখ কৰে যে বন্দে ভাৰত স্লিপাৰ ট্ৰেইনখন সম্পূৰ্ণ নতুন ডিজাইনৰে নিৰ্মাণ কৰা হৈছে। তেওঁ কয় যে ১৯৭০ চনৰ ৰাজধানী এক্সপ্ৰেছৰ দৰে এই ৰে’লখন ৰে’ল যাত্ৰীসকলৰ বাবে নিশাৰ যাত্ৰাৰ অভিজ্ঞতাত এক বৃহৎ পৰিৱৰ্তন হ’ব। ৰে'ল খনৰ কোচ ডিজাইন, প্ৰপালচন চিষ্টেম, আৰু ড্ৰাইভাৰৰ কেবিনক এৰগ’নমিক ডিজাইনৰ বাবে পুনৰ ডিজাইন কৰা হৈছে। ডবাসমূহৰ মাজত নতুন ছেমি অটোমেটিক কপলাৰ স্থাপন কৰা হৈছে, যাৰ ফলত যাত্ৰাৰ সময়ত জোকাৰণি ৰোধ কৰা হৈছে।
ৰে’ল মন্ত্ৰীগৰাকীয়ে কয় আসনৰ নম্বৰকে ধৰি যাত্ৰীৰ সুবিধাৰ বাবে সমগ্ৰ ৰে’লখনত ব্ৰেইল ব্যৱহাৰ কৰা হৈছে। ওপৰৰ বাৰ্থত প্ৰৱেশৰ বাবে এৰগ’নমিক চিৰি আৰু গ্ৰীপ চাপৰ্টৰ ব্যৱস্থা কৰা হৈছে। যাত্ৰীৰ বাবে সুবিধাজনক বুলি অভিহিত কৰি বৈষ্ণৱে নিজেই চিৰি বগাই ওপৰৰ বাৰ্থত বহিল। ৰে'ল খনত চাহ আৰু জলপান ৰখাৰ বাবে ট্ৰে, ৰিডিং লাইট, হেংগাৰ, মোবাইল আৰু লেপটপ চাৰ্জিং পইণ্ট, মোবাইল হোল্ডাৰ, মেগাজিন হোল্ডাৰ আদি বিশেষ বৈশিষ্ট্য আছে। খিৰিকীৰ শ্বেড এনেদৰে ডিজাইন কৰা হৈছে যাতে যাত্ৰীসকলে নিজৰ প্ৰয়োজন অনুসৰি পোহৰ আৰু সূৰ্যৰ পোহৰ সামঞ্জস্য কৰিব পাৰে।
ৰে'ল খনত আধুনিক বীজাণুনাশক প্ৰযুক্তিৰে সজ্জিত কৰা হৈছে, যাৰ ফলত বায়ুত থকা ভাইৰাছ আৰু বেক্টেৰিয়াৰ ৯৯.৯৯% নাশ হয়। এই বৈশিষ্ট্য বন্দে ভাৰত চেয়াৰ ৰে'লতো উপলব্ধ।
সুৰক্ষাৰ বাবে বন্দে ভাৰত স্লিপাৰ ৰে'ল খনত চিচিটিভি কেমেৰা, অটোমেটিক ট্ৰেইন প্ৰটেকচন চিষ্টেম (একেভিএচিএইচ), উন্নত বৈদ্যুতিক ব্ৰেকিং চিষ্টেম, অগ্নিনিৰ্বাপক সঁজুলি, আৰু জৰুৰীকালীন টক-বেক ব্যৱস্থা আছে। উন্নত ছাচপেনচন আৰু শব্দ হ্ৰাস প্ৰযুক্তিয়ে দীৰ্ঘ দূৰত্বৰ যাত্ৰা অধিক আৰামদায়ক কৰি তুলিছে। ৰে’লখনৰ এচি ফাৰ্ষ্ট ক্লাছ ডবাত গৰম পানীৰ শ্বাৱাৰো আছে, যাৰ ফলত দীৰ্ঘ দূৰত্বৰ যাত্ৰাৰ সময়ত যাত্ৰীসকলৰ বাবে অধিক আৰাম নিশ্চিত কৰা হয়।
ৰে’ল মন্ত্ৰীগৰাকীয়ে উল্লেখ কৰে যে এই ৰে’লখনৰ খাদ্য, বিচনা চাদৰ, কম্বলৰ মানদণ্ডৰ প্ৰতি বিশেষ গুৰুত্ব দিয়া হৈছে।
প্ৰধানমন্ত্ৰী নৰেন্দ্ৰ মোদীয়ে সাধাৰণ জনতাৰ বাবে বিশেষকৈ মধ্যবিত্ত আৰু কম আয়ৰ পৰিয়ালৰ বাবে ৰেল যাত্ৰা সুলভ আৰু আৰামদায়ক কৰি তোলাৰ প্ৰতিশ্ৰুতিৰ লগত সংগতি ৰাখি ভাৰা যুক্তিসংগত ৰখা হৈছে। তেওঁ উল্লেখ কৰে যে ৰে’লখনে সন্ধিয়া দুয়োফালে যাত্ৰা কৰি পিছদিনা পুৱাই গন্তব্যস্থানত উপস্থিত হ’ব, যাৰ ফলত যাত্ৰীসকলে বিশ্বমানৰ নিশা ভ্ৰমণৰ অভিজ্ঞতা লাভ কৰিব।
ইয়াৰ পূৰ্বে বৃহস্পতিবাৰে এই ৰে’লৰ পথ ঘোষণা কৰাৰ সময়ত ৰে’ল মন্ত্ৰীগৰাকীয়ে উল্লেখ কৰিছিল যে ১৬টা ডবাযুক্ত এই ৰে’লখনত ১১টা এচি-৩ ডবা, ৪টা এচি-২ ডবা, আৰু ১টা এচি-১ ডবা থাকিব। এই ৰে’লখনত মুঠ যাত্ৰীৰ ক্ষমতা হ’ব ৮২৩ জন। প্ৰতিখন এচি-৩ ডবাত ৬৭ বা ৫৫ জন যাত্ৰী, এচি-২ ডবাত ৪৮ বা ৪৪ জন যাত্ৰী, আৰু এচি-১ ডবাত ২৪ জন যাত্ৰী বহিব পাৰিব। দুয়ো মূৰত ড্ৰাইভাৰৰ কেব থকা এচি-৩ ডবাত ২৮টাকৈ বাৰ্থ আছে।
তেওঁ উল্লেখ কৰে যে গুৱাহাটীৰ পৰা ৰে’লত অসমীয়া খাদ্য আৰু কলকাতাৰ পৰা (হাওৰা) ৰে’লত বাংলা খাদ্য পৰিবেশন কৰা হ’ব। নতুন স্থানীয় বিক্ৰেতাক খাদ্য সেৱাৰ বাবে ঠিকাদাৰী কৰা হ’ব। এই ৰে'লখনত প্ৰযুক্তিগতভাৱে উন্নত কম্বল, চাদৰ, আঠুৱা আৰু অন্যান্য সামগ্ৰী ধোৱা আৰু পৰিষ্কাৰ কৰাৰ বাবে বিশেষ ব্যৱস্থা থাকিব।
ৰে’ল মন্ত্ৰীৰ মতে, এচি-৩ৰ বাবে কলকাতা আৰু গুৱাহাটীৰ মাজত ভাড়া হ’ব প্ৰায় ২,৩০০ ₹ (খাদ্যকে ধৰি), এচি-২ৰ বাবে প্ৰায় ৩,০০০ ₹, আৰু এচি-১ৰ বাবে হ’ব ৩,৬০০ ₹। বন্দে ভাৰত স্লিপাৰৰ ভাড়া অপৰিৱৰ্তিত থাকিব। ৰে’ল মন্ত্ৰীগৰাকীয়েও ঘোষণা কৰিলে ভাড়াৰ নতুন সূত্ৰ। এচি-৩ৰ প্ৰতি কিলোমিটাৰ ভাড়া হ’ব ২.৪০ ₹, এচি-২ৰ বাবে ৩.১০ ₹, আৰু এচি-১ৰ ভাড়া হ’ব ৩.৮০₹।
হিন্দুস্থান সমাচাৰ / মনোজ কুমাৰ শইকীয়া
