নতুন দিল্লী, ০৮ ছেপ্টেম্বৰ (হি.স.)। ৰাষ্ট্ৰপতি দ্ৰৌপদী মুৰ্মুৱে সোমবাৰে কয় যে অভিযান্ত্ৰিক ৰপ্তানি প্ৰসাৰ পৰিষদ (ইইপিচি) ভাৰতৰ সকলো অংশীদাৰে দেশত উপলব্ধ প্ৰতিভা আৰু শক্তিৰ বাবে এক সক্ষম পৰিৱেশ তন্ত্ৰৰ ব্যৱস্থা কৰি ভাৰতক এক অগ্ৰণী উদ্ভাৱন অৰ্থনীতি হিচাপে গঢ়ি তোলাৰ প্ৰতিশ্ৰুতি গ্ৰহণ কৰিব লাগে। ইয়াত অনুষ্ঠিত ইইপিচি ইণ্ডিয়াৰ প্লেটিনাম জয়ন্তী উদযাপনত ভাষণ দি ৰাষ্ট্ৰপতি মুৰ্মুৱে কয় যে প্ৰাচীন কালত ভাৰতে আধ্যাত্মিক আৰু ব্যৱসায়িক দুয়োটা ক্ষেত্ৰতে বিশ্বক আগুৱাই লৈ গৈছিল। ভাৰতক পুনৰবাৰ জ্ঞান আৰু ব্যৱসায়ৰ অগ্ৰণী কেন্দ্ৰ হিচাপে গঢ়ি তোলাটো সকলো নাগৰিকৰ সংকল্প হ’ব লাগে। অৰ্থনৈতিক খণ্ডৰ এগৰাকী গুৰুত্বপূৰ্ণ অংশীদাৰ হোৱাৰ বাবে তেওঁ ইইপিচিক এই সংকল্প সম্পূৰ্ণ দৃঢ়তাৰে আগবঢ়াই নিবলৈ আহ্বান জনায়।

যোৱা ১০ বছৰত ভাৰতৰ অভিযান্ত্ৰিক ৰপ্তানি ৭০ বিলিয়ন ডলাৰৰ পৰা ১১৫ বিলিয়ন ডলাৰতকৈও অধিকলৈ বৃদ্ধি পোৱাত তেওঁ আনন্দ প্ৰকাশ কৰে। যোৱা দশকত আন্তঃৰাষ্ট্ৰীয় বাণিজ্যৰ প্ৰত্যাহ্বানৰ মাজতো এই কৃতিত্ব উল্লেখযোগ্য বুলিও কয় ছানীয়ে। এই সাফল্যত ই ই পি চিৰ অৱদানৰ বাবে ৰাষ্ট্ৰপতিয়ে প্ৰশংসা কৰে। তেওঁ কয় যে ই ই পি চিয়ে আন্তঃৰাষ্ট্ৰীয় বজাৰ আৰু ভাৰতীয় উৎপাদকসকলৰ মাজত এখন সেতু হিচাপে কাম কৰে। বিশ্ব বাণিজ্য ব্যৱস্থা আৰু আন্তঃৰাষ্ট্ৰীয় অৰ্থনৈতিক গাঁথনিৰ পৰিৱৰ্তনৰ মাজতে ইয়াৰ ভূমিকা আৰু অধিক গুৰুত্বপূৰ্ণ হৈ পৰিছে।

ৰাষ্ট্ৰপতিগৰাকীয়ে কয় যে ভাৰতে বিশ্ব বাণিজ্যৰ প্ৰত্যাহ্বানসমূহক সুযোগলৈ ৰূপান্তৰিত কৰিব লাগিব। ভাৰতৰ অভিযান্ত্ৰিক ৰপ্তানিৰ গন্তব্যস্থানসমূহ সাত দশকত বহু পৰিৱৰ্তন হৈছে আৰু ইইপিচিয়ে এই পৰিৱৰ্তিত প্ৰক্ৰিয়াটোক আৰু আগুৱাই নিব লাগে। কম খৰচত উচ্চমানৰ অভিযান্ত্ৰিক সামগ্ৰী আৰু সেৱা প্ৰদান কৰাটোৱেই হৈছে ভাৰতৰ আটাইতকৈ ডাঙৰ শক্তি। আজি বিশ্বৰ আগশাৰীৰ কোম্পানীসমূহৰ বিশ্বব্যাপী সামৰ্থ্য কেন্দ্ৰ ভাৰতত আছে। এনে পৰিস্থিতিত ভাৰতে অংশীদাৰসকলক উপযুক্ত প্ৰৰোচনা আৰু পৰিৱেশ তন্ত্ৰ প্ৰদান কৰি ভাৰতক বিশ্বব্যাপী উদ্ভাৱন কেন্দ্ৰ হিচাপে গঢ়ি তোলাৰ দিশত আগবাঢ়িব লাগে। তেওঁ এই কথাত গুৰুত্ব আৰোপ কৰে যে উদ্ভাৱন অৰ্থনীতি হৈছে আটাইতকৈ প্ৰতিযোগিতামূলক আৰু সমৃদ্ধিশালী অৰ্থনীতি আৰু ভাৰতক এই পথত আগুৱাই নিয়াটো সকলো অংশীদাৰৰ কৰ্তব্য।

हिन्दुस्थान समाचार / অৰৱিন্দ