ৱাশ্বিংটন (আমেৰিকা), ০৬ ছেপ্টেম্বৰ (হি.স.)। অহা বছৰ ২০২৬ চনত ফ্ল’ৰিডাৰ ড’ৰালত ৰাষ্ট্ৰপতি ড’নাল্ড জে ট্ৰাম্পৰ গ’ল্ফ কোৰ্চ আৰু স্পাত বিশ্বৰ নেতাসকলৰ গ্ৰুপ অৱ ২০ (জি-২০) শীৰ্ষ সন্মিলন অনুষ্ঠিত কৰিব আমেৰিকাই। শুকুৰবাৰে হোৱাইট হাউছৰ অভাল অফিচত মিয়ামীত জি-২০ সন্মিলন অনুষ্ঠিত কৰাৰ সিদ্ধান্ত ঘোষণা কৰে ট্ৰাম্পে।
চিবিএছ নিউজৰ এক প্ৰতিবেদন অনুসৰি ট্ৰাম্পে শীৰ্ষ সন্মিলনৰ প্ৰস্তুতিৰ দায়িত্ব নেশ্যনেল ইকনমিক কাউন্সিলৰ সঞ্চালক কেভিন হেছেটক অৰ্পণ কৰিছে। ৰাষ্ট্ৰপতিগৰাকীয়ে কয় যে বিত্তমন্ত্ৰী স্কট বেছাণ্টে এই সন্মিলনৰ কাৰ্যসূচী প্ৰস্তুত কৰি আছে। ইয়াৰ পিছত হোৱাইট হাউছে এক বিবৃতিত কয় যে ট্ৰাম্পে ড’ৰালত এই সন্মিলন আয়োজন কৰিব “খৰচৰ বিনিময়ত”। তেওঁ ষ্টেট ডিপাৰ্টমেণ্ট বা কোনো বিদেশী চৰকাৰৰ পৰা কোনো সুবিধা গ্ৰহণ নকৰে। এই সন্মিলন ২০২৬ চনৰ ১৪-১৫ ডিচেম্বৰত অনুষ্ঠিত হ’ব।
ট্ৰাম্পে ১৫ কোটি ডলাৰত ক্ৰয় কৰিছিল
ট্ৰাম্পে ২০২০ চনত এই ৰিজ’ৰ্টত জি-৭ শীৰ্ষ সন্মিলন অনুষ্ঠিত কৰাৰ পৰিকল্পনা কৰিছিল। ব্যাপক সমালোচনাৰ পিছত তেওঁ এই ধাৰণাটো পৰিত্যাগ কৰিছিল। অৱশেষত ক’ভিড-১৯ মহামাৰীৰ আৰম্ভণিৰ বাবেই এই সন্মিলন বাতিল কৰি ভাৰ্চুৱেলি অনুষ্ঠিত কৰা হয়। ২০১২ চনত ট্ৰাম্পে ১৫ কোটি ডলাৰত ক্ৰয় কৰিছিল এই ৰিজ’ৰ্টখন।
চাৰিটা গলফ খেলপথাৰ আছে
এইখন ১৯৬০ চনত প্ৰথমবাৰৰ বাবে মুকলি কৰা হৈছিল। মেট্ৰ’ মিয়ামিৰ ঘন জনবসতিপূৰ্ণ অঞ্চলত অৱস্থিত এইখন মিয়ামি আন্তঃৰাষ্ট্ৰীয় বিমানবন্দৰৰ বিমান পথৰ তলত অৱস্থিত। ইয়াত চাৰিটা গলফ খেলপথাৰ, ৪৮ হাজাৰ বৰ্গফুটৰ স্পা, ১২৫ ফুটৰ স্লাইড থকা এটা বিশাল পুল আৰু ২৪ হাজাৰ বৰ্গফুটতকৈও অধিক বলৰুম আছে। ট্ৰাম্পৰ ঘোষণাৰ সময়ত মিয়ামিৰ মেয়ৰ ফ্ৰান্সিছ ছুয়াৰেজ অ’ভেল অফিচত উপস্থিত আছিল।
আটাইতকৈ ডাঙৰ অৰ্থনৈতিক মঞ্চ
জি-২০ হৈছে ১৯খন দেশ আৰু আন দুটা গোট ইউৰোপীয় সংঘ আৰু আফ্ৰিকান ইউনিয়নক সামৰি লোৱা এক অৰ্থনৈতিক মঞ্চ, যিয়ে বিশ্বৰ অধিকাংশ বৃহৎ উন্নত আৰু উদীয়মান অৰ্থনীতিক প্ৰতিনিধিত্ব কৰে। জি-২০ ৱেবছাইটৰ তথ্য অনুসৰি বিশ্বৰ জিডিপিৰ প্ৰায় ৮৫ শতাংশ আৰু বিশ্ব বাণিজ্যৰ ৭৫ শতাংশতকৈ অধিক অংশ সদস্য দেশসমূহৰ। আমেৰিকা, কানাডা, জাপান আৰু অন্যান্য ইউৰোপীয় শক্তিসমূহক সামৰি লোৱা জি-৭তকৈ ই বৃহৎ আৰু ভৌগোলিকভাৱে অধিক বৈচিত্ৰ্যপূৰ্ণ।
সদস্য দেশসমূহৰ মাজত বৈঠকৰ স্থান বেলেগ বেলেগ আৰু এইবাৰৰ জি-২০ সন্মিলন নৱেম্বৰ মাহত দক্ষিণ আফ্ৰিকাত অনুষ্ঠিত হ’ব। ট্ৰাম্পে ইংগিত দিছে যে তেওঁ উপস্থিত থকাৰ পৰিকল্পনা কৰা নাই।
পোলেণ্ডৰ নৱনিৰ্বাচিত ৰাষ্ট্ৰপতিলৈ আমন্ত্ৰণ
বুধবাৰে হোয়াইট হাউছত অনুষ্ঠিত হ’বলগীয়া জি-২০ শীৰ্ষ সন্মিলনলৈ পোলেণ্ডৰ নৱনিৰ্বাচিত ৰাষ্ট্ৰপতি কেৰল নাৱৰ’কিক আমন্ত্ৰণ জনায় ৰাষ্ট্ৰপতিগৰাকীয়ে। প্ৰশাসনৰ এজন বিষয়াই কয় যে আমেৰিকাই “আতিথ্য বৰ্ষৰ বাবে মূল কথাবোৰলৈ ঘূৰি আহিব, শীৰ্ষ সন্মিলন আৰু ইয়াৰ সম্পৰ্কীয় পদ্ধতিসমূহ সুশৃংখলিত কৰিব আৰু জি-২০ৰ অৰ্থনৈতিক বৃদ্ধি আৰু বিত্তীয় স্থিতিশীলতাৰ মূল লক্ষ্যসমূহৰ সৈতে কাৰ্যসূচীক একাকাৰ কৰিব।” বিষয়াগৰাকীয়ে কয় যে হোৱাইট হাউছে আশা কৰিছে যে “শেহতীয়া জি-২০ সন্মিলনতকৈ অতিথি তালিকাখন সৰু হ’ব।”
हिन्दुस्थान समाचार / মনোজ কুমাৰ শইকীয়া
