ইছলামাবাদ, ২৬ আগষ্ট (হি.স.)। পাকিস্তানৰ ৰাৱালপিণ্ডিত এগৰাকী ১৬ বছৰীয়া আফগান ছোৱালীয়ে এজন বৃদ্ধৰ সৈতে বলপূৰ্বকভাৱে বিয়াত বহিবলৈ অস্বীকাৰ কৰে। আৰক্ষীয়ে যুৱতীগৰাকীৰ নাম নৌছাবা বুলি ঘোষণা কৰিছে। নৌছাবা আৰু তেওঁৰ মাতৃ শ্বাহনাজ বিবিক আফগানিস্তানলৈ প্ৰেৰণ কৰাৰ সিদ্ধান্ত লৈছে বিষয়াসকলে।

দ্য এক্সপ্ৰেছ ট্ৰিবিউনত প্ৰকাশিত এক প্ৰতিবেদনত আৰক্ষীয়ে জনোৱা মতে, ছোৱালীজনীক আফগান নাগৰিক মালে খানে আফগানিস্তানৰ পৰা আনিছিল। তেওঁ ছোৱালীজনীক ভায়েক গুল খানৰ লগত বিয়া দিব বিচাৰিছিল আৰু লগতে মাক-দেউতাকক কৰ্মসংস্থাপন দিয়াৰ প্ৰতিশ্ৰুতি দিছিল। পাহাৰীয়া বাটেৰে মাক-কন্যাই গাধত উঠি ৰাৱালপিণ্ডিত উপস্থিত হৈছিলৈ। চাৰ্চ ৰোডৰ মালে খানৰ ঘৰত তেওঁলোকক আদৰণি জনোৱা হয়।

আৰক্ষীৰ মতে, ছোৱালীজনীক গুল খানৰ সৈতে চিনাকি কৰাই দিয়া হৈছিল। ছোৱালীজনীয়ে বুঢ়া গুল খানক বিয়া কৰাবলৈ অস্বীকাৰ কৰি মাকক আফগানিস্তানলৈ উভতি যাবলৈ হেঁচা প্ৰয়োগ কৰে। তাই অস্বীকাৰ কৰাৰ পিছতো মালে খানে নিজৰ আত্মীয়ৰ সৈতে এজন মৌলৱীক ফোন কৰি জোৰকৈ বিবাহ কৰিবলৈ চেষ্টা কৰে। নৌছাবাৰ প্ৰতিবাদে চুবুৰীয়াক ক্ষুব্ধ কৰি তুলিলে। এই দেখি মৌলৱী পলাই গ'ল।

লগে লগে স্থানীয় ৰাইজে আৰক্ষীক ফোন কৰে। ইফালে মালে খানেও পলায়ন কৰে। আৰক্ষীয়ে মাতৃ-কন্যাক জিম্মাত লয়। দুয়োকে বিতাড়নৰ বাবে উপাযুক্তৰ আফগান কোষত গতাই দিয়া হয় কাৰণ তেওঁলোকৰ হাতত বৈধ ভ্ৰমণৰ নথি-পত্ৰ নাছিল। ৪৮ ঘণ্টাৰ ভিতৰত টৰ্খাম সীমান্তৰে নিজ নিজ দেশলৈ প্ৰেৰণ কৰা হ’ব। ৰাৱালপিণ্ডিৰ ধমিয়াল আৰক্ষীয়ে গোচৰ ৰুজু কৰি আইনী ব্যৱস্থা আৰম্ভ কৰিছে।

हिन्दुस्थान समाचार / মনোজ কুমাৰ শইকীয়া