ৱাশ্বিংটন, ৩১ জুলাই (হি.স.)। মাৰ্কিন নৌসেনাৰ এফ-৩৫ যুদ্ধ বিমান এখন দুৰ্ঘটনাগ্ৰস্ত হৈছে। বুধবাৰে মধ্য কেলিফৰ্ণিয়াৰ নেভাল এয়াৰ ষ্টেচন লেমুৰৰ ওচৰত সংঘটিত হয় এই বিমান দুৰ্ঘটনা। এই যুদ্ধ বিমানৰ পাইলট সুৰক্ষিত। নৌসেনাই কয় যে তদন্ত আৰম্ভ কৰা হৈছে।
নৌসেনাৰ বিবৃতি অনুসৰি বিমানখন মধ্য কেলিফৰ্ণিয়াৰ ফ্ৰেছনো চহৰৰ পৰা প্ৰায় ৪০ মাইল দক্ষিণ-পশ্চিমে থকা নেভাল এয়াৰ ষ্টেচনৰ ওচৰৰ এখন পথাৰত পৰি যায়। এই সময়তে ইয়াত জুই লাগিছিল। দুৰ্ঘটনাৰ সময়ত পাইলটজনে নিৰাপদে বাহিৰলৈ ওলাই যায়। সন্ধিয়া প্ৰায় ৬:৩০ বজাত সংঘটিত এই দুৰ্ঘটনাৰ কাৰণৰ তদন্ত অব্যাহত আছে।
ফ্ৰেছনো কাউন্টি শ্বেৰিফৰ কাৰ্যালয়ে জনোৱা মতে, কেলিফৰ্ণিয়া ফায়াৰে পাইলটজনক সহায় কৰিছিল। নৌসেনাই জনোৱা মতে, বিমানখন ষ্ট্ৰাইক ফাইটাৰ স্কোয়াড্ৰন ভিএফ-১২৫ (ৰাফ ৰেইডাৰ্ছ)লৈ অৰ্পন কৰা হৈছিল। ৰাফ ৰেইডাৰ্ছে পাইলট আৰু এয়াৰক্ৰুক প্ৰশিক্ষণ দিয়ে। এফ-৩৫ পঞ্চম প্ৰজন্মৰ যুঁজাৰু বিমান আৰু বিশ্বৰ অন্যতম উন্নত যুদ্ধ বিমান আৰু আমেৰিকাৰ সামৰিক বহৰৰ এক গুৰুত্বপূৰ্ণ অংশ।
ইয়াৰ ব্যয় প্ৰায় ১০ কোটি ডলাৰ। ইয়াৰ পূৰ্বে জানুৱাৰী মাহত আলাস্কাৰ আইলছন বায়ুসেনা ঘাটিত প্ৰশিক্ষণ অভিযানৰ সময়ত এ-৩৫এ বিমান দুৰ্ঘটনাগ্ৰস্ত হৈছিল। লকহিড মাৰ্টিন কোম্পানীয়ে জনোৱা মতে, বিশ্বৰ ১৭খনতকৈও অধিক দেশত এফ-৩৫ ব্যৱহাৰ কৰা হয়। শেহতীয়া বছৰবোৰত এই জেটখনে ৰক্ষণাবেক্ষণ আৰু কাৰ্য্যকৰী সমস্যাক লৈ অধিক নিৰীক্ষণৰ সন্মুখীন হৈছে।
হিন্দুস্থান সমাচাৰ / মনোজ কুমাৰ শইকীয়া
