ইছলামাবাদ, ৩১ জুলাই (হি.স.)। পাকিস্তান আৰু আমেৰিকাই বুধবাৰে নিশা ৱাশ্বিংটনত বাণিজ্যিক চুক্তি চূড়ান্ত কৰে। পাকিস্তানে এই সন্দৰ্ভত শুল্ক ৰেহাইৰ আশা প্ৰকাশ কৰিছে। যদিও পাকিস্তানে এই বাণিজ্যিক চুক্তিৰ সবিশেষ নিদিলেও আমেৰিকাৰ ৰাষ্ট্ৰপতি ড’নাল্ড জে ট্ৰাম্পে এই চুক্তিক পাকিস্তানৰ তেল মজুতৰ বিকাশত সহায় কৰাৰ লক্ষ্য হিচাপে উল্লেখ কৰিছে।

ডন কাকতৰ খবৰ অনুসৰি পাকিস্তানৰ বিত্তমন্ত্ৰী মহম্মদ ঔৰংজেব শুল্ক সন্দৰ্ভত আলোচনাৰ বাবে ৱাশ্বিংটনত আছে। বুধবাৰে তেওঁ আমেৰিকাৰ উচ্চপদস্থ বিষয়াৰ সৈতেও আলোচনাত মিলিত হয়। আমেৰিকাত থকা পাকিস্তান দূতাবাসে বৃহস্পতিবাৰে পুৱা ‘এক্স’ৰ ওপৰত ‘এটা বাণিজ্যিক চুক্তি’ চূড়ান্ত কৰাৰ কথা উল্লেখ কৰিছে। বৃহস্পতিবাৰে পুৱা ট্ৰাম্পে তেওঁৰ ট্ৰুথ ছ’চিয়েলত লিখিছে, আমি মাত্ৰ পাকিস্তানৰ সৈতে এক চুক্তিত স্বাক্ষৰ কৰিছো, যাৰ অধীনত পাকিস্তান আৰু আমেৰিকাই একেলগে কাম কৰি তেওঁলোকৰ বিশাল তেলৰ মজুত উন্নয়ন কৰিব। আমি এই অংশীদাৰিত্বৰ নেতৃত্ব দিয়া তেল কোম্পানীটো বিচাৰিছো।

ডনৰ মতে, কি শুল্কৰ হাৰত চুক্তিবদ্ধ হৈছে সেই সন্দৰ্ভত দুয়োপক্ষই এতিয়াও কোনো আনুষ্ঠানিক ঘোষণা কৰা নাই যদিও পাকিস্তানৰ দূতাবাসে কয় যে এই চুক্তিৰ ফলত শুল্ক হ্ৰাস পাব। আমেৰিকাৰ বাণিজ্য সচিব হাৱাৰ্ড লুটনিক আৰু আমেৰিকাৰ বাণিজ্য প্ৰতিনিধি ৰাষ্ট্ৰদূত জেমিছন গ্ৰীৰৰ মাজত হোৱা বৈঠকত এই চুক্তিত উপনীত হয়। এই বৈঠকত বাণিজ্য সচিব জৱাদ পল আৰু আমেৰিকাত পাকিস্তানৰ ৰাষ্ট্ৰদূত ৰিজৱান ছাইদ শ্বেখও উপস্থিত থাকে।

এই চুক্তি চূড়ান্ত কৰাৰ ক্ষেত্ৰত নেতৃত্বৰ ভূমিকা লোৱাৰ বাবে প্ৰধানমন্ত্ৰী শ্বাহবাজ শ্বৰীফে ট্ৰাম্পক ধন্যবাদ জনাইছে। বৈদেশিক মন্ত্ৰী ইছহাক দাৰেও আজি পুৱা বাণিজ্যিক চুক্তি নিশ্চিত কৰে যদিও কোনো সবিশেষ প্ৰকাশ কৰা নাই।

হিন্দুস্থান সমাচাৰ / মনোজ কুমাৰ শইকীয়া