বাৰ্লিন/ইছলামাবাদ, ৩১ জুলাই (হি.স.)। জাৰ্মান অলিম্পিকৰ স্বৰ্ণ পদক বিজয়ী বায়থলীট ল’ৰা ডাহলমেয়াৰৰ পাকিস্তানত পৰ্বত আৰোহণ কৰি থকা অৱস্থাত দুৰ্ঘটনাত মৃত্যু হয়। পাকিস্তানৰ কাৰাকোৰাম পৰ্বতমালাৰ লাইলা শৃংগত হঠাৎ হোৱা ভূমিস্খলনত আৱদ্ধ হৈ পৰাত ৩১ বছৰীয়া ল’ৰাই খোপনি ৰাখিব নোৱাৰিলে। দুবাৰৰ অলিম্পিক চেম্পিয়ন ল’ৰাৰ মৃত্যুত জাৰ্মান অলিম্পিক স্প’ৰ্টছ কনফেডাৰেচন আৰু পৰিয়ালটোৱে গভীৰ শোক প্ৰকাশ কৰিছে।
চিএনএন চেনেলৰ বাতৰি অনুসৰি ড’এছবিয়ে ল’ৰাৰ মৃত্যু নিশ্চিত কৰিছে। ২০১৮ চনৰ শীতকালীন অলিম্পিকত স্প্ৰিণ্ট আৰু পাৰ্ছুইট ইভেণ্টত পৃথকে পৃথকে সোণৰ পদক লাভ কৰা প্ৰথমগৰাকী মহিলা বায়থলীট হিচাপে পৰিগণিত হয় ল’ৰা ডাহলমেয়াৰ। ইয়াৰ পিছৰ বছৰ ২০১৯ চনত তেওঁ বিশ্ব চেম্পিয়নশ্বিপত পাঁচটা স্বৰ্ণ পদক লাভ কৰা প্ৰথমগৰাকী বায়থলীট হিচাপে পৰিগণিত হয়। ইয়াৰ পিছত তাই এই খেলৰ পৰা অৱসৰ লয়। বুধবাৰে তেওঁৰ পৰিচালনা দলে প্ৰকাশ কৰা এক বিবৃতিত কয় যে, বিদায় ল'ৰা। আপুনি আমাৰ জীৱন আৰু আন বহুতৰ জীৱন সমৃদ্ধ কৰিছে। আপোনাক বহুত মিছ কৰা হ'ব। আপোনাৰ কাৰ্যসূচীসমূহৰ সমন্বয়ৰ বাবে আপুনি আমাৰ ওপৰত যি আস্থা ৰাখিছে তাৰ বাবে ধন্যবাদ। আপোনাৰ সংগ্ৰামে আমাক আগবাঢ়ি যোৱাৰ সাহস দি থাকিব। শ্ৰদ্ধাঞ্জলি জনাই ডি অ’ এছ বিৰ সভানেত্ৰী ৱেইকাৰ্টে কয় যে, ল'ৰা ডাহলমেয়াৰে এৰি থৈ গৈছে এক সমৃদ্ধ উত্তৰাধিকাৰ। ক্ৰীড়াৰ প্ৰতি তেওঁৰ সমৰ্পণ, প্ৰকৃতিৰ প্ৰতি থকা তেওঁৰ আবেগ আৰু সমাজৰ প্ৰতি তেওঁৰ দায়বদ্ধতাই তেওঁক এক প্ৰেৰণাদায়ক ব্যক্তিত্ব কৰি তুলিছে।
সোমবাৰে স্থানীয় সময় অনুসৰি দুপৰীয়াৰ আশে-পাশে কাৰাকোৰাম পৰ্বতমালাৰ লাইলা শৃংগ আৰোহণৰ সময়তে তেওঁ পৰি যায় বুলি থমাছ ৱেইকাৰ্টে কয়। মঙলবাৰে ইনষ্টাগ্ৰামত তেওঁৰ সতীৰ্থ পৰ্বতাৰোহীসকলে এই দুখৰ খবৰটো শ্বেয়াৰ কৰে। বুধবাৰে তেওঁ কয় যে ড’এছবি আৰু সমগ্ৰ জাৰ্মান ক্ৰীড়া জগতখনে ল’ৰা ডাহলমেয়াৰৰ মৃত্যুত শোক প্ৰকাশ কৰিছে। আমাৰ সমবেদনা জ্ঞাপন কৰিলোঁ তাইৰ পৰিয়াল আৰু বন্ধু-বান্ধৱীলৈ।
গিলগিট-বাল্টিস্তান আঞ্চলিক চৰকাৰৰ মুখপাত্ৰ ফাইজুল্লাহ ফাৰাকে কয় যে দুৰ্বল দৃশ্যমানতা আৰু বেয়া বতৰৰ বাবে অভিযানে সামৰিক হেলিকপ্টাৰ নিয়োগ কৰিব পৰা নাছিল। সহযোগী পৰ্বতাৰোহীয়ে কয় যে উদ্ধাৰ অভিযানত জড়িত হেলিকপ্টাৰখন মঙলবাৰে পুৱাহে সেই স্থানত উপস্থিত হ’ব পাৰে। ডাহলমেয়াৰৰ মেনেজমেণ্টৰ এক বিবৃতি অনুসৰি খেলুৱৈগৰাকীয়ে বিশেষভাৱে অনুৰোধ কৰিছিল যে কোনো দুৰ্ঘটনা সংঘটিত হ’লে তেওঁক উদ্ধাৰ কৰিবলৈ বা তেওঁৰ মৃতদেহ উদ্ধাৰ কৰিবলৈ কোনেও নিজৰ জীৱন বিপন্ন কৰিব নালাগে।
হিন্দুস্থান সমাচাৰ / মনোজ কুমাৰ শইকীয়া