নতুন দিল্লী, ৩১ জুলাই (হি.স.)। ভাৰতীয় আমদানিৰ ওপৰত আমেৰিকাই আৰোপ কৰা শুল্ক সন্দৰ্ভত চৰকাৰৰ স্থিতিৰ বিষয়ে বৃহস্পতিবাৰে বাণিজ্য আৰু উদ্যোগ মন্ত্ৰী পীয়ুষ গোৱেলে সংসদক অৱগত কৰে। তেওঁ কয় যে ভাৰত চৰকাৰে নিজৰ জাতীয় স্বাৰ্থ সুৰক্ষিত আৰু আগুৱাই নিয়াৰ বাবে সকলো পদক্ষেপ গ্ৰহণ কৰিব। বৰ্তমান চৰকাৰে এই শুল্কৰ প্ৰভাৱৰ মূল্যায়ন কৰি আছে।

লোকসভাত দুবাৰকৈ স্থগিত ৰখাৰ পিছত বিয়লি ৪ বজাত যেতিয়া কাৰ্য্যবিধি আৰম্ভ হয়, তেতিয়া কেন্দ্ৰীয় মন্ত্ৰীগৰাকীয়ে প্ৰথমে লোকসভাত এক বিবৃতি দিয়ে। ইয়াৰ পিছতে ৰাজ্যসভাত পৰিস্থিতিৰ বিষয়ে অৱগত কৰে। তেওঁৰ বিবৃতিত মন্ত্ৰীগৰাকীয়ে কয় যে ভাৰত চৰকাৰে ১ আগষ্টৰ পৰা কাৰ্যকৰী হ’বলগীয়া শুল্ক সন্দৰ্ভত ৰপ্তানি আৰু উদ্যোগৰ সৈতে জড়িত অংশীদাৰসকলৰ সৈতে যোগাযোগ কৰি আছে। আমি ইয়াৰ প্ৰভাৱৰ মূল্যায়ন কৰি আছো।

গোৱেলে কয়, ভাৰত চৰকাৰৰ বাবে কৃষক, শ্ৰমিক, উদ্যোগ, ৰপ্তানিকাৰক, ক্ষুদ্ৰ আৰু মজলীয়া উদ্যোগ আৰু উদ্যোগটোৰ সৈতে জড়িত সকলো অংশীদাৰৰ কল্যাণৰ সুৰক্ষা আৰু প্ৰসাৰ সৰ্বোচ্চ গুৰুত্বপূৰ্ণ। ভাৰত চৰকাৰে নিজৰ জাতীয় স্বাৰ্থ সুৰক্ষিত আৰু আগুৱাই নিয়াৰ বাবে সকলো পদক্ষেপ গ্ৰহণ কৰিব।

পীয়ুষ গোৱেলে তেওঁৰ বিবৃতিত আমেৰিকাৰ সৈতে চলি থকা বাণিজ্য চুক্তিৰ আলোচনাৰ সৈতে জড়িত পৰিস্থিতিৰ বিষয়ে অৱগত কৰে। ইতিমধ্যে ৫ এপ্ৰিলৰ পৰা ১০ শতাংশ অতিৰিক্ত শুল্ক আৰোপ কৰা হৈছে বুলি উল্লেখ কৰি তেওঁ কয় যে কালি আমেৰিকাৰ ৰাষ্ট্ৰপতিয়ে ২৬ শতাংশ শুল্ক ঘোষণা কৰিছে।

গোৱেলে কয় যে চলিত বৰ্ষৰ মাৰ্চ মাহৰ পৰা চৰকাৰে আমেৰিকাৰ সৈতে এক ন্যায্য, সুষম আৰু পাৰস্পৰিকভাৱে লাভজনক বাণিজ্য চুক্তি (বিটিএ)ৰ ওপৰত আলোচনা কৰি আহিছে। ইয়াৰ লক্ষ্য আছিল ২০২৫ চনৰ অক্টোবৰ-নৱেম্বৰৰ ভিতৰত এই চুক্তিৰ প্ৰথম পৰ্যায় সম্পূৰ্ণ কৰা।

পীয়ুষ গোৱেলে এই সময়ছোৱাত ভাৰতৰ বিশ্বব্যাপী স্থিতিৰ ওপৰত আলোকপাত কৰি কয় যে বৰ্তমান ভাৰতে বিশ্বৰ বৃদ্ধিত ১৬ শতাংশ অৰিহণা যোগাইছে। যোৱা ১১ বছৰত ভাৰতৰ ৰপ্তানি বৃদ্ধি পাইছে। আমি ইউ এ ই, ব্ৰিটেইন আৰু অষ্ট্ৰেলিয়াৰ সৈতে বাণিজ্যিক চুক্তি স্বাক্ষৰ কৰিছো।

তেওঁ কয় যে বৰ্তমান অৰ্থনৈতিক দৃষ্টিকোণৰ পৰা বিশ্বত সুৰক্ষাবাদী নীতি অব্যাহত আছে। এনে পৰিস্থিতিত আমি আত্মনিৰ্ভৰশীলতাৰ দিশত আত্মবিশ্বাসেৰে আগবাঢ়িছো। ভাৰত চৰকাৰে কৃষি কল্যাণ, খাদ্য সুৰক্ষা আৰু উদ্যোগটোৰ সৰ্বাংগীন সমৃদ্ধি সুনিশ্চিত কৰাৰ বাবে কাম কৰি আছে। আমি এখন উন্নত ভাৰতৰ বাবে সৰ্বাংগীন আৰু বহনক্ষম উন্নয়নৰ যাত্ৰা অব্যাহত ৰাখিম।

হিন্দুস্থান সমাচাৰ / মনোজ কুমাৰ শইকীয়া