কোকৰাঝাৰ, ২০ জুন (হি.স.)। কলাগুৰু বিষ্ণুপ্ৰসাদ ৰাভাৰ ৫৬ সংখ্যক মৃত্যু বাৰ্ষিকী উপলক্ষে আজি সমগ্ৰ কোকৰাঝাৰ জিলাত শ্ৰদ্ধা আৰু উৎসাহেৰে বিষ্ণু ৰাভা দিৱস পালন কৰা হয়।
সাংস্কৃতিক পৰিক্ৰমা বিভাগৰ উদ্যোগত আৰু কোকৰাঝাৰ জিলা প্ৰশাসনৰ সহযোগত কোকৰাঝাৰ বিজ্ঞান মহাবিদ্যালয়, বাঁওখুংগ্ৰী ছোৱালী মহাবিদ্যালয়; ছেৰফাংগুৰি জনতা মহাবিদ্যালয়, গুৰুদেৱ কালিচৰণ ব্ৰহ্ম মহাবিদ্যালয়, টিপকাই, পৰ্বতঝোৰা আৰু গোসাঁইগাঁও মহাবিদ্যালয়কে ধৰি মুঠ পাঁচটা গুৰুত্বপূৰ্ণ স্থানত একেলগে বিষ্ণু ৰাভা দিৱস উদযাপন কৰা হয়। নলবাৰী জিলাত অনুষ্ঠিত কেন্দ্রীয় ৰাজ্যিক কাৰ্যসূচীত মুখ্যমন্ত্ৰী ডা৽ হিমন্ত বিশ্ব শৰ্মাই অনুষ্ঠানত উপস্থিত থাকি গৰিমা প্ৰদান কৰে আৰু এই কাৰ্য্যসূচীটো সকলো স্থানত লাইভ ষ্ট্ৰীম যোগে দেখুৱা হয়।
কোকৰাঝাৰৰ বিজ্ঞান মহাবিদ্যালয়ত আয়োজন কৰা অনুষ্ঠানত বডোলেণ্ড বিশ্ববিদ্যালয়ৰ সহকাৰী অধ্যাপক ৰাতুল ডেকাই বিষ্ণুপ্ৰসাদ ৰাভাৰ জীৱন আৰু অৱদানৰ ওপৰত এক প্ৰতিফলিত ভাষণ প্ৰদান কৰে। তেওঁ কলাগুৰুৰ চিৰস্থায়ী প্ৰভাৱৰ কথা উল্লেখ কৰি কয় যে তেওঁৰ মৃত্যুৰ পাঁচ দশকৰো অধিক সময় অতিক্ৰম কৰাৰ পাছতো তেওঁৰ নাম সন্মানৰ সৈতে স্মৰণ কৰা হয় আৰু তেওঁৰ সাংস্কৃতিক আৰু সামাজিক অৱদানৰ প্ৰভাৱ এতিয়াও জীৱন্ত|
এই কাৰ্যসূচীত কেইবাজনো গণ্যমান্য ব্যক্তি আৰু বিষয়ববীয়া উপস্থিত থাকে। ইয়াৰ আগতে দিনটোৰ আৰম্ভণিতে জিলাৰ বিভিন্ন স্থানত বিশেষ বাহনসমূহে ৰাভা সংগীত বজাই আৰু বিষ্ণু প্ৰসাদ ৰাভাৰ সাংস্কৃতিক অৱদানৰ বিষয়ে জনসাধাৰণৰ মাজত সচেতনতা সৃষ্টিৰ উদ্দেশ্যে প্ৰচাৰ চলাইছিল।
হিন্দুস্থান সমাচাৰ / কিশোৰ মিশ্ৰ
