নতুন দিল্লী, ০৩ এপ্ৰিল (হি.স.)। উচ্চতম ন্যায়ালয়ে পশ্চিমবংগৰ প্ৰায় ২৫ হাজাৰ শিক্ষক আৰু অশিক্ষক কৰ্মচাৰীৰ নিযুক্তি বাতিল কৰাৰ কলিকতা উচ্চ ন্যায়ালয়ে দিয়া সিদ্ধান্তত অনুমোদন জনায়। মুখ্য ন্যায়াধীশ সঞ্জীৱ খান্নাৰ নেতৃত্বত গঠিত বিচাৰপীঠে এই নিযুক্তিসমূহ প্ৰৱঞ্চনাৰে কৰা বুলি জানিবলৈ দিয়ে।
উচ্চতম ন্যায়ালয়ে নিজৰ সিদ্ধান্তত কয় যে নিযুক্তি পোৱা প্ৰাৰ্থীসকলে দৰমহা ঘূৰাই দিব নালাগে। উচ্চতম ন্যায়ালয়ে কয় যে যিসকল প্ৰাৰ্থী কলংকিত নহয় তেওঁলোকে নতুন নিযুক্তি প্ৰক্ৰিয়াত ৰেহাই পাব পাৰে। ১০ ফেব্ৰুৱাৰীত আদালতে এই সিদ্ধান্ত সংৰক্ষণ কৰি ৰাখিছিল। ইয়াৰ পূৰ্বে ২০২৪ চনৰ ৭ মে’ত আদালতে কলিকতা উচ্চ ন্যায়ালয়ৰ সিদ্ধান্ত স্থগিত ৰাখিছিল। তেতিয়াৰ মুখ্য ন্যায়াধীশ ডি ৱাই চন্দ্ৰচুদৰ নেতৃত্বত গঠিত বিচাৰপীঠে পশ্চিম বংগ চৰকাৰক ধমক দি এই নিযুক্তি প্ৰক্ৰিয়া এক সুপৰিকল্পিত ষড়যন্ত্ৰ বুলি কৈছিল। আদালতে কৈছিল যে ২৫ হাজাৰ শিক্ষক আৰু অশিক্ষক কৰ্মচাৰী নিযুক্তিৰ সৈতে জড়িত ডিজিটেল ৰেকৰ্ড ৰখাটো বিষয়াসকলৰ দায়িত্ব।
পশ্চিম বংগ চৰকাৰে এই আবেদনত কলিকতা উচ্চ ন্যায়ালয়ৰ সিদ্ধান্তৰ ওপৰত স্থগিতাদেশ বিচাৰিছিল। আবেদনখনত কোৱা হৈছিল যে উচ্চ ন্যায়ালয়ৰ এই সিদ্ধান্তৰ বাবে ৰাজ্যিক বিদ্যালয়সমূহত পঢ়া-শুনা স্তব্ধ হৈ পৰিব। আৱেদনখনত ৰাজ্য চৰকাৰে অভিযোগ কৰিছিল যে উচ্চ ন্যায়ালয়ে কোনো শপতনামা আৰু মৌখিক যুক্তি ৰেকৰ্ডত নোহোৱাকৈয়ে ইচ্ছাকৃতভাৱে নিযুক্তিসমূহ বাতিল কৰিছিল।
দৰাচলতে যোৱা কালি ২০২৪ চনৰ ২২ এপ্ৰিলত কলকতা উচ্চ ন্যায়ালয়ে ২৪ হাজাৰ প্ৰাৰ্থীৰ নিযুক্তি অবৈধ বুলি ঘোষণা কৰি নিযুক্তিৰ পিছত লাভ কৰা দৰমহা ঘূৰাই দিয়াৰ নিৰ্দেশ দিছিল।
हिन्दुस्थान समाचार / মনোজ কুমাৰ শইকীয়া
