নগাঁও, ০৩ এপ্ৰিল (হি.স.)। ৰঙালী বিহুৰ প্ৰাক-মুহুৰ্তত অসমে পালে আন এক উপহাৰ। অসমীয়া গামোচা, কাজী নেমুৰ পাছত এইবাৰ অসমীয়া থলুৱা গহণাৰ আৰম্ভ হৈছে বিশ্বমুখী যাত্ৰা। অসমীয়া গহণাই লাভ কৰিলে জিআই টেগ। স্বৰ্গদেও সকলৰ দিনৰ পৰাই প্ৰচলিত হৈ অহা এই অসমীয়া গহণাৰ এই খবৰে উৎফুল্লিত কৰি তুলিছে অসমবাসীক।

অসমীয়া গহণাৰ এই জিআই টেগ লাভৰ খবৰে উৎফুল্লিত কৰি তুলিছে নগাঁৱৰ ৰণথলী গাওঁবাসীকো। কাৰণ অসমীয়া গহণাৰ লগত এক বিশেষ সম্পৰ্ক আছে নগাঁৱৰ ৰণথলীৰ। অসমীয়া গহণা বুলি কলেই মনলৈ আহে নগাঁৱৰ এই ৰণথলী গাঁওখনৰ কথা। গাওঁখনৰ প্ৰায় প্ৰত্যেকটো গৃহতে আছে অসমীয়া গহণাৰ এটি ক্ষুদ্ৰ উদ্যোগ। অসমীয়া গহণা প্ৰস্তুত কৰা এই গাওঁখনত এতিয়া আনন্দৰ জোৱাৰ উঠিছে।বিভিন্ন সময়ত বহিৰাগত কিছুমান গহণাই অসমীয়া গহণাৰ বজাৰখন গ্ৰাস কৰি পেলোৱাৰ সময়তে এই বাতৰিয়ে উৎফুল্লিত কৰি তুলিছে অসমীয়া গহণা প্ৰস্তুত কৰি তোলা শিল্পী সকলক। ৰণথলীগাঁৱৰ এই গাঁওবাসী সকলে বহিৰাগত নকল অসমীয়া গহণাৰ ব্যৱসায়ৰ বিৰুদ্ধে ব্যৱস্থা গ্ৰহণ কৰি অসমীয়া গহণাৰ বজাৰখন আৰু সুদৃঢ় কৰিবলৈ চৰকাৰলৈ আহ্বান জনাইছে। এইক্ষেত্ৰত অসমীয়া গহণাই এক নতুন মাত্ৰা পোৱাটোৱে সকলোৱে বিচাৰিছে।

---------------

হিন্দুস্থান সমাচাৰ / নিৰ্মলেন্দু