নতুন দিল্লী, ০২ এপ্ৰিল (হি.স.)। আজি বিশ্বৰ মূলধনী বজাৰৰ পৰা ইতিবাচক সংকেত আহি আছে। পূৰ্বৰ অধিবেশনৰ সময়ছোৱাত নিম্ন স্তৰৰ পৰা উভতি অহাৰ পিছত আমেৰিকাৰ বজাৰসমূহ শক্তিশালীভাৱে বন্ধ হৈ পৰে। অৱশ্যে আজি ডাউ জ’নছৰ ফ্যুচাৰৰ ব্যৱসায় হ্ৰাস পোৱা দেখা গৈছে। যোৱা অধিবেশনৰ সময়ছোৱাতো ইউৰোপীয় বজাৰসমূহত ধাৰাবাহিকভাৱে ক্ৰয় হৈছিল। ইফালে, চাপৰ মাজতে আজি এছিয়াৰ বজাৰত চলি আছে মিশ্ৰিত ব্যৱসায়।

আমেৰিকাৰ ৰাষ্ট্ৰপতি ড’নাল্ড ট্ৰাম্পে কৰা ঘোষণা অনুসৰি আজিৰ পৰা কাৰ্যকৰী হ’ব পাৰস্পৰিক শুল্ক। ভাৰতীয় সময় অনুসৰি গভীৰ নিশা প্ৰযোজ্য হ’ব পাৰস্পৰিক শুল্ক। এই শুল্ক কাৰ্যকৰী হোৱাৰ পূৰ্বে বিশ্বৰ বিনিয়োগকাৰীসকলে আমেৰিকাৰ নতুন শুল্ক নীতি আৰু বিশ্ব বজাৰত ইয়াৰ প্ৰভাৱৰ ওপৰত চকু ৰাখিছে। এই আশংকাৰ বাবেই বিশ্বৰ বজাৰসমূহত বিভ্ৰান্তিৰ পৰিৱেশ বিৰাজ কৰিছে।

পূৰ্বৰ অধিবেশনৰ সময়ছোৱাত হেঁচাত পৰি ব্যৱসায় কৰাৰ পিছত আমেৰিকাৰ বজাৰসমূহে নিম্ন স্তৰৰ পৰা উভতি আহি উচ্চ স্তৰত বন্ধ হ’বলৈ সক্ষম হয়। এছ এণ্ড পি ৫০০ সূচকাংক ০.৩৮ শতাংশ বৃদ্ধিৰে ৫,৬৩৩.০৭ পইণ্টত বন্ধ হয়। একেদৰে নাছডাকে পূৰ্বৰ অধিবেশনৰ ব্যৱসায়ৰ অন্ত পেলাই ১৫০.৬০ পইণ্ট অৰ্থাৎ ০.৮৭ শতাংশ বৃদ্ধিৰে ১৭,৪৪৯.৮৯ পইণ্টত। বৰ্তমান ডাউ জ’নছ ফিউচাৰ্ছৰ মূল্য ০.০৮ শতাংশ দুৰ্বলতাৰে ৪১,৯৫৫.৫১ পইণ্টত ব্যৱসায় কৰা দেখা গৈছে।

পূৰ্বৰ অধিবেশনৰ ব্যৱসায়ৰ পিছত ইউৰোপীয় বজাৰসমূহো শক্তিশালীভাৱে বন্ধ হ’বলৈ সক্ষম হয়। এফটিএছই সূচকাংক ০.৬০ শতাংশ বৃদ্ধিৰে ৮,৬৩৪.৮০ পইণ্টত বন্ধ হয়। একেদৰে চিএচি সূচকাংক ১.০৯ শতাংশ জপিয়াই পূৰ্বৰ অধিবেশন ৭,৮৭৬.৩৬ পইণ্টত সমাপ্ত হয়। ইয়াৰ উপৰিও ডেক্স সূচকাংক ৩৭৬.৪৯ পইণ্ট অৰ্থাৎ ১.৬৭ শতাংশৰ শক্তিশালী বৃদ্ধিৰে ২২,৫৩৯.৯৮ পইণ্টত বন্ধ হয়।

আজি এছিয়াত মিশ্ৰিত ব্যৱসায় দেখা গৈছে। এছিয়াৰ ৯খন বজাৰৰ ভিতৰত ৫খন সূচকাংকই লাভৰ সৈতে সেউজীয়া ৰঙৰ ব্যৱসায় কৰি আছে, আনহাতে ৩খন সূচকাংকই লোকচানৰ সৈতে ৰঙা ৰঙৰ ব্যৱসায় কৰি আছে। ইণ্ডোনেছিয়াৰ ষ্টক এক্সচেঞ্জত ছুটীৰ বাবে আজি জাকাৰ্টা কম্পোজিট ইনডেক্সত কোনো পৰিৱৰ্তন হোৱা নাই। এতিয়ালৈকে ষ্ট্ৰেইটছ টাইমছ সূচকাংক ০.২৬ শতাংশ হ্ৰাস পাই ৩,৯৫৮.৫০ পইণ্টত ব্যৱসায় কৰি আছে। একেদৰে কোস্পি সূচকাংক ০.৩১ শতাংশ হ্ৰাস পাই ২৫১৩.৬৩ পইণ্টৰ স্তৰত উপনীত হৈছে। ইয়াৰ উপৰিও টাইৱান ওজনযুক্ত সূচকাংক ০.০১ শতাংশৰ প্ৰতীকী দুৰ্বলতাৰ সৈতে ২১,২৭৯.০২ পইণ্টৰ স্তৰত ব্যৱসায় কৰা দেখা গৈছে।

আনহাতে, গিফট নিফটী য়ে ১০৩ পইণ্ট অৰ্থাৎ ০.৪৪ শতাংশ বৃদ্ধিৰে ২৩,৩৮৯ পইণ্টৰ স্তৰত ব্যৱসায় কৰি আছে। একেদৰে ছেট কম্প'জিট ইণ্ডেক্স ০.৩২ শতাংশ জপিয়াই ১১৭১.৭১ পইণ্টৰ স্তৰত উপনীত হয়। ইয়াৰ উপৰিও নিকেই সূচকাংক ০.০৬ শতাংশ বৃদ্ধিৰে ৩৫,৬৪৭.২৫ পইণ্টত, হেং চেং সূচকাংক ০.০৬ শতাংশ বৃদ্ধিৰে ২৩,২২০.১৫ পইণ্টত, আৰু চাংহাই কম্পোজিট সূচকাংকত ০.২৪ শতাংশ বৃদ্ধিৰে ৩,৩৫৬.৪১ পইণ্টত ব্যৱসায় কৰিছে।

हिन्दुस्थान समाचार / মনোজ কুমাৰ শইকীয়া