- আই পি অ’ বিনিয়োগকাৰীৰ লোকচান প্ৰথম দিনাই ১৩.৮৬ শতাংশ

নতুন দিল্লী, ০২ এপ্ৰিল (হি.স.)। লিথিয়াম আয়ন বেটাৰী নিৰ্মাতা কোম্পানী এ টি চি এনাৰ্জিজে আজি আই পি অ’ বিনিয়োগকাৰীক হতাশ কৰে। আজি শ্বেয়াৰ বজাৰত ৰেহাই মূল্যত তালিকাভুক্ত হোৱাৰ পিছত বিক্ৰীৰ চাপৰ বাবে কোম্পানীটোৰ শ্বেয়াৰসমূহে নিম্ন চাৰ্কিট লেভেলত আঘাত হানে। আই পি অ’ৰ অধীনত কোম্পানীটোৰ শ্বেয়াৰ ১১৮ টকাৰ মূল্যত জাৰি কৰা হৈছিল। আজি এন এছ ইৰ এছ এম ই প্লেটফৰ্মত ১০৭ টকাৰ মূল্যত ৯.৩২ শতাংশ ৰেহাইত তালিকাভুক্ত কৰা হয়। এইদৰে কোম্পানীটোৰ আই পি অ’ বিনিয়োগকাৰীসকলে প্ৰথম ব্যৱসায়িক দিনটোতেই ১৩.৮৬ শতাংশ লোকচানৰ সন্মুখীন হ’বলগীয়া হয়।

যোৱা ২৫ৰ পৰা ২৭ মাৰ্চৰ ভিতৰত এটিচি এনাৰ্জিজৰ ৬৩.৭৬ কোটি টকাৰ আইপিঅ’ চাবস্ক্ৰিপচনৰ বাবে মুকলি আছিল। এই আইপিঅ’ই বিনিয়োগকাৰীৰ পৰা লেহেমীয়া সঁহাৰি লাভ কৰিছিল, যাৰ বাবে ইয়াক সামগ্ৰিকভাৱে ১.৬১ বাৰ চাবস্ক্ৰাইব কৰা হৈছিল। ইয়াৰে যোগ্য প্ৰতিষ্ঠানিক ক্ৰেতা (কিউআইবি)ৰ বাবে সংৰক্ষিত অংশ ১.৩৮ বাৰ চাবস্ক্ৰাইব কৰা হৈছিল। একেদৰে অপ্ৰতিষ্ঠানিক বিনিয়োগকাৰী (এন আই আই)ৰ বাবে সংৰক্ষিত অংশই ০.৮১ গুণ চাবস্ক্ৰিপচন লাভ কৰে। ইয়াৰ উপৰিও খুচুৰা বিনিয়োগকাৰীৰ বাবে সংৰক্ষিত অংশ ২.৪৯ বাৰ চাবস্ক্ৰাইব কৰা হৈছিল। এই আই পি অ’ৰ অধীনত ৫১.০২ কোটি টকাৰ নতুন শ্বেয়াৰ জাৰি কৰা হৈছে। ইয়াৰ উপৰিও অফাৰ ফৰ চেল উইণ্ডোৰ জৰিয়তে ১০ টকাৰ ফেচ ভেলু ১০.৮০ লাখ শ্বেয়াৰ বিক্ৰী হৈছে। আই পি অ’ৰ জৰিয়তে সংগ্ৰহ কৰা ধন কোম্পানীটোৱে নিজৰ পুৰণি ঋণ পৰিশোধ, নয়ডাত থকা কাৰখানাটোৰ নৱীকৰণ আৰু অসামৰিক উন্নীতকৰণ, কাৰ্য্যকৰী মূলধনৰ প্ৰয়োজনীয়তা পূৰণ আৰু সাধাৰণ কৰ্পৰেট উদ্দেশ্যত ব্যৱহাৰ কৰিব।

কোম্পানীটোৰ আৰ্থিক অৱস্থাৰ কথা ক’বলৈ গ’লে প্ৰস্পেক্টচত কৰা দাবী অনুসৰি ইয়াৰ আৰ্থিক স্বাস্থ্যৰ উঠা-নমা হৈ আহিছে। ২০২১-২২ বিত্তীয় বৰ্ষত কোম্পানীটোৰ নিকা লাভৰ পৰিমাণ ১১.৮৬ কোটি টকা, যিটো পৰৱৰ্তী বিত্তীয় বৰ্ষত ২০২২-২৩ চনত ৭.৭৬ কোটি টকালৈ হ্ৰাস পাইছে। কিন্তু পৰৱৰ্তী বিত্তীয় বৰ্ষ ২০২৩-২৪ত কোম্পানীটোৰ নিকা লাভ ১০.৮৯ কোটি টকাৰ স্তৰলৈ বৃদ্ধি পায়। যোৱা ২০২৪-২৫ বিত্তীয় বৰ্ষৰ কথা ক’বলৈ গ’লে এই বছৰৰ প্ৰথমাৰ্ধত অৰ্থাৎ ২০২৪ চনৰ এপ্ৰিলৰ পৰা ছেপ্টেম্বৰৰ ভিতৰত কোম্পানীটোৰ নিকা লাভ আছিল ৫.৭৭ কোটি টকা। একেদৰে এই সময়ছোৱাত কোম্পানীটোৱে ২২.৫৭ কোটি টকাৰ ৰাজহ লাভ কৰাত সফল হয়।

हिन्दुस्थान समाचार / Monoj Kumar Saikia