নগাঁও, ৩১ মাৰ্চ (হি.স.)। দেখিলেই মৰম লগা এটি সাত বছৰীয়া কণমাণি । বিশেষভাবে সক্ষম এই কণমাণিটো । ধিঙৰ নামডুমডুমীয়া সত্ৰৰ পিতৃ মন্টু নাথ আৰু মাতৃ যোগমায়া দেৱীৰ একমাত্ৰ সন্তান এই বিশেষভাবে সক্ষম কণমাণিটো । অতি দৰিদ্ৰ পৰিয়ালৰ পিতৃ মাতৃয়ে অনিচ্ছা স্বত্বেও ৰচাৰে বান্ধি ৰাখিৱলগীয়া হয় এই কণমাণিটোক । শিশুটিক পৰ্যাপ্ত চিকিৎসা কৰিবলৈও সামৰ্থ নাই দুৰ্ভগীয়া পিতৃ মাতৃৰ ।
পিতৃয়ে আনৰ ঘৰত দিন হাজিৰা কৰি কোনোমতে চলাই আহিছে পৰিয়ালটি । ইপিনে চৰকাৰে দৰিদ্ৰ লোকৰ বাবে আগবঢ়োৱা আঁচনিৰ পৰাও বঞ্চিত এই দুৰ্ভগীয়া পৰিয়ালটো । অৰোনোদয়, ৰেচন কাৰ্ডৰ যোগ্য যদিও সেইয়াৰ পৰাও বঞ্চিত এই পৰিয়ালটো । এফালে বিশেষভাবে সক্ষম একমাত্ৰ সন্তানৰ চিকিৎসাৰ বাবে প্ৰয়োজনীয় ধনৰ অভাৱ আৰু আনফালে বঞ্চিত হৈছে চৰকাৰী আঁচনিৰ পৰাও । উপায়ন্তৰ হৈ এই দুৰ্ভগীয়া পৰিয়ালটোৱে সংবাদ মাধ্যমৰ জৰিয়তে ৰাজ্যৰ মুখ্যমন্ত্রী ড০ হিমন্ত বিশ্ব শৰ্মাৰ লগতে সুহৃদয় লোকৰ পৰা বিচাৰিছে সহায় । কোনো লোকে যদি এই পৰিয়ালটোক সহায় আগবঢ়াব বিছাৰে তেন্তে কণমাণিটোৰ মাতৃৰ SBI ৰ ধিং শাখাত থকা একাউণ্ট নং 35283128881 (IFSC Code SBIN2050) ত সহায় আগবঢ়াবলৈ কাতৰ অনুৰোধ জনাইছে দুৰ্ভগীয়া পৰিয়ালটোৱে ।
হিন্দুস্থান সমাচাৰ / কিশোৰ মিশ্ৰ
