নানজিং, ২৪ মাৰ্চ (হি.স.)। ৬০ মিটাৰ হাৰ্ডলছৰ খিতাপ অক্ষুণ্ণ ৰাখিবলৈ বাহামাৰ ডেভিন চাৰ্লটনে দৰ্শনীয় প্ৰদৰ্শন আগবঢ়াইছিল, আনহাতে পুৰুষ আৰু মহিলাৰ ৪x৪০০ মিটাৰ ৰিলেত আমেৰিকাই আধিপত্য বিস্তাৰ কৰিছিল। ইয়াৰ লগে লগে দেওবাৰে সমাপ্ত হয় ২০২৫ চনৰ বিশ্ব এথলেটিকছ ইনড’ৰ চেম্পিয়নশ্বিপ।
মুঠ ৬টা স্বৰ্ণ, ৪টা ৰূপ আৰু ৬টা ব্ৰঞ্জৰ পদক লাভ কৰি পদক তালিকাত শীৰ্ষস্থান দখল কৰিছে আমেৰিকাই। নৰৱেই তিনিটা স্বৰ্ণ আৰু ইথিওপিয়াই দুটা সোণ আৰু তিনিটা ৰূপৰে তৃতীয় স্থান দখল কৰে।
চাৰ্লটনৰ ৰোমাঞ্চকৰ জয়
চাৰ্লটনে ৭.৭২ ছেকেণ্ডত দৌৰ সমাপ্ত কৰি এক ৰোমাঞ্চকৰ জয় পঞ্জীয়ন কৰে। এই দৌৰ ঐতিহাসিক আছিল কাৰণ প্ৰথমবাৰৰ বাবে ছয়গৰাকী খেলুৱৈয়ে ৭.৮০ ছেকেণ্ডৰ ভিতৰতে দৌৰ সমাপ্ত কৰিছিল। ছুইজাৰলেণ্ডৰ দিটাজী কাম্বুঞ্জীয়ে ৭.৭৩ ছেকেণ্ডত ৰূপৰ পদক আৰু জামাইকাৰ আকেৰা নুজেণ্টে ৭.৭৪ ছেকেণ্ডত ব্ৰঞ্জৰ পদক লাভ কৰে।
যদিও চীনৰ হাৰ্ডলাৰ ৱু য়ানিয়ে ফাইনেলত প্ৰৱেশ কৰিব নোৱাৰিলে, তথাপিও ছেমি ফাইনেলত ৮.০১ ছেকেণ্ড সময় ধৰি ১১ বছৰীয়া ৰাষ্ট্ৰীয় অভিলেখ ভংগ কৰে।
৪x৪০০ মিটাৰ ৰিলেত আমেৰিকাৰ দৰ্শনীয় জয়
পুৰুষৰ ৪x৪০০ মিটাৰ ৰিলেত আমেৰিকাই ৩:০৩.১৩ ছেকেণ্ডত সোণৰ পদক লাভ কৰে। ক্ৰীছ বেইলী, ব্রায়ান ফাউষ্ট, জেকোৰী পেটাৰছন আৰু এলিজা গডউইনৰ দলটোৱে জামাইকাক প্রায় দুছেকেণ্ডত পৰাস্ত কৰে৷ হাংগেৰীৰ আটিলা মলনাৰে অন্তিম ৰাউণ্ডত শক্তিশালী প্ৰদৰ্শন কৰি ৩:০৬.০৩ ছেকেণ্ডত ৰাষ্ট্ৰীয় অভিলেখ গঢ়ি ব্ৰঞ্জৰ পদক লাভ কৰে। চীনেও ৩:০৬.৯০ মিনিটত ৰাষ্ট্ৰীয় অভিলেখ গঢ়িছিল যদিও চতুৰ্থ স্থান দখল কৰে।
মহিলাৰ ৪x৪০০ মিটাৰ ৰিলেত আমেৰিকাৰ কোৱানেৰা হেইছ, বেইলী লিয়াৰ, ৰ’জী এফয়ং আৰু এলেক্সিছ হোমছৰ দলে ৩:২৭.৪৫ মিনিটত সোণৰ পদক লাভ কৰে। পোলেণ্ডে ৩:৩২.০৫ মিনিটত ৰূপৰ পদক আৰু অষ্ট্ৰেলিয়াই ৩:৩২.৬৫ মিনিটত ব্ৰঞ্জৰ পদক লাভ কৰে।
অন্যান্য ডাঙৰ ডাঙৰ বাউট
পুৰুষৰ ৮০০ মিটাৰ দৌৰত আমেৰিকাৰ জোছ হ’য়ে ১:৪৪.৭৭ মিনিটত সোণৰ পদক লাভ কৰাৰ বিপৰীতে বেলজিয়ামৰ ইলিয়ট ক্ৰেষ্টন আৰু স্পেইনৰ এলভিন কেনালেছে ক্ৰমে ৰূপ আৰু ব্ৰঞ্জৰ পদক লাভ কৰে।
মহিলাৰ ৮০০ মিটাৰ দৌৰত দক্ষিণ আফ্ৰিকাৰ প্ৰুডেন্স চেকোডিছ’ই ১:৫৮.৪০ মিনিটৰ বিশ্ব ব্যক্তিগত শ্ৰেষ্ঠত্বৰে সোণৰ পদক লাভ কৰে। ইথিওপিয়াৰ নিজিষ্ট গেটাচেউ আৰু পৰ্তুগালৰ পেট্ৰিচিয়া ছিলভাই ক্ৰমে ৰূপ আৰু ব্ৰঞ্জৰ পদক লাভ কৰে।
পুৰুষৰ ১৫০০ মিটাৰ দৌৰত নৰৱেৰ তাৰকা জেকব ইংগেব্ৰিগচেনে ৩:৩৮.৭৯ মিনিটত স্বৰ্ণ পদক লাভ কৰি ৩০০০ মিটাৰ দৌৰৰ পিছত দ্বিতীয়টো খিতাপ পঞ্জীয়ন কৰে। ব্ৰিটেইনৰ নীল গৌৰলিয়ে ৰূপ আৰু আমেৰিকাৰ লুক হাউজাৰে ব্ৰঞ্জৰ পদক লাভ কৰে।
মহিলাৰ ১৫০০ মিটাৰ শাখাত ইথিওপিয়াৰ গুডাফ চেগায়েই ৩:৫৪.৮৬ মিনিটৰ চেম্পিয়নশ্বিপৰ অভিলেখৰে সোণৰ পদক লাভ কৰাৰ বিপৰীতে দেশবাসী ডিৰিবে ৱেলটেজীয়ে ৩:৫৯.৩০ মিনিটত ৰূপৰ পদক লাভ কৰে। ব্ৰিটেইনৰ জৰ্জিয়া হাণ্টাৰ-বেলে ৩:৫৯.৮৪ ছেকেণ্ডত ব্ৰঞ্জৰ পদক লাভ কৰে।
লং জাম্প, হাই জাম্প আৰু শ্বট পুটত উৎকৃষ্ট প্ৰদৰ্শন
লং জাম্পত ইটালীৰ মেটিয়া ফুৰলানীয়ে ৮.৩০ মিটাৰ জাম্প কৰি স্বৰ্ণ পদক লাভ কৰাৰ বিপৰীতে জামাইকাৰ ৱেইন পিনক (৮.২৯ মিটাৰ) ৰূপৰ পদক আৰু অষ্ট্ৰেলিয়াৰ লিয়াম এডককে (৮.২৮ মিটাৰ) ব্ৰঞ্জৰ পদক লাভ কৰে।
মহিলাৰ দীৰ্ঘ জাম্পত ৬.৯৬ মিটাৰ ব্যক্তিগত শ্ৰেষ্ঠ জাম্পেৰে সোণৰ পদক লাভ কৰে আমেৰিকাৰ ক্লেয়াৰ ব্রায়াণ্টে। ছুইজাৰলেণ্ডৰ অনিকে কালিনে ৰূপৰ পদক আৰু স্পেইনৰ ফাতিমা দিয়ামে ব্ৰঞ্জৰ পদক লাভ কৰে।
মহিলাৰ হাই জাম্পত অষ্ট্ৰেলিয়াৰ নিকোলা অলিছলাগাৰ্ছে ১.৯৭ মিটাৰ জাম্প কৰি নিজৰ খিতাপ ৰক্ষা কৰে। তেওঁৰ দেশবাসী এলিন’ৰ পেটাৰছনে ৰূপৰ পদক আৰু ইউক্ৰেইনৰ ইয়াৰোছলাভা মাহুচিখে ব্ৰঞ্জৰ পদক লাভ কৰে।
পুৰুষৰ শ্বট পুটত নিউজিলেণ্ডৰ টম ৱালছে ২১.৬৫ মিটাৰ ছিজনৰ শ্ৰেষ্ঠত্বৰে তৃতীয়টো ইনড’ৰ খিতাপ দখল কৰে। ছুইডেনৰ ৰজাৰ ষ্টেইনে ৰূপ আৰু আমেৰিকাৰ এড্ৰিয়ান পাইপেৰীয়ে ব্ৰঞ্জৰ পদক লাভ কৰে।
হেপ্টাথলনত জয়লাভ কৰে নৰৱেই
হেপ্টাথলন ইভেণ্টত নৰৱেৰ চেণ্ডাৰ স্কোথেইমে ৬৪৭৫ পইণ্টেৰে স্বৰ্ণ পদক লাভ কৰে। ইউৰোপীয় ইনড’ৰ খিতাপ জয় কৰাৰ মাত্ৰ কেইসপ্তাহমানৰ পিছতে তেওঁ এই কৃতিত্ব অৰ্জন কৰে। ইষ্ট’নিয়াৰ জোহানেছ এৰমে (৬,৪৩৭ পইণ্ট) ৰাষ্ট্ৰীয় অভিলেখ গঢ়ি ৰূপৰ পদক আৰু জাৰ্মানীৰ টিল ষ্টেনফৰ্থে (৬,২৭৫ পইণ্ট) ব্ৰঞ্জৰ পদক লাভ কৰে।
চেম্পিয়নশ্বিপৰ ফাইনেল
২০২৫ চনৰ বিশ্ব এথলেটিকছ ইনড’ৰ চেম্পিয়নশ্বিপৰ সামৰণি পৰে এক ৰোমাঞ্চকৰ প্ৰতিযোগিতাত, আমেৰিকাই নিজৰ আধিপত্য অব্যাহত ৰাখি মুঠ ১৬টা পদক লাভ কৰি শীৰ্ষস্থান দখল কৰে।
हिन्दुस्थान समाचार / Monoj Kumar Saikia
