নতুন দিল্লী, ০৪ ফেব্ৰুৱাৰী (হি.স.)। কেন্দ্ৰীয় ইলেক্ট্ৰনিকছ আৰু আই টি মন্ত্ৰী অশ্বিনী বৈষ্ণৱে মঙলবাৰে কয় যে যোৱা এটা দশকত ভাৰতৰ মোবাইল আৰু ইলেক্ট্ৰনিকছ উৎপাদন খণ্ডত এক বৃহৎ পৰিৱৰ্তন ঘটিছে। মোবাইল আৰু ইলেক্ট্ৰনিকছ নিৰ্মাণৰ ক্ষেত্ৰত ভাৰতে যথেষ্ট অগ্ৰগতি লাভ কৰিছে। প্ৰধানমন্ত্ৰী নৰেন্দ্ৰ মোদীৰ নেতৃত্বত ভাৰতৰ ইলেক্ট্ৰনিকছ উদ্যোগে ইতিমধ্যে ‘মেক ইন ইণ্ডিয়া’ৰ অধীনত চাৰ্জাৰ, বেটাৰী পেক, ইউএছবি কেবল, কিপেড, ডিছপ্লে এছেম্বলি, কেমেৰা মডিউল, লিথিয়াম আয়ন চেল, স্পীকাৰ আৰু মাইক্ৰ’ফোন নিৰ্মাণ কৰি আছে।

বৈষ্ণৱে এক্সত কয় যে এতিয়া ইয়াৰ উপাদান আৰু চিপৰ উৎপাদন বৃদ্ধি কৰি মূল্য শৃংখলৰ গভীৰতালৈ যোৱাৰ ওপৰত গুৰুত্ব দিয়া হৈছে। ১৯৫০ চনৰ পৰা ১৯৯০ চনৰ ভিতৰত নিষেধাজ্ঞামূলক নীতিয়ে উৎপাদনত বাধা আৰোপ কৰিছিল। ‘মেক ইন ইণ্ডিয়া’ই সেই ধাৰাটো ওলোটা কৰি তুলিছে।

উল্লেখযোগ্য যে কালি কংগ্ৰেছ নেতা ৰাহুল গান্ধীয়ে লোকসভাত কৈছিল যে বেটাৰী, ইলেক্ট্ৰিক মটৰ, অপটিক্স আদি ক্ষেত্ৰত এক বিপ্লৱ আহি আছে। এইটোৱে পৃথিৱীখন সলনি কৰি আছে। ইয়াৰ অংশীদাৰ হ’বলৈ হ’লে এইবোৰ দেশত বৃহৎ পৰিসৰত উৎপাদন কৰিব লাগে। এই ক্ষেত্ৰত চীন আমাৰ আগত আছে।

কেন্দ্রীয় মন্ত্রীগৰাকীয়ে কয় যে খেলনাৰ পৰা আৰম্ভ কৰি মোবাইল ফোন, প্রতিৰক্ষা সঁজুলিৰ পৰা ইভি মটৰলৈকে সকলো উৎপাদন ভাৰতত পুনৰ আৰম্ভ হৈছে ৷ ‘মেক ইন ইণ্ডিয়া’ৰ দৃষ্টিভংগী হৈছে ভাৰতক বিশ্বব্যাপী উৎপাদন কেন্দ্ৰ হিচাপে গঢ়ি তোলা। ‘মেক ইন ইণ্ডিয়া’ কাৰ্যসূচীয়ে আত্মনিৰ্ভৰশীলতা, উৎপাদন আৰু চাকৰিৰ সৃষ্টিৰ প্ৰসাৰ ঘটায়।

বৈষ্ণৱে কয় যে যোৱা এটা দশকত ভাৰতৰ মোবাইল আৰু ইলেক্ট্ৰনিকছ উৎপাদন খণ্ডত বৃহৎ পৰিৱৰ্তন হৈছে। মোবাইল আৰু ইলেক্ট্ৰনিকছ নিৰ্মাণৰ ক্ষেত্ৰত ভাৰতে যথেষ্ট অগ্ৰগতি লাভ কৰিছে। ২০১৪ চনত মাত্ৰ ২টা মোবাইল উৎপাদন ইউনিটৰ পৰা আজি ৩০০ৰো অধিকলৈ এই খণ্ডটো দ্ৰুতগতিত সম্প্ৰসাৰিত হৈছে। মোবাইল ফোন নিৰ্মাণৰ ব্যয় যথেষ্ট বৃদ্ধি পাইছে। ২০১৪ বিত্তীয় বৰ্ষত ১৮,৯০০ কোটি টকাৰ মোবাইল নিৰ্মাণ কৰা হৈছিল, আনহাতে ২০২৪ বিত্তীয় বৰ্ষত ৪.২২ লাখ কোটি টকাৰ মোবাইল নিৰ্মাণ কৰা হৈছিল। ২০১৪ চনত তেওঁলোকৰ ৰপ্তানি নগণ্য আছিল যদিও এতিয়া ই ১.২৯ লাখ কোটি টকা অতিক্ৰম কৰিছে।

হিন্দুস্থান সমাচাৰ / মনোজ কুমাৰ শইকীয়া