গুৱাহাটী, ০২ নৱেম্বৰ (হি.স.)। জনপ্ৰিয় অসমীয়া গায়ক জুবিন গাৰ্গৰ প্ৰতি উৎসৰ্গিত ভাৰতীয় বায়ুসেনাৰ উত্তৰ-পূব অঞ্চলৰ প্ৰথমটো বিমান প্ৰদৰ্শনী আয়োজন কৰিছে। অহা ৯ নৱেম্বৰত গুৱাহাটীৰ লাচিত ঘাটত জুবিনৰ বিখ্যাত গীত মায়াবিনী ৰাতিৰ বুকুত গীতৰ সুৰেৰে আকাশত অনুৰণন ঘটাব।
দিছপুৰত অনুষ্ঠিত এক সংবাদমেলত অসমৰ মুখ্য সচিব ৰবি কোটা আৰু এয়াৰ মাৰ্শ্বাল সুৰজ সিঙে এই অনুষ্ঠানটো ভাৰতীয় বায়ুসেনাৰ ৯৩ সংখ্যক উত্থান দিৱস উদযাপনৰ অংশ বুলি অৱগত কৰে। দুপৰীয়া ১২ বজাৰ পৰা দুপৰীয়া ২ বজালৈ চলিবলগীয়া এই বিমান প্ৰদৰ্শনীত ৰাফেল, মিগ, চুখোই যুঁজাৰু বিমানকে ধৰি প্ৰায় ৭৫খন বিমান প্ৰদৰ্শন কৰা হ’ব। এই এয়াৰ শ্ব’ত অংশগ্ৰহণ কৰা বিমানখনে বাগডোগ্ৰা, হাছিমাৰা, গুৱাহাটী, তেজপুৰ, যোৰহাট আৰু চাবুৱা এয়াৰবেছৰ পৰা উৰণ কৰিব।
তেওঁ উল্লেখ কৰে যে মূল ইভেণ্টৰ পূৰ্বে গুৱাহাটীত চাৰি-পাঁচ দিনৰ বাবে বিমান অনুশীলন কৰা হ’ব। বিদ্যালয় আৰু মহাবিদ্যালয়ৰ ছাত্ৰ-ছাত্ৰী আৰু বৃদ্ধাশ্ৰমৰ বাসিন্দাসকলক এই অনুষ্ঠানলৈ আমন্ত্ৰণ জনোৱা হৈছে।
উজান বজাৰৰ নতুন উদ্যানখনৰ পৰা ৰাইজে উৰণীয়া অনুষ্ঠান চাব পাৰিব, আনহাতে অশ্বক্লান্ত মন্দিৰ চৌহদত বিশেষ অতিথিৰ ব্যৱস্থা কৰা হৈছে। গুৱাহাটী বাসিন্দাসকলেও ঘৰৰ পৰাই এই ৰোমাঞ্চকৰ দৃশ্য উপভোগ কৰিব পাৰিব।
ৰাজ্যিক আৰক্ষী সঞ্চালক প্ৰধান হৰমীত সিঙে উল্লেখ কৰে যে বিমান প্ৰদৰ্শনীৰ বাবে সকলো বিশদ নিৰাপত্তাৰ ব্যৱস্থা কৰা হৈছে।
हिन्दुस्थान समाचार / অৰৱিন্দ