নতুন দিল্লী, ০১ নৱেম্বৰ (হি.স.)। প্ৰখ্যাত সাহিত্যিক অধ্যাপক ৰামদৰশ মিশ্ৰৰ শুকুৰবাৰে নিশা মৃত্যু হয়। দিল্লীৰ দ্বাৰকাত থকা নিজৰ বাসগৃহত তেওঁ শেষ নিশ্বাস ত্যাগ কৰে। আজি পুৱা ১১ বজাত পালামৰ মংগলাপুৰী শ্মশানত তেওঁৰ অন্তিম অনুষ্ঠান সম্পন্ন কৰাৰ ব্যৱস্থা কৰা হয়। তেওঁৰ পৰিয়ালৰ সদস্যসকলে উল্লেখ কৰে যে অধ্যাপক ৰামদৰশ মিশ্ৰই শতবাৰ্ষিকী যাত্ৰা সম্পূৰ্ণ কৰি চিৰন্তন যাত্ৰাৰ বাবে ৰাওনা হৈছে।
ৰামদৰশ মিশ্ৰই ২০২৫ চনত সাহিত্য আৰু শিক্ষাৰ ক্ষেত্ৰত ভাৰতৰ চতুৰ্থ সৰ্বোচ্চ অসামৰিক বঁটা পদ্মশ্ৰী বঁটা লাভ কৰিছিল। একেদৰে ২০২১ চনত মেই টু ইয়া হু নামৰ কবিতা সংকলনৰ বাবে সৰস্বতী সন্মান লাভ কৰে। ২০১৫ চনত তেওঁৰ কবিতা সংকলন অগ্নি কি হাঁসিৰ বাবে সাহিত্য অকাডেমী বঁটাৰে সন্মানিত হয়।
শিক্ষা
১৯২৪ চনৰ ১৫ আগষ্টত গোৰখপুৰৰ ডুমৰি গাঁৱত জন্ম হৈছিল ৰামদৰ্শ মিশ্ৰৰ। প্ৰাথমিক শিক্ষা গ্ৰহণ কৰিছিল গাঁৱৰ প্ৰাথমিক-মধ্য বিদ্যালয়ত। হিন্দী আৰু উৰ্দু ভাষাৰে মধ্য বিদ্যালয় সম্পূৰ্ণ কৰাৰ পিছত তেওঁ বিশেষ অৰ্হতাৰ বাবে পঢ়িবলৈ দহ মাইল দূৰৈৰ ধৰ্মী গাঁৱলৈ যায়। পণ্ডিত ৰামগোপাল শুক্লাই তাত অধ্যাপনা কৰিছিল, আৰু বিশেষ অৰ্হতাত উত্তীৰ্ণ হোৱাৰ পিছত মিশ্ৰই বৰহাজৰ পৰা বিষাৰদ আৰু সাহিত্য ৰত্ন পৰীক্ষাত উত্তীৰ্ণ হৈছিল। ইয়াৰ পিছত তেওঁ ইংৰাজী অধ্যয়নৰ সৈতে জড়িত হৈ পৰে আৰু মেট্ৰিকৰ বাবে ১৯৪৭ চনত বাৰাণসীলৈ আহি বেনাৰস হিন্দু বিশ্ববিদ্যালয়ত নামভৰ্তি কৰে। তাতেই তেওঁ ইণ্টাৰমিডিয়েট, বি এ, এম এ, পি এইচ ডি গৱেষণা সম্পূৰ্ণ কৰে।
পাঠদান
১৯৫৬ চনত তেওঁ গুজৰাটৰ কেইবাখনো মহাবিদ্যালয়ত অধ্যাপনা কৰিছিল, য’ত এম এছ ইউনিভাৰ্চিটি, বৰোদা, ছেইণ্ট জেভিয়াৰ কলেজ (আহমেদাবাদ) আৰু এছ.বি. জৰ্জ কলেজ (নৱছাৰী)। ১৯৬৪ চনত দিল্লী বিশ্ববিদ্যালয়ত যোগদান কৰি দিল্লীৰ স্থায়ী বাসিন্দা হয়।
লিখনি
ৰামদৰশ মিশ্ৰই এক সুদীৰ্ঘ কাব্য যাত্ৰা কৰিছে। ১৯৫১ চনত তেওঁৰ প্ৰথম কবিতা সংকলন পঠ কে গীত প্ৰকাশ পাইছিল যদিও ১৯৪০ চনৰ আশে-পাশে তেওঁ কবিতা লিখিবলৈ আৰম্ভ কৰিছিল। তেওঁৰ প্ৰথম প্ৰকাশিত কবিতা চাঁদ। কবিতাৰ উপৰিও তেওঁ গজল, গল্প সংগ্ৰহ, শিশু সাহিত্যকে ধৰি সাহিত্যিক ক্ষেত্ৰত যথেষ্ট অৱদান আগবঢ়াই গৈছে।
हिन्दुस्थान समाचार / অৰৱিন্দ
