শোণিতপুৰ, ২৯ অক্টোবৰ (হি.স.)। শোণিতপুৰ জিলা পথ সুৰক্ষা সমিতিৰ মাহিলী বৈঠকখন আজি শোণিতপুৰ জিলাৰ জিলা আয়ুক্ত কাৰ্যালয়ৰ সভাকক্ষত অনুষ্ঠিত হয়। জিলা উন্নয়ন আয়ুক্ত লক্ষিনন্দন চহৰীয়াই আঁতধৰা আজিৰ সভাত অতিৰিক্ত আৰক্ষী অধীক্ষক শ্ৰীমতী মৌচুমী কলিতা, তেজপুৰ পৌৰসভাৰ সভাপতি শ্ৰীৰমেন তামুলী, ডি আৰ এছ চিৰ সদস্য সচিব অজিত কুমাৰ মেধি আৰু সমিতিৰ অন্যান্য সদস্যসকল উপস্থিত থাকে।
বৈঠকত, বিগত মাহৰ সভাত পথ সুৰক্ষা সন্দৰ্ভত উত্থাপিত হোৱা বিভিন্ন দিশ সমূহ অনুযায়ী গ্ৰহণ কৰা ব্যৱস্থাসমূহৰ স্থিতি পৰ্যালোচনা কৰা হয়। সভাত জিলা পৰিবহণ বিভাগে জনাই যে সমগ্ৰ জিলাখনত বিশেষকৈ দুৰ্ঘটনা সংঘটিত হোৱা ঠাইত পথ সুৰক্ষাৰ চিহ্ন স্থাপন কৰাৰ প্ৰয়োজনীয়তা সম্পৰ্কে বিভাগটোৱে ইতিমধ্যে প্ৰতিবেদন দাখিল কৰিছে। সমগ্ৰ জিলাখনত গতিৰোধক (স্পীড ব্ৰেকাৰ) স্থাপনৰ যুক্তিসংগতকৰণৰ ওপৰত আলোচনা কৰা হয়, য’ত পদ্ধতিগত আৰু কাৰিকৰীভাৱে নিশ্চিত কৰাত গুৰুত্ব দিয়া হয়।
বিদ্যালয়ত চলি থকা “চোটা কপ” পদক্ষেপ আৰু অন্যান্য সজাগতামূলক কাৰ্যসূচীৰ বিষয়ে শিক্ষা বিভাগে অৱগত কৰে। বৈঠকত সংশ্লিষ্ট অংশীদাৰসকলৰ সৈতে ই-ৰিক্সা পৰিচালনা আৰু পথ সুৰক্ষাৰ সন্দৰ্ভত তৃণমূল পৰ্যায়ত সজাগতাৰ গুৰুত্বৰ ওপৰত আলোকপাত কৰা হয়।
উল্লেখযোগ্য যে, সংহত পথ দুৰ্ঘটনা তথ্যকোষ (আইআৰএডি) প্লেটফৰ্মত উপলব্ধ তথ্য অনুসৰি ২০২৫ চনৰ অক্টোবৰ মাহত শোণিতপুৰ জিলাত ৮ টা মৃত্যুকে ধৰি এতিয়ালৈকে মুঠ ৫৯টা পথ দুৰ্ঘটনা পঞ্জীয়নভুক্ত কৰা হৈছে । ইয়াৰোপৰি সভাত জিলা পৰিবহণ বিষয়াই অৱগত কৰে যে, ২০২৫ চনৰ ১ অক্টোবৰৰ পৰা ২৭ অক্টোবৰৰ ভিতৰত হেলমেট পৰিধান নকৰাৰ ৪৬৩টা আৰু দ্ৰুত বেগেৰে/বিপজ্জনকভাৱে গাড়ী চলোৱাৰ ৪০০ৰো অধিক গোচৰ পঞ্জীয়ন কৰা হৈছে ।
হিন্দুস্থান সমাচাৰ / সমীৰ কাৰ
