ৱাশ্বিংটন, ২৫ অক্টোবৰ (হি.স.)। আমেৰিকাৰ প্ৰতিৰক্ষা বিভাগ পেন্টাগনে লেটিন আমেৰিকাত চলি থকা ড্ৰাগছ কাৰ্টেল আৰু আন্তঃৰাষ্ট্ৰীয় অপৰাধী সংগঠনৰ নেটৱৰ্কত ধ্বংস কৰিবলৈ শুকুৰবাৰে কঠোৰ ব্য়ৱস্থা গ্ৰহণৰ কথা ঘোষণা কৰে । প্ৰতিৰক্ষা সচিব পিট হেগছেথে অনাগত দিনত বিমানবাহী জাহাজ ইউ এছ এছ জেৰাল্ড আৰ ফৰ্ড আৰু ইয়াৰ লগত জড়িত যুদ্ধ জাহাজসমূহ এই অঞ্চলত নিয়োগ কৰিবলৈ নিৰ্দেশ দিয়ে।
দ্য ৱাশ্বিংটন পোষ্টৰ মতে, মুখপাত্ৰ শ্বেন পাৰ্নেলে কয় যে সম্প্ৰসাৰিত সামৰিক উপস্থিতিৰ লক্ষ্য কেৱল পশ্চিম গোলাৰ্ধত ড্ৰাগছ সৰবৰাহ ৰোধ কৰাই নহয়, তাত কাম কৰা অপৰাধী গোটসমূহক দুৰ্বল আৰু ধ্বংস কৰি পেলোৱা। এই পদক্ষেপ ৰাষ্ট্ৰপতি ড’নাল্ড ট্ৰাম্পৰ ড্ৰাগছ কাৰ্টেলৰ বিৰুদ্ধে অভিযানৰ এক মূল অংশ। ইয়াৰ ফলত অঞ্চলটোত আমেৰিকাৰ সৈন্যৰ সংখ্যা প্ৰায় দুগুণ হোৱাৰ সম্ভাৱনা আছে।
সামৰিক কাৰ্যকলাপৰ সৈতে পৰিচিত আমেৰিকাৰ প্ৰতিৰক্ষা বিষয়াসকলে কয় যে কেৰিবিয়ান সাগৰত আঠখন যুদ্ধজাহাজত প্ৰায় ৬ হাজাৰ জোৱান নিয়োগ কৰা হৈছে, ইয়াৰ উপৰিও প’ৰ্ট’ ৰিকোৰ সামৰিক ঘাটিসমূহত উন্নত এফ-৩৫ যুঁজাৰু বিমান নিয়োগ কৰা হৈছে। ইউৰোপৰ পৰা এই অঞ্চললৈ অহাৰ পথত ফৰ্ড কেৰিয়াৰ ষ্ট্ৰাইক গ্ৰুপে জুন মাহত প্ৰায় ৪৫০০ নাৱিক লৈ ভাৰ্জিনিয়াৰ নিজৰ ঘৰুৱা বন্দৰৰ পৰা যাত্ৰা কৰিছিল। এই মাহত পেন্টাগনে মেৰিন কৰ্পছৰ জ্যেষ্ঠ বিষয়া লেফটেনেণ্ট জেনেৰেল কেলভাৰ্ট ৱৰ্থৰ কমাণ্ডত নতুন যৌথ টাস্ক ফ’ৰ্চ সক্ৰিয় কৰে।
ট্ৰাম্প প্ৰশাসনৰ তথ্য অনুসৰি ছেপ্টেম্বৰৰ আৰম্ভণিৰ পৰা ১০টা নাও আক্ৰমণত কমেও ৪৩জন লোকৰ মৃত্যু হৈছে। ৰাষ্ট্ৰপতি ট্ৰাম্পে উল্লেখ কৰিছে যে এই অপৰাধীসকলক স্থলভাগতো আক্ৰমণ কৰা হ’ব। নিউয়ৰ্ক টাইমছৰ বাতৰি অনুসৰি, প্ৰতিৰক্ষা সচিব পিট হেগছেথে ড্ৰাগছ কঢ়িয়াই অনা দশম নাওত থকা সেনাই ছয়জন লোকক হত্যা কৰা বুলি কোৱাৰ পিছতে পেন্টাগনৰ শেহতীয়া সিদ্ধান্ত লোৱা হৈছে।
हिन्दुस्थान समाचार / মনোজ কুমাৰ শইকীয়া
