মৰক্কো, ২৩ অক্টোবৰ (হি.স.)। বিশ্ব ফুটবল শাসকীয় সংস্থা ফিফাৰ উদ্যোগত আয়োজিত এখন প্ৰতিযোগিতা সংযুক্ত আৰব আমিৰশ্বাহীৰ পৰা মৰক্কোলৈ স্থানান্তৰ কৰা হৈছে। ফিফাই এই পদক্ষেপ নিশ্চিত কৰি কয় যে দেওবাৰৰ পৰা মৰক্কোত চাৰিটা দলৰ প্ৰীতি প্ৰতিযোগিতা আৰম্ভ হ’ব।
ফিফা ইউনাইটছ: উইমেনছ ছিৰিজ নামৰ এই প্ৰতিযোগিতাখনত প্ৰথমে ২৩ অক্টোবৰৰ পৰা ২৯ অক্টোবৰলৈ ডুবাইত অনুষ্ঠিত হোৱাৰ কথা আছিল। ইউ এ ই, চাড, লিবিয়া, আফগানিস্তানৰ মহিলা শৰণাৰ্থী দলে অংশগ্ৰহণ কৰিছে। তালিবান ক্ষমতালৈ অহাৰ পিছত মহিলা ক্ৰীড়াৰ ওপৰত জাৰি কৰা নিষেধাজ্ঞাৰ বাবে ২০২১ চনত আফগানিস্তানৰ মহিলা শৰণাৰ্থী দল গঠন হৈছিল। সেই সময়ত বহু খেলুৱৈয়ে নিৰ্যাতনৰ ভয়ত দেশ এৰি যাবলগীয়া হৈছিল। ফিফাই এক আনুষ্ঠানিক বিবৃতিত কয় যে, “ফিফাই ৰয়েল মৰক্কো ফুটবল ফেডাৰেচনক ধন্যবাদ জনাইছে আৰু এখন সফল প্ৰতিযোগিতা আয়োজন কৰিবলৈ আগ্ৰহী।”
সংস্থাটোৱে নিশ্চিত কৰিছে যে আফগান মহিলা শৰণাৰ্থী দলটোৱে আলোচনাৰ অন্তত আনুষ্ঠানিকভাৱে নিজৰ নাম সলনি কৰি আফগান উইমেন ইউনাইটেড কৰিছে। তালিবান শাসনৰ পূৰ্বে আফগানিস্তানৰ মহিলা দলত ২৫ গৰাকী চুক্তিবদ্ধ খেলুৱৈ আছিল, যাৰ অধিকাংশই এতিয়া অষ্ট্ৰেলিয়াত বসতি স্থাপন কৰিছে। ইফালে আফগানিস্তানৰ পুৰুষ ফুটবল দলটোৱে স্বাভাৱিকভাৱে খেল অব্যাহত ৰাখিছে।
हिन्दुस्थान समाचार / অৰৱিন্দ
